Aiseya 3 - Intas Etipup

Nuarin tas alupas 3.

1 Et esjilid namen has ura, ja et ahes irai edo has ura. 9 Et imtedoa nesganimta atimi. 12 Era ehcerucai atimi a ilpu, atirai alupas ura, et lep kos ira ra itai. 16 Neruvaig eai nijinies u inliinmopoi ilpu takata.

¹ VA nitai inig, nikavaig, et atipagki enele nup u Jerusalem, im lep ehele nup u Juta a Natimarid, Ihova esjilid acen marom, niseuc im nitai asgeig iran, nitai asgeig iran asega vai nitai caig, im nitai asgeig iran asega vai inwai,

² natimi alupas, im neucsupo, im natimi tas alep, im natimi esege, im natimi arapakau, im natimi ato itai,

³ im natimi alupas ira atimi et fifte, im natimi inig er ecen vai yin, im natimi asuptecnaig itai, im natimi amarero par ago itai, im natimi arapakau par araces.

⁴ Ekpu ikni ilpu dualep ainyak, mika eri ilpu atimi alupas ura, eri lep esjilid ira ra a ilpu halav.

⁵ Erupu ehcerucai ra jipe natimi asega: etpu ago nedo imipalea a nadualep vai natimi alupas o un, um uce natimi ihkin natimi vai natimarid o un.

⁶ Va nitai inigki etpu apan tah natimi um asjiraig etwan an nimnim u etman, um ika, Et eteuc napelumai unyum, namu atimi alupas unyima aiek, um atau irama an namen has uja inigki:

⁷ ja etpu asan tas emda aien an nadiat iyehki, um ika, Inki eti atimi imiatamaig caua ainyak; et ti nitai caig ka napelumai an nimnim unyak: namu jim ati nyak aiek mika ki atimi alupas irai atimi.

⁸ Era idim epihtau a nup u Jerusalem; era mun eropropse a nup u Juta: vaig inig nikavaig, era asan tas has vai ihova ara, um ago nedo has vai yin, par imiisjis vai nesganimtan upene.

⁹ Et asuptecnaig nedo ura nesganimtara ara; era asuptecnaig nedo has ura ara et idivaig nup u Sotom, era eti adahpoi ara. Kaiheuc vai nesgara! era mun ago nitai has vai ra ara.

¹⁰ Akumu asaig aijaua ehele ilpu atimi upene, mika etpu upene namen ura: erupu idim hegaig nohwan nedo ura ara.

¹¹ Kaiheuc vai ilpu atimi auatatimi! etpu has namen ura: eri alupai ra neruvaig nauritai irai ikmara.

¹² Kaiheuc vai ilpu atimi unyak! era ehcerucai ra a ilpu halav, era esjilid ira ra a ilpu takata. Ak ilpu atimi unyak, era imiahnag caua a ilpu atimi atau iramia, um auahas nefalaig iji ig eka atga iran aijaua.

¹³ Et atidai a Ihova mika yi imiisjis va atimi aieu, et lep aiji aien mika yi almaijidjid nup uran pece o un aien.

¹⁴ Etpu ara nedo o ilpu atimi alupas ira atimi o un a Ihova, im lep u ilpu atimi esjilid ira ra: eka mun caig nokoro vaine unyak aijaua; et amen irai eom unyimia niji itai eris atoraliak irai ilpu ihki atimi.

¹⁵ Et ika a Natimarid Ihova esjilid acen, Eka a uri aijaua par ehtipidai atimi unyak, um ehtoplecoplec nesganimtai ilpu ihki atimi?

¹⁶ Im lep inig, et ika a Ihova, Vaig inig nikavaig, et ijinies inliinmopoi ilpu takata Saion, et opra nauinwara, et lep ahilek nedo has nesganimtara an natga ura; era atga ara, um eliaujai aiheucaiheuc, et idivaig inmotjai bel tintin inmotjan neduora:

¹⁷ va nedo inigki et ika a Natimarid etpu ehlijijei nidjini ilpu takata Saion, et lep ika a Ihova eri tup atga ara.

¹⁸ An nadiat iyehki etpu iknipagki niji itai eklim upene a Natimarid, niji bel haklin irai eduora, im niji apelumai yecrei ra, im niji itai et idivaig inmohoc,

¹⁹ im niji itai ahnaig, im niji itai ethado, im niji apelumai adahpoi nesganimtara,

²⁰ im niji cat adgaig ijinies ura, im niji atauhat va neduora, im niji itai ahid ura, im niji hubej uri nitai auanipin upene ura, im niji taijeg ura,

²¹ im niji itai asjaaicnaig ura, im niji epit ura,

²² im napelumai ugyitugyit ura, im niji apelumai uhup ura, im niji apelumai itac ura, im niji cat haklin ura,

²³ im niji itai naunau ura, im niji apelumai yilyil ura, im niji cat adgaig ura, im niji apelumai esjilid ura.

²⁴ Erupu eti auanipin upene ara, ja etpu eteuc inmocop epiv ira ra; erupu eti aso ra ara ira apelumai upene, ja ira apelumai has; erupu eti yecrei numri nidjinira ara, ja erupu igpet ara; erupu eti ahid apelumai ura ara, ja erupu aso ra ara ira apelumai uucai; etpu eti eklim upene nesganimtara ara, ja uhpu etneijijei nesganimtara ara an cap.

²⁵ Uhpu atgei ilpu atamaig unyimia irai auitoga, im ilpu atimi emda unyimia au nedoa.

²⁶ Erupu taig afakatotau ara, um ehtigtaig irai eucse athatahau; erupu echim amen ara, um ateuc au nobohtan.