Aiseya 33 - Intas Etipup

Nuarin tas alupas, 33.

1 Neruvaig u Atua irai ilpu atimi edemda vai nup an nakalasia o un. 13 Namen upene u ilpu atimi ecen va Atua.

¹ KAIHEUC vai caua akis atoraliak itai aijaua, ja eris eti atoraliak itai unyimia; akis ago nedo efaifa aijaua, ja eris eti ago nedo efaifa vai caua aku wit eti lep atoraliak itai aijaua, uhpu atoraliak itai unyimia; aku wit eti lep ago nedo efaifa aijaua, uhpu ago nedo efaifa vai caua.

² Ak Ihova, namu aiheuc vai cama aiek; ecra aitgai euc aijama: namu atau ira ra aiek irai iji uhialeg; namu lep imiatamaig cama aiek an nopan ohocred unyima.

³ Era aha a nup urai iji pece va nohra atimi et ahinag; era terimterim a nup urai iji elcau vai natidaijai unyum.

⁴ Uhpu asjapicnaig naga unyimia et idivaig era auahas itai niji imyeuv: erupu athut iran ara et idivaig nathut jipe u niji heled.

⁵ Et esjilid a Ihova; et amen jipagko aien: et ika aien yi ohua Saion an neruvaig atoh im lep an nedo atoh.

⁶ Eri amen aktit irai mesese unyum vai itai iji igki, nikavaig, nimiatamaig alupas atimi, im narapakau, im nato itai: naga o un et imtitaig vai Ihova aien sji igki.

⁷ Im lep inig, era aunyauwaig itac a ilpu atimi emda ura: era ehtigtaig alupas a ilpu atimi ehced o un par asan nigpa.

⁸ Eh mun auahas niji efalaig asega, et ti tah natimi atga au nefalaig: era atladwi intas etipup a nup Asiria, era ika ara et takitai niji maliyum, era eti ecen vaig tah natimi ara.

⁹ Et taig inpece inigki um auatiatidi: et ehcamai a Lebanon um ti nesgan: et idivaig namasacen Seron; et elelse nerin cai an nau Beson im lep an nedoon Karmel.

¹⁰ Et ika a Ihova, Ekpu atidai ainyak an nopan inig; uhpu alcacsei jai nyak an nopan inig; ekpu imiaridjai nyak ainyak an nopan inig.

¹¹ Akupu opoc aijaua va narasi itai, akupu apos nefelelicai aijaua: etpu auahas caua nahlai unyimia, et idivaig incap.

¹² Erupu idivaig niji ehpan nubrei a nup urai iji pece: etpu atnamud ra incap, et idivaig niji itai upunupun eris wud yi aled iran.

¹³ Ak ilpu atimi itac acen, akumu atahaijeg aijaua nitai iji igki kis mun ago ainyak; ak ilpu atimi ubutpotet, akumu ato nemda unyak aijaua.

¹⁴ Era imtitaig a ilpu atimi auatatimi Saion; era eucjeucjeucaij a ilpu atimi ago nedo has esjilid; um ika, Et emda a di iraija par amen an cap atnamud? et emda a di iraija par amen an cap inyi eti lep ti?

¹⁵ Aien et ago nedo atoh aien, um tas inveijec; aien et amcel aien va nimtan nehcerucai atimi vaig, um eucjeucjaig nikman vai yi jim asjiraig nimtan va nedo has, aien et atapnes intikgan aien vai yi jim atahaijeg intas va natgei atimi, aien et atapnes nesganimtan aien vai yi jim almoi nedo has;

¹⁶ etpu amen jipagko aien: etpu amen upene aien irai uarin ehka an nij: uhpu alaan nitai caig; inyi eti ti inwai luman.

¹⁷ Akupu alum natimarid an natimi alupas o un irai esgaiimtamia aijaua: akupu ecetai inpece itac acen aijaua.

¹⁸ Etpu aktaktai itai er imtitaig alupas vaig inliinmopomia aijaua; um ika, Natimi inig yek eda et aged itaasviitai aien? natimi inig yek eda et asjaaicnaig itai aien? natimi inig yek eda et esvi niji eom ijinies um emda aien?

¹⁹ Akupu eti alum ilpu atimi imiakaikai iji igki aijaua, ilpu atimi iji igki et ehka vai caua par ato intas ura; et eche intas ura, um ehka par ato nesgan tas iran.

²⁰ Akumu almoi Saion aijaua, inmaliyum u nasjapicnaig uja: akupu ecetai Jerusalem irai esgaiimtamia aijaua inuarin amen igpa iran, et idivaig neom apelumai inig uhpu eti alcapdicraig; uhpu eti atipagki tah incai iran irai iji mesese, um eti omot tah injaula iran.

²¹ Etpu emda eahki vai caija a Ihova, etpu idivaig niji ofowai alupas aien, um lep idivaig niji wai yah; inyi eti atga iran tah nelcau irai ehev, inyi eti yetpan iran tah nelcau alupas.

²² Vaig inig nikavaig, et atimi almaijidjid uja a Ihova, et atimi tas alep uja a Ihova, et atimarid uja a Ihova; etpu imiatamaig caija aien.

²³ Et esjiliek niji jaula unyimia, um eti asjiraig atoh inceen nepan, um eti elgelgei nepan: ja eris par ahaig inpadiaig alupas; era lucsei naga a ilpu atimi asvahteuc neduora.

²⁴ Erupu eti ika a ilpu atimi amen iran, Inta emehe akaija: uhpu eti aru nedo has u ilpu atimi amen eahki.