Aiseya 32 - Intas Etipup

Nuarin tas alupas 32.

1 Et asuptecnaig a naprofeta niji itai upene etpu eteuc an nelcau u Kristo, 9 et lep ika aien uhpu auahas itai, 15 ja par apitac uhpu imiadumoij pam namen upene ura.

¹ IM lep inig, etpu esjilid ira atimi a natimarid inyi ethi mika yi ago nedo atoh aien, erupu esjilid ira atimi a ilpu atimi alupas o un mika eri ago neruvaig atoh ara.

² Etpu lep idivaig inuarin atpuh iran vai nimtinjap a natimi inyi ethi, im lep naiyu van copda; etpu lep idivaig niji wai yah an nuarin inig et ti inwai iran, im naiyu u nij alupas an pece ihlup.

³ Etpu eti aplan nesganimta atimi iji ig era alum itai ara, etpu atahaijeg itai intikga atimi iji ig era ahgei itai ara.

⁴ Etpu aktaktai inliinmopoi ilpu atimi ahnag um ato itai, erupu anivaktit tas a ilpu atimi tas taliek.

⁵ Uhpu eti lep ika et atimi upene a natimi auatatimi, um eti ika et atimi ahtai itai a natimi meteug.

⁶ Erupu idim asaig intas has a ilpu atimi auatatimi, erupu anacanac an nedo acalacal an liinmopora ara, erupu lep ago nedo has ara, um asaig intas ahcil vai Ihova, mika eri imiaaij nitai caig vai ilpu atimi ehtele ra ara, um atipagki nitai umnyi vai ilpu atimi ahvig wai.

⁷ Et lep has nedo o ilpu atimi meteug: era anacanac an nedo efaifa ara, mika eri auahas vai intas ahcil ilpu atimi er ehcerucai ra, era wat asuptecnaig namen ura a ilpu atimi ihki atimi.

⁸ Ja era anacanac an nedo upene a ilpu atimi ahtai itai mika eri ahtai itai; erupu amen aktit ara an nedo upene ura.

⁹ Akumu atidai aijaua um atahaijeg nohrak, ak ilpu takata eti aktaktai itai; akumu atgeig pam intikgamia aijaua, ak ilpu takata eti imtitai itai.

¹⁰ Etu wit ti pan itac inmesese inyi ethi im lep hal adiat, akupu eucjeucjeucaij aijaua, ak ilpu takata eti imtitai itai: inyi idim ti nohwai vaine, uhpu eti asjapicnaig nohwai itai.

¹¹ Akumu eucjeucjeucaij aijaua, ak ilpu takata eti aktaktai itai; akumu amaamai aijaua, ak ilpu takata eti imtitai itai: atipagki apelumai itac iramia, udei inlepei ache, um ahid napelumai uucai an wauahid unyimia.

¹² Erupu ahpoi ritira ara vai niji ahapol upene, im lep vai niji vaine oho alupas.

¹³ Etpu ededel niji itai upunupun im nadoni an pece u ilpu atimi unyak; etpu idim ededel ijinies irai iji eom er amen upene iran an maliyum inig er imiacitak iran:

¹⁴ vaig inig nikavaig, etpu umaruma nimnim atimi; etpu ahyuahyu inmaliyum inig eris amen iran natimi is ahinag; etpu eteuc nedoon im neom ias uri mai ij irai iji mesese erupu merit vaig niji togke aleg, erupu edo iran niji pak irai siip;

¹⁵ um yetpan an nopan iyehki uhpu atladwi iraija Nesgan Upene, etpu ahes jipagko aien; etpu lep obohtan upene namasacen, uhpu lep ika et idivaig nesei nobohtan upene.

¹⁶ Erupu amen an namasacen a ilpu atimi upene, erupu lep amen an nobohtan upene a ilpu atimi ago nedo atoh.

¹⁷ Etpu eteuc nigpa, nimtan nedo atoh nigki; etpu eteuc natumop im namen upene, nohwai nedo atoh nigki.

¹⁸ Erupu amen a ilpu atimi unyak irai imnim igpa, im lep irai eom ehehtin, im lep irai uarin atumop upene iran;

¹⁹ etpu alupas nehio, um auahas nesei; uhpu lep auahas ehni inmaliyum.

²⁰ Eka mun ahesmoij aijaua eka ahwaig upsiitai unyimia aijaua irai ohmai wai asega, um ika eri atga iran kurimatau im togke.