Aiseya 31 - Intas Etipup

Nuarin tas alupas 31.

1 Et asuptecnaig a naprofeta nedo ahnag esjilid ura par asgeig irai nup Ijipt, um udei Atua. 6 Et ahugni ra aien mika eri adumoij pam an liinmopora ara. 8 Et ika aien uhpu auahas nup Asiria.

¹ KAIHEUC vai ra sji igki era asuol pan Ijipt ara par ahilek atimi atau imi ra; era asgeig irai hors ara, era asgeig irai pak irai hors ara, nikavaig, era ahinag ara; im lep irai ilpu atimi ateuc irai hors, nikavaig, era emda acen ara; ja era eti aespan Atua Upene u nup Isreel ara, era lep eti ahilek Ihova ara!

² Ja et lep arapakau aien, et imiapam niji itai has aien, et eti atipagki intas o un aien: et atidai aien par aru nedo o ilpu atimi auatatimi, im lep par atapnes natau vaig u ilpu atimi ago nedo has.

³ Era atimi ache a nup Ijipt, jam eti Atua; et ohu itai ache niji hors ura, jam eti esgai itai: etpu lep ada nikman a Ihova, erupu epihtau a ilpu atimi atau imi ra, erupu lep eropropse a ilpu atimi eris atau ra, uhpu ehrauahas ra asega.

⁴ Im lep inig, is idim ika ehelek a Ihova, Et wat ilmu a laion ka laion emda irai ohu itai is arop iran aien, el era asjapicnaig a ilpu atimi asgi siip et ahinag par ahau yin, etpu eti imtitaig nohrara aien, um eti ago nedo upoupo vai naunyauwaig ura: et idim uco, etpu asuol sepam a Ihova emda acen par ati nedoa an nedoon Saion, im lep an nau iran.

⁵ Etpu aibuthan nup u Jerusalem a Ihova emda acen, et idivaig era ae ijinies ira asiom ura niji man; etpu aibuthan ra aien um imiaras ra; etpu ahtaregdei ra aien um imiatamaig ra.

⁶ Akumu adumoij pam aijaua ehelen eris idim imipalea alupas intas o un a nup Isreel.

⁷ An nadiat iyehki erupu idim erekhaigse niji atmasimai silver ura natimi asega, im lep niji atmasimai colt ura, akis mun ago vai caua irai ikmamia aijaua, mika aki ago nedo apat vaig.

⁸ Erupu eti auahas nup Asiria natimi an nedoa; erupu eti atgei ra a ilpu eucsupo an nedoa: ja erupu aha ara an nedoa va Atua, erupu aheca u Atua a ilpu eucsupo esjilid ura.

⁹ Erupu auatialidi ara vai nimtitaig ura, erupu imtitaig nitai ahlaig a ilpu atimi alupas o un: et uce intas o Ihova inig, et eteuc incap o un Saion, im nehpanitai o un Jerusalem.