Aiseya 34 - Intas Etipup

Nuarin tas alupas, 34.

1 Nedo o Atua nigki an neruvaig o un irai ilpu atimi ago nedo has vai nup an, nakalasia o un. 11 Namen has u ilpu atimi edemda vai ra. 16 Et amen aktit intas upyi asaig inigki.

¹ AK nup urai iji elcau, akumu ubutpotet aijaua par ahgei itai; ak nup urai iji pece, akumu atahaijeg aijaua: etmu ahgei itai nobohtan, im niji itai asega amen iran; etmu ahgei itai nobohtan asega, im niji itai asega ahes iran.

² Et ehniv a Ihova vai nup urai iji pece asega, et edemda aien vai niji itai asega amen iran: is mun anacanac aien par auahas ehni ra, is mun ikni ra aien mika eri atgei ra.

³ Uhpu erekhaig pan itac ilpu atimi ma eris atgei m, etpu lep aridjai nepiv irai ohura emesmas, etpu yah inja ira ra irai iji edoon.

⁴ Etpu arupoig niji itai lah asega an nohatag, uhpu asvi nohatag asega et idivaig inuari peper: etpu eropropse niji itai asega, et idivaig et elelse nerin imlai irai vaine, im lep et idivaig et eropse nohwan nateg irai nateg.

⁵ Eh mun ati nauitoga unyak an ja irai hal an nohatag: akumu almoi aijaua, etpu asuol an pece Itom, irai atimi iji ig kis asaig intas ahlaijaig ra ainyak, par aru nedo ura.

⁶ Et eteuc irai Ihova nauitoga, et ohua an ja ira ra, er aspi an nagako, an ja irai nakli siip im lep irai anin, an nagako an nohwanispehig irai siip atamaig: et idim eteuc nitai ahlap vai Ihova an maliyum Bosra, im natgei atimi et ahinag an pece Itom.

⁷ Erupu eropropse ehele kurimatau aleg, im lep kurimatau tupko im kurimatau atamaig; etpu ahec inpece ma an ja ira ra, etpu lep aiyu inmah an nobohtan ura an nagako ira ra.

⁸ Vaig inig nikavaig, et eteuc nopan u Ihova va nedemda o un, im inmesese va neruvaig o un par imiaras nup u Saion.

⁹ Etpu hat aplan niji wai yah Itom, etpu arekwas inmah an nobohtan iran, etpu hat aplan er atnamud inpece iyehki.

¹⁰ Uhpu eti ahni an nadiat im lep an nepig; etpu aridjai nadran cap iran irai iji mesese: etpu amasacen ahes an nopan inig um yetpan an nopan iyehki; inyi eti ahced inpece iyehki tah um imihum pan irai iji mesese.

¹¹ Erupu ohuun inpece iyehki niji meijcop im niji alidmot; erupu amen iran niji ekrai im niji paig: uhpu ati iran inya asjaaicnaig mika yi amasacen, im inhat asjaaicnaig iran mika yi uarin alcapdicraig.

¹² Erupu anvi nidan ara par ika nelcau niji mai ij ahyuahyu ura; erupu lep idim tiih a ilpu atimi alupas ura.

¹³ Etpu ededel niji ipjid acen irai imnim atimi um, im lep niji efelelicai has im niji itai upunupun irai eom emda ura: etpu uarin amen iran va niji kuri aleg, im nimnim va niji man aleg.

¹⁴ Erupu uhum jipe niji itai aleg im niji itai aunyauwaig, erupu laav jipe niji itai et eteuc nalau ira ra; erupu amen eahki ache niji itai edo an nepig, um ecetai inuarin asjeuc iran vai ra.

¹⁵ Erupu ago inuarin amen iran ura eahki niji imyeuv alupas, um ahad, um aminjinaig, um asjapicnaig niji hal ura ithara: erupu asjapicnaig eahki ache niji man aleg, um uhum jipe.

¹⁶ Akumu ahilek aijaua an nitaasviitai u Ihova, um esvi: et mun idim eti tiih tah nitai aleg iji igki, era eti ahijighei tah ira ra ara: vaig inig nikavaig, ek mun asaig intas alep inigki an nipjineucsek ainyak, et mun asjapicnaig nitai aleg iji igki a Nesgak Upene.

¹⁷ Et mun ati nitai asjaaicnaig vai ra aien, et mun atiakoai inpece inigki imi ra an ya aien: erupu ohuun ara irai iji mesese, erupu amen iran ara ahes an nopan inig um yetpan an nopan iyehki.