Aiseya 26 - Intas Etipup

Nuarin tas alupas 26.

1 Nohranitai nigki par ahugni atimi mika eri asgeig irai Atua ara, 5 va neruvaig o un irai ilpu atimi auatatimi, 12 im lep va naiheuc o un vai ilpu atimi o un. 20 Intas ated atimi mika eri aitgai Atua ara.

¹ AN nopan iyehki erupu acesaces nohranitai inigki ara an pece Juta; nikavaig, et emda inmaliyum uja; etpu imiatamaig caija a Atua et idivaig nathatahau im intapin.

² Akumu asalgei niji tapnes aijaua, mika eri apan anliin maliyum a nup urai elcau iji ig era upene ara um imiisjis ninveijec.

³ Ak Atua, napu ika aiek yi amen upene aien um igpa, et aktit inliinmopon aien; vaig inig nikavaig, et asgeig iram aien.

⁴ Akumu asgeig irai Ihova aijaua irai iji mesese: vaig inig nikavaig, et idivaig inhehteuc inyi eti lep ti a Natimarid Ihova.

⁵ Et mun imiasuol ra sji igki aien era amen an nuarin ijinies ara; etpu alcapdicraig inmaliyum emda aien; etpu idim alcapidcraig aien um yetpan an nobohtan; etpu ika aien yi jase um yetpan an nobohtan.

⁶ Etpu auwihise an neduon tah, maiya, neduei ilpu atimi ohocred, im ilpu atimi ihki atimi.

⁷ Et atoh nefalaig vai ilpu atimi upene: napu ahped nefalaig u ilpu atimi upene aiek, ak Atua upene.

⁸ Im lep inig, ecris aitgai euc aijama, ak Ihova, as wat aru nedo has u atimi aiek; is merit alupas inliinmopoma aijama vai nidam, im nitai imiehva euc vaig.

⁹ Is merit vai euc inliinmopok ainyak an nepig; maiya, ekpu ahilek euc ainyak an nesgak an nuhialeg: vaig inig nikavaig, etu wit yetpam neruvaig unyum an nobohtan, erupu ato nedo atoh a nup urai iji pece.

¹⁰ El er aiheuc vai ilpu atimi auatatimi, erupu eti ato nedo atoh ara: erupu ago nedo acalacal ara an pece lah, um esjum par aktaktai natimi alupas u Ihova.

¹¹ Ak Ihova, na adan nikmam aiek, erupu esjum ara par almoi: ja erupu almoi nemda unyum vai ilpu atimi unyum ara, um ehcamai vaig; maiya, etpu auahas ra incap u ilpu atimi tak atimi iram.

¹² Ak Ihova, napu ika aiek ecrupu amen upene aijama: vaig inig nikavaig, as mun ago niji auritai unyima asega vai cama aiek.

¹³ Ak Ihova Atua unyima, eris esjilid irama a ilpu atimarid, nai eche aiek: ja ecrupu imiahpas euc im lep nidam aijama um imihum pan.

¹⁴ Era emesmas ara, erupu eti lcp umumoh ara; era ilpu atmas ara, erupu eti lep anusjai ara: va nitai inigki na mun ateghe ra aiek um auahas ra, um ika inyi eti lep eteuc tah nitai imiehva ra vaig.

¹⁵ Na mun ika aiek eri ahinag a nup uran pece inigki, ak Ihova, na mun idim ika aiek eri ahinag a nup uran pece inigki: na mun ehvaig natimi alupas unyum aiek: na mun ikni itac acen niji ilpui pece asega unyima aiek.

¹⁶ Ak Ihova, eris ahilek euc ara an nohocred ura, eris alaigaheni adenaig ara as wat acaiji ra aiek.

¹⁷ Et wat opoc tah intakata, um ubutpotet u napos vaig inhal o un, et ahka aien, um aunyauwaig an nohocred o un; ecra idim uco aijama an nuhup unyum, ak Ihova.

¹⁸ Ecra mun opoc aijama, um ahka, ecra mun ohocred aijama, ecra mun apos itai aijama, ja et mun idivaig intakitai; et mun ehka vai cama par imiatamaig inpece unyima, um ika eri auatialidi nup urai iji pece.

¹⁹ Erupu anusjai a ilpu atimi emesmas unyum, ak Atua, erupu anusjai niji ohui atimi emesmas unyak. Akumu aiji lahlah aijaua um acesaces nohranitai, eka amen anliin tan aijaua: vaig inig nikavaig, et idivaig nopoigmul irai efelelicai nopoigmul unyum, ak Ihova, napu lep ika aiek yi asuol an nobohtan, yi lep asuol irai ilpu atimi emesmas.

²⁰ Im lep inig, ak ilpu atimi unyak, akumu apan irai uari iyum unyimia aijaua, um atapnes niji tapnes unyimia vai caua, um atpuh an nopan ipjidipjid, um yetpan an ti pan itac intavaitap u Atua.

²¹ Vaig inig nikavaig, et idim ahes an nuarin o un a Ihova um apam, mika yi aru nedo has ura irai nup urai iji pece: etpu asuptecnaig nobohtan ilpu atimi iji ig eris asjig has ra, um eti lep adahpoi ilpu atimi iji ig eris atgei atmas ra.