Aiseya 29 - Intas Etipup

Nuarin tas alupas 29.

1 Neruvaig alupas u Atua irai nup u Jerusalem. 7 Era eti geije a ilpu atimi tak atimi ira ra. 9 Et eti eteuc lelra a nup u Juta. 13 Et esjilid, nedo efaifa ura. 18 Intas upyi asaig mika eri ago upene ilpu atimi ecen va Atua.

¹ KAIHEUC vai nup Eriel, Eriel marom, inmaliyum inig is amen iran a Tevit! Uhmu ehcil inmesese an mesese; etmu lep eteuc niji asjapicnaig u atimi et idivaig itu.

² Ja ekpu auoh ohocred nup Eriel ainyak, etpu eteuc nohocred im nehtigtaig, etpu idivaig Eriel imi nyak inmaliyum, inigki.

³ Ekpu ati nedoa vai caua ainyak, um arehed iramia, um imiisjis ehelemia irai ilpu eucsupo, um imiaridjai niji edoon par aat iramia.

⁴ Uhpu imiasuol caua, etpu ahes an nobohtan intas unyimia, etpu upoupo intas unyimia um ahes an mah, etpu idivaig nohrai atmas nohramia um ahes an nobohtan, akupu tas ilohol aijaua, etpu lep ahes an mah intas unyimia.

⁵ Erupu idivaig inmah aiheucaiheuc a ilpu atimi irai taka pece unyimia et ahinag, um idivaig narasi itai et ahlaadaig nimtinjap a ilpu atimi er imtitaig alupas vai ra et ahinag: etpu eteuc nitai inigki an nopan ipjidipjid um auroauro.

⁶ Etpu ahes ehele Ihova esjilid acen um ateghe ra inmunuka, im nomoi, im inmotjai itai alupas, im incopda alupas, im nehio, im nalaume u incap atnamud itai.

⁷ Erupu idivaig numjeg ahnag im nitai ahuumtidec an nepig a nup urai elcau asega et ahinag, era ati nedoa vai nup Eriel ara, maiya, ara asega era ago nedoa vai inmaliyum iyehki, im lep vai niji uarin emda iran, um ehcerucai atimi iran.

⁸ Im lep inig, et wat umjeg ahnag a natimi ahvig nitai caig, um ika et hag aien; ja et wat aiji lahlah aien et lep ehtele yin aien: et wat lep umjeg ahnag a natimi ahvig wai, um ika et umnyi inwai aien; ja et wat aiji lahlah aien et lep auatialidi aien um ahvig wai: erupu idim uce a nup urai elcau asega et ahinag, era ati nedoa vai nup uran nedoon Saion ara.

⁹ Etmu eas jipe inliinmopomia aijaua, um imiali; akumu imiacitak aijaua, etmu apat nesganimtamia aijaua: era ahnag ara, jam eti vai waina; era atga autatautat ara, jam eti vai kava.

¹⁰ Et mun idim atladwi nesgai numjeg asega iramia a Ihova, um atapnes nesganimtamia: et mun adahpoi ilpu profeta aien, im ilpu atimi alupas unyimia, ilpu atimi alum itai marom.

¹¹ Et eteuc iramia intas ahuumtidec asega et idivaig intas an nitaasviitai inig eris atapnes, era alupaig tah et ethi ara et ato intas aged aien, um ika, Namu idim esvi intas inigki aiek: ja et ika aien, Et ehka vai nyak; er idim atapnes:

¹² era lep alupaig tah et ethi et eti ato intas aged aien nitaasviitai ara, um ika, Namu idim esvi intas inigki aiek: ja et ika aien, Ek eti ato intas aged ainyak.

¹³ Is ika a Natimarid, Vaig inig nikavaig, era apam ubutpotet ehelek a nup igcaki an nipjineucsera, um imiahpas nyak an tas ura, ja era ati itac acen vai nyak inliinmopora ara, era lep ecen vai nyak ara vai intas alep u ilpu atimi iji ig era esege imi ra ara:

¹⁴ va nitai inigki akumu almoi aijaua, ekpu lep ago nitai inig ainyak vai nup igcaki eri imiali vaig, maiya, eri imiali alupas vaig, etpu esjilid: etpu tiih narapakau u ilpu atimi arapakau ura, etpu idim tiih nanaclelen u ilpu atimi anaclelen ura.

¹⁵ Kaiheuc vai ra sji igki era apan ubo ara mika eri adenaig intas anacanac ura vai Ihova, era ago niji auritai ura ara an napat, um ika, Et alum caija a di? et ato caija a di?

¹⁶ Nedo ahnag unyimia nigki. Et tup ethi ache a natimi ago ipjiitai im intan apol, ka oʼo? et ehka va nitai inig eris ago par ika va natimi ago, Is eti ago nyak aien: et lep ehka va nitai inig eris ago upene par ika va natimi ago upene, Et eti ato aien.

¹⁷ Inyi idim eti laulau, etpu idivaig nahapol aiyu nau Lebanon, etpu lep idivaig nesei nahapol aiyu.

¹⁸ An nopan iyehki erupu ahgei intas an nitaasviitai a ilpu atimi ucjipines intikgara, erupu alum itai a ilpu atimi apat nesganimtara, et wat ti pan itac napat im inmehcim.

¹⁹ Erupu imiacitak alupas Ihova a ilpu atimi upoupo, erupu lep cediaig va Atua Upene u nup Isreel a ilpu ihki atimi.

²⁰ Vaig inig nikavaig, er arahon ilpu atimi ehcerucai atimi, era tiih a ilpu atimi imiafakahcil, er auahas ilpu atimi asega eris aitgaig vai nopan ago nedo acalacal ara:

²¹ era ika ara et atimi auatatimi tah vai tup intas o un et ethi ache; era ati nitai apro atimi ara vai yin et auud yi aijiraig intas ura an nasjapicnaig u atimi, um imiahnag ilpu atimi upene an nedo efaifa ura.

²² Va nitai inigki et tas ehele ilpu mapoi Jekob a Ihova, aien aigki is imiatamaig Ebraham aien, um ika, Eri eti lep ehcamai a ilpu mapoi Jekob, inyi eti lep acen nesganimtara.

²³ Ja etu wit almoi ilpu mapon ehelen aien, ek mun ago ainyak, erupu imiahpas nidak ara, maiya, erupu imiahpas nidai Atua upene u ilpu mapoi Jekob ara, erupu ecen vai Atua u nup Isreel ara.

²⁴ Erupu ato narapakau a ilpu atimi et ahnag inliinmopora, uhpu lep esege imi ilpu atimi tas upoupo.