Aiseya 30 - Intas Etipup

Nuarin tas alupas 30.

1 Et asuptecnaig ehele atimi nedemda u Atua a Aiseya va nedo ura, par asgeig irai nup Ijipt, 8 um amcel vai intas o Atua. 18 Nedo aiheuc u Atua vai nup an nakalasia o un. 27 Nedemda u Atua, im nimiacitak u ilpu atimi o un, an nauahas vaig u nup Asiria.

¹ ET ika a Ihova, Kaiheuc vai ilpu atimi imipalea, era asan tas anacanac ara, ja et eti ahes irak; era ahod tah napelumai ara, ja et eti ahes an Nesgak Upene nedo inigki, mika eri aketo ara um ago nedo has:

² era atga ara alaig asuol an pece Ijipt, ja era eti ahodaig intas ehelek ara; mika eri emda ara an nemda u Fero, um asgeig irai nup Ijipt par atau imi ra!

³ va nitai inigki akupu ehcamai aijaua va nemda u Fero, etpu ehioehio inliinmopomia aijaua, mika akis asgeig irai nup Ijipt aijaua par atau imi caua.

⁴ Vaig inig nikavaig, era amen Soan a ilpu atimi alupas o un, um yetpan Tahapanes a ilpu atimi ehced o un.

⁵ Era ehcamai ara asega vai nup uran pece inig era auatialidi ara par atau imi ra, era eti atau imi ra ara, era idim takitai ache ara, era ehcamai vai ra ara, um ohocred.

⁶ Nitai ahelwei u niji itai eklim edo irai pece an namasacen nigki; an pece inig et eteuc nohocred im nehioehio inliinmopoi atimi iran, et ahes eahki laion itu im laion tupko, im lep vaiper im nimyeuv cap et adia, erupu apos naga ura ara irai euhli togke emda, im inpadiaig ura irai cehe kamela, imi nup uran pece inig era auatialidi ara par atau imi ra.

⁷ Etpu takitai natau imi ra u nup Ijipt, maiya, etpu idim takitai: va nitai inigki ek ahlaig ainyak vai nedo inigki, um ika, Nemda ura nigki mika eri tup eklim amen ara.

⁸ Va nitai inigki namu apan aiek, um aged intas inigki an hat an nuhup ura, maiya, namu aged aiek an nitaasviitai, mika yi amen an taka opan um yetpan irai iji mesese:

⁹ nikavaig, era idim atimi imipalea ara sji igki, im ilpu atimi ahcil, im ilpu atimi esjum par atahaijeg intas alep o Ihova:

¹⁰ era ika ara ehele ilpu atimi alum itai, Akumu jim alum itai aijaua; im lep ehele ilpu profeta, Akumu jim asuptecnaig intas atoh ehelema aijaua, akumu asaig intas updak ehelema aijaua, um asuptecnaig intas efaifa:

¹¹ akumu udei nedo inigki aijaua, um jim atga an nefalaig inigki, akumu ika aijaua inyi eti amen an nuhup unyima a Atua Upene u nup Isreel.

¹² Va nitai inigki et ika a Atua Upene u nup Isreel, Vaig inig nikavaig, eka mun atladwi intas inigki aijaua, um asgeig an nehcerucai atimi im nimipalea um eteuc iran:

¹³ va nitai inigki etpu eteuc iramia nedo has inigki, et idivaig inuarin has an nathatahau ijinies et idrinidrin, etpu auroauro um echedeliek an nuarin nadiat dikjai.

¹⁴ Et mun oplecoplec et idivaig nipjihat; et mun oplecoplec ehni: uhpu eti ecetai irai iji uarin oplecoplec tah inuarin par apos tah inmehlin cap iran an mun uum, ka par ahcale inwai iran an nehpanitai.

¹⁵ Et idim ika a Natimarid Ihova, Atua Upene u nup Isreel; El eka adumoij pam aijaua um atumop, uhpu imiatamaig caua; el eka amen igpa aijaua um asgeig irak, akupu emda aijaua: ja akis esjum aijaua.

¹⁶ Akis ika aijaua, Oʼo; ecrupu aha irai hors aijama; va nitai inigki akupu aha aijaua: akis lep ika aijaua. Ecrupu ateuc irai hors athut aiheucaiheuc aijama; va nitai inigki erupu athut aiheucaiheuc a ilpu atimi ahau caua.

¹⁷ Erupu aha natimi inyi wun dausant vai intas eduahpan u natimi inyi ethi; akupu aha aijaua vai intas eduahpan u natimi inyi faiv: um yetpan an nopan iyehki akupu echim amen aijaua et idivaig nauincai aduwi an lolan nau, um idivaig nitai ahlaig an lolan nedoon.

¹⁸ Va nitai inigki etpu aitgaig a Ihova, mika yi aiheuc vai caua, etpu lep atidai aien, mika yi imialep caua: et Atua asjaaicnaig atoh a Ihova: era mun ahesmoij ara sji igki asega era aitgaig yin ara.

¹⁹ Erupu amen Jerusalem a nup u Saion: akupu eti lep ehtigtaig aijaua: aku wit ahlaig ijinies aijaua, etpu aiheuc alupas vai caua aien; etu wit ahgei aien, etpu adai intas unyimia aien.

²⁰ Etpu alaamia a Natimarid nitai caig an nohocred, im inwai ehcerucai atimi, ja erupu eti lep atpuh a ilpu atimi esege unyimia, akupu lep almoi ilpu atimi esege unyimia aijaua:

²¹ akupu atahaijeg intas o un tah aijaua an cehemia, um ika, Nefalaig mun igki, akumu atga iran aijaua, aku wit ahidai caua an matamia aijaua, im lep aku wit ahidai caua an mauumia aijaua.

²² Akumu auahas nitap u nitai adahpoi niji atmasimai silver unyimia aijaua, im lep incedpun natmasimai colt unyimia: akupu erekhaigse aijaua et idivaig nitai er amcel vaig; akupu ika aijaua, Ecra esjum vaig aijama.

²³ Etpu alupai caua incopda aien vai nupsiitai unyimia, eka ahwaig an nobohtan aijaua; im lep nitai caig inig et ahes an nobohtan, etpu adale um alupas: an nopan iyehki etpu edo niji itai eklim edo irai pece unyimia an lelitai alupas.

²⁴ Im lep inig, kurimatau iji igki im togke emda iji igki era atau um acujitai an nobohtan ara, erupu caig nitai caig upene inig ara, eris irara an nitai irara im nitai eucjeucjaig.

²⁵ An nopan iyehki uhu wit atgei atimi inyi ahinag, um lep uhu wit alcapdicraig niji eom ijinies, etpu eteuc niji eucse wai im niji wai yah irai iji au ijinies asega, im lep irai iji edoon ijinies asega.

²⁶ Im lep inig, an nopan iyehki etu wit arore inuarin et has u ilpu atimi o un a Ihova, um ika yi ma inmocop eris ati ira ra, etpu idivaig inlah u nagesega inlah u inmohoc, etpu eceseven lah nagesega, et idivaig inlah irai adiat et seven.

²⁷ Akumu almoi aijaua, et ahes itac acen nidai Ihova um apam, et ere intavaitap o un, et aridjipan alupas nadrancap iran: et ohua nedemda an nipjineucsen, et idivaig incap atnamud itai intas o un:

²⁸ etpu idivaig inwai yah et ahgarero a Nesgan, par atiakoai um yetpan an nauinwa atimi, par irara nup urai iji pece an nitai irara ahcil: etpu eteuc braitel irai ahpai atimi par imiahnag ra.

²⁹ Akupu acesaces nohranitai aijaua, et idivaig an nepig iyehki et eteuc nasjapicnaig itap; etpu imiacitak inliinmopomia aijaua, et idivaig tah et atga ahlai natarau aien mika yi apan an nedoon u Ihova, Atua emda acen u nup Isreel.

³⁰ Etpu ika a Ihova eri ahgei nohran esjilid, etpu ika aien eri ecetai nauud ra u nikman, im lep intavaitap alupas o un, im nalaume u uncap et atnamud itai, im nimtinjap, im nehio, im incopda hat.

³¹ Etpu auahas nup Asiria a Ihova an nohran, etpu auud ra aien an nelop o un.

³² Im lep inig, irai iji opan etu wit auud ra a Ihova an nelop o un, is upyi ati vai ra, uhpu auud elcau um atcei harp: etpu ati nedoa vai ra aien um auhaig yi amud ra.

³³ Vaig inig nikavaig, eris ati Tofet itu acen; maiya, eris ago vai natimarid iyehki; is ika a Atua yi ubo, is ika aien yi hare: et iji iran incap im incai et ahinag; et adnan cap a Ihova, et idivaig narekwas et yah nahlai o un.