Aiseya 28 - Intas Etipup

Nuarin tas alupas 28.

1 Et acaiji nup Ifreem a Aiseya va nijinies u inliinmopora im nedo ahnaig ura vai kava. 5 Uhpu imiaridjai nahri atimi an nelcau u Kristo. 7 Et acaiji nedo maumau ura aien. 9 Et ehka par esege imi ra. 14 Era tup amen ara um eti imtitaig. 16 Et asan tas upyi asaig aien vai Kristo inhat ededuon inveijec. 18 Uhpu ahilek intup amen ura. 23 Et ahugni ra aien mika eri aktaktai nesege arapakau u Atua.

¹ KAIHEUC vai ilpu atimi umnyi waina irai nup Ifreem, et idivaig incat adgaig esjilid inmaliyum ura, um idivaig intisiancai et imlai namen upene ura; kaiheuc vai ilpu atimi ahnag vai waina era amen irai iskanse aiyu iji ehki!

² Akumu almoi aijaua, et eteuc ehele Natimarid tah et emda aien um alupas, et mun ethaigse an nobohtan incat adgaig iyehki aien an nikman, et idivaig incopda hat alupas, im nehio inig et auahas itai, et lep idivaig inwai yah alupas et yiat et ehka par atapnes.

³ Uhpu auwihise irai eduei atimi incat adgaig ijinies u nup Ifreem, era umnyi alupas waina ara.

⁴ Etpu idivaig inhupnan nateg intisian et imlai, nitai yecrei ra marom, nitai eklim upene inig et amen an niskanse aiyu; et wat easpan tah um ecetai, et wat asjiraig an nikman aien, et alapau iran aien um atleg.

⁵ An nopan iyehki etpu cat adgaig eklim upene a Ihova esjilid acen, um korona naunau, imi ilpu ahri ilpu atimi o un.

⁶ Etpu lep ika aien yi eteuc upene lelra ara era ateuc ara par tas alep, um lep yi eteuc nemda imi ra era imiadumoij pan nedoa um yetpan an neucse athatahau.

⁷ Im lep inig, era mun ago nedo acalacal ara sji igki vai waina, era mun ahnag ara vai kava itoga; era mun ago nedo acalacal a ilpu atimi ahlap im ilpu profeta vai kava itoga, eris auahas ra vai waina, eris imiahnag ra vai kava itoga; eris wat asuptecnaig intas o Atua ara eris tas maumau ara, eris wat tas alep ara eris ago nedo acalacal ara.

⁸ Et ohua niji itai alo im niji itai emig irai itai hag asega, et eti adicinadicin tah inuarin.

⁹ Etpu asuptecnaig itai aien ehele di? etpu ika aien ehele di eri atahaijeg nesege ara? ra sji igki marom eris atwan nided imi ra, im lep ra sji igki eris iknipagki ra irai adai risra.

¹⁰ Eris idim ika eri asaig intas ehele ra, um aketo um tas; eris idim ika eri acaiji ra, um aketo um acaiji ra; idim inuarin tas tintin igcaki, im lep inuarin tas tintin eahki:

¹¹ etpu idim tas ehele nup igcaki aien irai tas taliek im lep irai tas an taka pece.

¹² Is idim ika aien, Natumop nigki, akumu ati natumop imi ilpu atimi auatialidi aijaua; namen upene nigki: ja eris esjum ara par atahaijeg.

¹³ Is um eteuc intas o Ihova ehele ra et idivaig tah is asaig intas ehele ra aien, um aketo um tas um lep tas ehele ra; um idivaig tah is acaiji ra aien, um aketo um acaiji ra um lep acaiji ra; idim inuarin tas tintin igcaki, im inuarin; tas tintin eahki; mika eri apan ara, um eropropse itac, va uhpu ehtoplecoplec ra, um apro ra, um arop ira ra.

¹⁴ Va nitai inigki akumu atahaijeg intas o Ihova aijaua, ak ilpu atimi imipalea, eka ilpu atimi alupas aijaua u nup igcaki era amen Jerusalem ara.

¹⁵ Vaig inig nikavaig, eka ika aijaua, Ecra mun asaig intas etipup ehele Inmas aijama, um asaig intas jipe im Umaatmas; etu wit ahced inpece nitai auahas atimi um ataluopni, etpu eti yetpam irama; vaig inig nikavaig, ecra mun ika aijama yi uarin atpuh iran vai cama intas ahcil, ecra mun lep atpuh aijama an nedo efaifa:

¹⁶ va nitai inigki et ika a Natimarid Ihova, Akumu almoi aijaua, ek ati inhat ainyak Saion, inhat upene, inhat esjilid, an nesvi va neom, an nededuon et ipjin: aien et asgeig iran aien inyi eti fi auroauro aien.

¹⁷ Ekpu almaijidjid ainyak um ago nedo atoh, et idivaig natimi inig et ati inya im inhat asjaaicnaig aien: etpu ahrei intapin ahcil incopda hat, etpu ahgarero inuarin atpuh iran ura niji wai.

¹⁸ Uhpu ohpodohpod intas etipup unyimia ehele Inmas, inyi eti amen aktit intas akis asaig jipe aijaua im Umaatmas; etpu ahced inpece asega unyimia um apaahni nitai aredei caua, akupu lep amen aijaua va uhpu auwihise caua.

¹⁹ Etu wit ahced inpece nitai iyehki etpu imiapan caua: etpu idim ahced inpece irai iji uhialeg, an nadiat im lep an nepig: akupu ohocred aijaua par ato nesgan tas an tas inig aki atahaijeg vaig aijaua.

²⁰ Et ipjidipjid intinan vaig tah par asjeuc upene iran: et eti leucan nap umjeg vaig tah par adahpoi yin iran.

²¹ Etpu idim atidai a Ihova is idivaig an nedoon Perasim, etpu edemda aien is idivaig an niskanse Cibeon, mika yi ago nauritai o un aien, nauritai o un inig eri imiali vaig; mika yi ati neruvaig o un aien, neruvaig o un inig eri imiali vaig.

²² Va nitai inigki akumu jim imiafakahcil aijaua, vai yi jim emda niji itai arore caua: ek mun idim atahaijeg tah intas o Natimarid Ihova esjilid acen ainyak, mika eris anacanac an nauahas atimi an nobohtan asega.

²³ Akumu atgeig pam intikgamia aijaua, um atahaijeg nohrak; akumu ahgektit aijaua, um atahaijeg intas unyak.

²⁴ Et idim eti ucji ache nobohtan a natimi ahapol irai iji adiat, um ohuoplec niji moho au tan um ahumiaig.

²⁵ Et wat ahumian lapnan aien, et idim terimterim nariko aien, um asjaig nupsiitai acas, um ahwaig hwiit irai atah iran, im barle an nuarin eris asjaaicnaig vaig, im rai an nilpun nahapol o un.

²⁶ Et asuptecnaig upene ehelen a Atua o un, um esege imi yin.

²⁷ Er idim eti auwihise nariko irai itai auwihise iran, er lep eti arehed nitai arehed irai upsiitai acas; er idim auud nariko an niseuc, im nupsiitai acas an rancai.

²⁸ Er idim ohuoplec korn, er eti auwihise iran irai iji adiat; va nitai inigki er arehed an nitai arehed iran, ja er eti ohuoplec irai hors ura.

²⁹ Et lep ahes ehele Ihova esjilid acen nitai inigki, et esjilid nanaclelen o un, et lep alupas narapakau o un.