Aiseya 38 - Intas Etipup

Nuarin tas alupas 38.

1 Is leh intas a Hesekaia mika yi mas aien, ja is wat alaigaheni aien, is ika a Atua yi lep umoh aien. 8 Et adumoij pan irai uarin et ten nagesega, nitai asjaaicnaig vai intas upyi asaig iyehki. 9 Nohranitai va naaurinig o un.

¹ AN nopan iyehki is emehe a Hesekaia um ubutpotet u inmas o un; is um apan ehelen a Aiseya naprofeta inhal u Emos, um ika ehelen, Et ika a Ihova, Namu asaig asega intas unyum aiek vai itai an nimnim unyum: vaig inig nikavaig, napu mas aiek, um eti umoh.

² Is um ahidaig pan yin an nyipin neom a Hesekaia, um alaigaheni vai Ihova.

³ Is um ika aien, Ak Ihova, ek ugyi euc ainyak mika an imiehva nedo unyak aiek, kis mun atga ainyak an nuhup unyum an nedo inveijec, im lep an liinmopok asega, um ago van merit unyum. Is taig alupas a Hesekaia.

⁴ Is tas a Ihova ehele Aiseya, um ika,

⁵ Namu apan aiek, um ika ehele Hesekaia, Et ika a Ihova, Atua u Tevit etpom, Ek mun atahaijeg intas alaigaheni unyum ainyak, ek mun almoi intaig unyum ainyak: almoi, ekpu lep ika ainyak an lep umoh aiek irai mesese inyi fiftiin.

⁶ Ekpu imiatamaig euc im inmaliyum inigki ainyak vai nikmai natimarid an pece Asiria: ekpu lep imialep inmaliyum inigki ainyak.

⁷ Etpu ahes ehele Ihova nitai asjaaicnaig inigki imi euc, mika etpu ehneijid intas inigki a Ihova et mun asaig aien;

⁸ ekpu imiadumoij nalmun nagesega ainyak irai ualin iji igki et mun asuol iran irai uarin iji ig is ago a Ehas va nalmun nagesega, yi adumoij pan nagesega irai uarin inyi ten. Is adumoij pan nagesega irai uarin is ten, irai uarin iji igki is asuol iran.

⁹ NITAASVIITAI nigki is aged a Hesekaia natimarid an pece Juta, is wat emehe aien, ja is par umoh aien va nemehe iyehki:

¹⁰ Kis ika ainyak an takuras unyak ache, Ekpu apan an neucse nathatahau umaatmas ainyak: er iknipagki vai nyak nahaiji mesese unyak, inki eti yetpan irai mesese asega unyak ainyak.

¹¹ Kis ika ainyak, Inki eti lep alum Ihova ainyak, Ihova an pece u ilpu atimi umumoh: inki eti lep ecet atimi ainyak, im ilpu atimi era amen an nobohtan ara.

¹² Eris atipagki nuarin ijinies an neom unyak, um alcapdicraig ehni vai nyak et idivaig niyum uriicai u natimi asgi siip: ek mun asvi nitai umoh irau unyak ainyak et idivaig natimi ahod apelumai: etpu ucsamud nyak aien irai ilpui ya: napu ago ehni nyak aiek an nadiat inyi ethi um yetpan an nepig.

¹³ Kis ati yin an nuhup unyak ainyak um yetpan an nuhialeg et idivaig laion, um ika et uce, etpu asuoplecoplec niji eduok asega aien: napu ago ehni nyak aiek an nadiat inyi ethi um yetpan an nepig.

¹⁴ Kis laav ainyak et idivaig nohopcop ka kula: kis taig ainyak et idivaig nucip: et auatialidi nesganimtak ainyak va neas jipan unyak: er ehcerucai nyak; namu imicoho nyak aiek, ak Ihova.

¹⁵ Ekpu asaig inhe ainyak? et mun tas ehelek aien, et mun ago aien: ekpu eklim atga irai iji mesese unyak ainyak va nohocred u inliinmopok.

¹⁶ Ak Natimarid, era umumoh natimi irai itai iji igki, ek lep umoh ainyak irai itai iji igki asega: napu lep ika aiek ki cehcehe ainyak, um imiatumumoh nyak.

¹⁷ Et idim uco, et asjapigmoig nohocred esjilid unyak nigpa: na mun aiheuc vai nyak aiek um imiatamaig nyak vai nehpanitai an mas: na mun idim erekhaigse nedo has asega unyak aiek an cehum.

¹⁸ Erupu eti naaurinig vai euc a ilpu atimi umaatmas, erupu eti imiahpas euc a ilpu atimi emesmas, erupu eti aitgaig intas inveijec unyum a ilpu atimi iji ig era asuol irai etheso ara.

¹⁹ Erupu naaurinig vai euc a ilpu atimi umumoh, a ilpu atimi umumoh marom, et idivaig nyak an nadiat inigki: erupu asuptecnaig intas inveijec unyum ehele ilpu hal ura a ilpu etmara.

²⁰ Et mun imiatamaig nyak a Ihova: va nitai inigki ecrumu acesaces nohraiitai unyak aijama, um atcei itai aces ohraiitai, irai iji adiat asega an numumoh unyima an neom u Ihova.

²¹ Is mun ika a Aiseya, Erumu leh nohwan ateg aplamod ara um ati an heuau, ja etpu cehcehe aien.

²² Is lep ika a Hesekaia, Inhe nitai asjaaicnaig mika ki apan an neom u Ihova ainyak?