Aiseya 35 - Intas Etipup

Nuarin tas alupas 35.

1 Nimiacitak im namen upene an nelcau u Kristo. 3 Er ago emda inliinmopoi ilpu atimi auatialidi vai niji itai upene et ahes an tas Upene u Iesu.

¹ ETPU imiacitak ra intupauun im inuarin umaruma; etpu lep imiacitak namasacen, um elwa et idivaig intisiancai.

² Etpu elwa namasacen, etpu idim elwa um imiacitak; maiya, etpu cediaig um ahlaig ijinies: er alupai namasacen niji itai upene u Lebanon, im neklim upene u Karmel im Seron, erupu ecetai natimi alupas u Ihova natimi, im neklim upene u Atua uja.

³ Akumu regeig irai ikmamia asjileuc aijaua, um ago emda nijin eduomia auatialidi.

⁴ Akumu asaig aijaua ehele ra sji igki et auroauro inliinmopora ara, um ika, Akumu emda aijaua, um jim imtitaig: alum Atua unyimia, et apam neruvaig va nedo has, neruvaig et ahes ehele Atua; etpu idim ham a Atua um imiatamaig caua.

⁵ Ja uhpu asalgei nesganimtai ilpu atimi apat nesganimtara, erupu ahgei itai a ilpu atimi ucjipines intikgara.

⁶ Erupu eliliaujai a ilpu atimi asvahteuc neduora et idivaig hart, erupu ahlaig ijinies vai incediaig ura a ilpu atimi pop: et mun idim ahlau ohua jai niji wai an namasacen, im niji wai yah an tupauun.

⁷ Etpu eteuc netpinwai an namasacen et eteuc nalmun wai iran, etpu eteuc niji imtaiwai an nobohtan mese: etpu edel niji ieg im niji auwau irai uarin u kuri aleg, im lep irai uarin asjeuc iran ura.

⁸ Etpu eteuc nefalaig eahki, nefalaig assijai marom, uhpu anvi nidan par ika, Nefalaig an nedo upene; inyi eti atga iran tah natimi auatatimi; ja etpu eteuc vai ilpu atimi upene ache: eru wit atga iran a ilpu atimi eti aktaktai, erupu eti ahnag iran ara.

⁹ Etpu eti eteuc tah laion eahki, etpu eti aridjai iran tah nitai aleg, uhpu eti ecetai eahki tah nitai has; erupu atga iran a ilpu atimi iji ig eris imiatamai ra:

¹⁰ erupu adumoij pam ara sji igki is imiatamai ra a Ihova, erupu yetpam Saion ara um ahlaig ijinies, etpu amen incediaig irai idjinira irai iji mesese: etpu idim imi ra nimiacitak im incediaig, etpu ahapan nohocred im nehtigtaig.