Aiseya 37 - Intas Etipup

Nuarin tas alupas 37.

1 Et taigtaig a Hesekaia um abrai hal par ugyi Aiseya mika yi alaigaheni vai ra. 6 Et ago eropse inliinmopora a Aiseya 8 An napan u Senakerib par ati nedoa vai Tirheka, et aged nitaasviitai ehele Hesekaia aien, um asaig intas itap iran. 14 Nalaigaheni u Hesekaia. 21 Et asan tas upyi asaig a Aiseya, um ika eri auahas Senakerib va nijinies u inliinmopon, um ikni niji itai upene imi nup u Saion. 36 Et atgei nup Asiria a nagelo o Ihova. 37 Erau atgei Senakerib ahwat hal o un an maliyum Nineve.

¹ IS wat atahaijeg intas iji igki a Hesekaia natimarid, is ahpati napelumai iran aien, um aso yin ira apelumai uucai, um apan an nimnim u Ihova.

² Is abrai Elaiakim aien, natimi alupas irai nup uran nimnim o un, im Sebna natimi aged itaasviitai, im ilpu atimi alupas irai ilpu atimi ahlap, eris aso ra ira apelumai uucai, mika eri apan ehele Aiseya naprofeta inhal u Emos.

³ Eris ika ehelen ara, Et ika a Hesekaia, Et adiat u nohocred nadiat inigki, im lep u nacaiji caija vaig, im lep u intas itap: nopan apos ilpu halav mun igki, ja et eti eteuc nemda par apos ra.

⁴ Et mun abraig pam Rabsake a natimarid an pece Asiria natimi alupas o un, mika yi asaig intas has vai Atua umoh, kit etpu atahaijeg niji tas o un a Ihova Atua unyum, um acaiji intas o un et mun ahgei a Ihova Atua unyum: va nitai inigki namu alaigaheni aiek vai ilpu ahrin era amen igcaki ara.

⁵ Eris um yetpan ehele Aiseya a ilpu aheca u Hesekaia natimarid.

⁶ Is um ika ehele ra a Aiseya, Akumu ika ehele natimi alupas unyimia aijaua, Et ika a Ihova, Namu jim imtitaig aiek vai intas itap iji ig na mun atahaijeg aiek, eris amcel vai nyak a ilpu takuras u natimarid an pece Asiria.

⁷ Namu ato aiek, ekpu ika ainyak yi imtitaig aien vai tah intas etpu ahgei aien, um adumoij pan an pece o un; ekpu ika ainyak eri atgei yin an nauitoga an pece o un.

⁸ Is um adumoij pan a Rabsake, um ecet natimarid an pece Asiria is yiat an maliyum Libna aien: is upyi atahaijeg aien, mika is udei inmaliyum Lekis a natimarid.

⁹ Is atahaijeg a Senakerib vai Tirheka natimarid an pece Idiopia, eris ika, Et apam aien nalaig ati nedoa vai euc. Is wat atahaijeg intas inigki aien, is abrai ilpu aheca o un aien mika eri apan ehele Hesekaia, um ika,

¹⁰ Akumu ika aijaua ehele Hesekaia natimarid an pece Juta, Etmu jim ahiyek euc a Atua unyum, na asgeig iran aiek, um ika, Uhpu eti atcijaig Jerusalem an nikmai natimarid an pece Asiria.

¹¹ Namu aktaktai aiek, as atahaijeg aiek nedo inig eris ago a ilpu atimarid an pece Asiria vai niji pece asega, eris auahas ehni ra ara; uhpu idim eti imiatamaig euc.

¹² Eris idim eti imiatamaig ra sji igki a ilpu atua u nup urai iji pece is auahas ra a etmak im ilpu retpok, nikavaig, nup u Cosan, im nup u Heran, im nup u Risef, im nup Iten iji ig eris amen Telassar ara.

¹³ Natimarid an pece Hemad yek eda, im lep natimarid an pece Arpat, im lep natimarid an maliyum Sefarveem, im Hina, im Aiva?

¹⁴ Is um leh nitaasviitai iyehki a Hesekaia an nikmai ilpu atimi ehced, um esvi: is um apan anliin neom u Ihova a Hesekaia, um elgelgei nitaasviitai iyehki, um ati an nuhup u Ihova.

¹⁵ Is um alaigaheni vai Ihova a Hesekaia, um ika,

¹⁶ Ak Ihova esjilid acen, Atua u nup Isreel, na amen an niblai ohwat jerub aiek, na Atua inveijec aiek, aiek ache, irai nup urai iji elcau asega an nobohtan: as ago nohatag im nobohtan aiek.

¹⁷ Ak Ihova, namu atgeig pam intikgam aiek, um atahaijeg; ak Ihova, namu asalgei nesganimtam aiek, um almoi: um atahaijeg niji tas asega u Senakerib, aien aigki et mun abrai natimi inigki aien mika yi asaig intas has vai Atua umoh.

¹⁸ Ak Ihova, et idim inveijec, eris mun emda a ilpu atimarid an pece Asiria, um auahas nup urai iji elcau asega, im lep niji pece ura,

¹⁹ um ikni niji atmasimai ura an cap, um auahas ra: vaig inig nikavaig, eris eti atua ara, jai incai im inhat, nauritai irai ikmai atimi.

²⁰ Va nitai inigki, ak Ihova Atua unyima, namu imiatamaig cama aiek va nikman, erupu lep ato a nup urai iji elcau asega an nobohtan mika na idim Atua aiek ache, ak Ihova.

²¹ Is abra atimi a Aiseya inhal u Emos mika eri apan ehele Hesekaia, um ika, Et uce intas o Ihova Atua u nup Isreel, Va nitai inigki, nikavaig, na mun ugyi nyak vaig aiek vai Senakerib natimarid an pece Asiria:

²² intas inigki nigki et mun asaig a Ihova vai yin; Era mun amcel vai euc a nup u Saion, era mun imiafakahcil euc ara; era mun auhohaig nidjinira vai euc a nup u Jerusalem.

²³ Na mun auoh ehcamai vai di aiek? um asan tas has vai di? na mun asan tas ijinies vai di aiek, um imiaridjai nesganimtam ijinies? vai Atua Upene u nup Isreel marom.

²⁴ Na mun auoh ehcamai vai Natimarid aiek irai ikmai ilpu aheca unyum, um ika, Et ahinag acen niji jariot unyak, ek mun aridjai ainyak irai lola au, ira ahaiji Lebanon; ekpu emda ainyak um attai niji cai sitar ijinies, im niji eijiv esjilid: ekpu idim yetpan an lolan nau ainyak, im lep an tid iran, im lep an nahapol an nesei.

²⁵ Kis mun ucji ehpaiwai ainyak, um umnyi inwai iran; ekpu ika ainyak yi ame niji ofowai asega an pece Ijipt irai ugnyai eduok.

²⁶ Na mun atahaijeg aiek, ka oʼo, kis ago ainyak itac acen, kis ati ainyak itu acen? ek mun asaig ainyak an nopan inig, mika an auahas niji maliyum emda aiek, um alcapdicraig, mika yi iji hat ache.

²⁷ Va nitai inigki eris auatialidi a nup urai pece iji igki, eris atgei ra um auahas ra: eris idivaig nomotmot an lelitai ara, im nefelelicai emelmat, im nomotmot irai lolai eom, im korn et tup ujipsotan um mese.

²⁸ Ja ek mun ato nateucse vaig unyum ainyak, im napan vaig unyum, im napam vaig unyum, im lep nedemda alupas unyum vai nyak.

²⁹ Kis ahgei intas ainyak va nedemda alupas unyum vai nyak, im lep vai intas ijinies unyum, va nedo inigki ekpu ati incauaij unyak ainyak an gidjum, im injaula unyak an nipjineucsem, ekpu ika ainyak an adumoij pan aiek an nefalaig inig as apam iran aiek.

³⁰ Etpu itai asjaaicnaig imi euc nitai inigki, Akumu caig aijaua an mesese inigki nitai hegaig iji igki et tup ispun ededel; im lep an mesese secunt nitai hegaig iji igki et ahes iran yehki: ja an mesese dirt akumu ahwaig korn aijaua, um asjapicnaig nohwan, um ago okoro vaine, um caig nohwai itai iran.

³¹ Erupu lep aketo a ilpu ahri nup u Juta eris eti auahas ra, um etgeig jipe neucvan sepamki, um oho nohwan ijinies:

³² erupu ahes Jerusalem a ilpu ahrin iji ehki um apan itac, erupu lep ahes an nedoon Saion hal ra eris eti auahas ra um atga ura: etpu ago nitai inigki a Ihova esjilid acen an nemda o un.

³³ Va nitai inigki et uce intas o Ihova vai natimarid an pece Asiria, Inyi eti yetpam an maliyum inigki aien, um eti atcijaig tah nefana eahki, um eti imiapam ubutpotet tah nitai ahtaipup, um eti imiaridjai nobohtan vaig.

³⁴ Et ika a Ihova, Etpu adumoij pan aien au nefalaig inig is apam iran aien, etpu eti yetpam anliin maliyum inigki aien.

³⁵ Ekpu imialep inmaliyum inigki ainyak um imiatamaig atimi iran vai nyak, im lep vai Tevit naheca unyak.

³⁶ Is apan a nagelo o Ihova, um auud ilpu eucsupo is 185,000 an nuarin amen iran u nup Asiria: eris wat atidai ara an nuhihialeg, um alum ra, eris idim ilpu atimi emesmas ara asega.

³⁷ Is atidai a Senakerib natimarid an pece Asiria, um atga o un, um adumoij pan, um amen Niveve.

³⁸ Is wat alaigaheni aien an neom u Nisrok natmas o un, erus atgei yin an nauitoga ahwat halav atamaig o un, nan, Atramelek im Sariser, um ahapan an pece Ararat: is isjeupigmoig yin a Isarhaton inhalav atamaig o un um atimarid.