Aiseya 25 - Intas Etipup

Nuarin tas alupas 25.

1 Et imiahpas Atua a Aiseya va neruvaig nedo has u ilpu atimi auatatimi, 6 va niji itai imiatamaig ilpu atimi asgeig iran, 9 im lep va namen upene u ilpu atimi upene an nelcau u Kristo.

¹ AK Ihova, na Atua unyak aiek; ekpu imiahpas euc ainyak, ekpu asuptecnaig nidam ainyak; vaig inig nikavaig, as mun ago niji itai imiali aiek; et inveijec intas anacanac unyum itu acen, et eti ahcil tah intas unyum,.

² Na mun ika aiek yi idivaig nijih ohok inmaliyum iyehki; eri alcapdicraig inmaliyum emda: inyi imnim atimi vai ilpu atimi irai taka pece inmaliyum iyehki; uhpu eti uctaig irai iji mesese.

³ Va nitai inigki erupu ecen vai euc a nup urai pece esjilid, erupu imiimtacimtac euc a nup uran maliyum irai pece er imtitaig alupas vai ra.

⁴ Ak Atua, as maliyum emda aiek vai ilpu atimi ihki atimi, inmaliyum emda vai ilpu atimi auatialidi an nohocred ura, im nuarin atpuh iran va nehio, im naiyu vai nihlup, et wat idivaig nehio an nathatahau nedemda u ilpu atimi er imtitaig alupas vai ra.

⁵ Napu imiasuol ilpu atimi irai taka pece aiek era aunyauwaig ara, et idivaig et wat tintin nihlup an pece inig et agesega alupas iran; uhpu imiasuol ohranitai u ilpu atimi er imtitaig alupas vai ra, et idivaig et wat tintin nihlup va naimoc an nepig.

⁶ Etpu auanetha alupas a Ihova esjilid acen an nedoon inigki vai nup urai iji pece asega irai itai hegaig esjilid, im nide vaine esjilid; maiya, niji itai hegaig esjilid, um ahinag nidipiaig, im nide vaine esjilid eris ahrei upene,

⁷ Etpu auahas aien an nedoon inigki nitai adahpoi inigki er adahpoi nup urai iji pece asega iran, im lep napelumai inig er ahled irai nup urai elcau asega,

⁸ Etpu atleg inmas aien um esjilid iran; etpu yiri mese idiimtara irai esgaiimta atimi asega a Ihova Natimarid; etpu atipagki intas auoh ehcamai ilpu atimi o un aien an uobohtan asega: vaig inig nikavaig, et mun asaig a Ihova.

⁹ Im lep inig, erupu ika ara an nopan iyehki, Almoi, Atua uja mun igki; inta mun aitgaig yin akaija, etpu imiatamaig caija aien: Ihova mun igki; inta mun aitgaig yiu akaija, intumu imiacitak akaija um cediaig va nimiatamaig caija o un.

¹⁰ Etpu idim amen nikmai Ihova an nedoon inigki, uhpu auwihise nup u Moab ithan, et idivaig er auwihise nefelelicai an netpin inig et ohok.

¹¹ Erupu ehevehev nikmara ara an nuarin juju, et idivaig et ehevehev nikman ero a natimi agag mika yi agag: ja etpu imiasuol nijinies u inliinmopora a Atua, im lep niji auritai efaifa irai ikmara.

¹² Etpu alcapdicraig aien nuarin emda an neom ijinies irai athatahau unyimia, um imiasuol, um atise an nobohtan, idim an nobohtan.