Aiseya 24 - Intas Etipup

Nuarin tas alupas 24.

1 Neruvaig esjilid u Atua an pece. 13 Erupu imiahpas yin a ilpu ahri atimi um imiacitak. 16 Etpu imiaridjai nelcau o un a Atua an neruvaig o un.

¹ ALMOI, et auahas inpece a Ihova, um ika yi ahyuahyu, etpu imijatpu aien, etpu lep imiterimterim ilpu atimi amen iran aien.

² Im lep inig, erupu idivaig tup atimi a ilpu atimi ahlap ura; erupu idivaig ilpu aheca ura a ilpu atimi alupas; erupu idivaig ilpu atahig ura a ilpu takata esga atimi; erupu idivaig ilpu atimi auarimtai itai a ilpu atimi ahtai itai; erupu idivaig ilpu atimi lucsei itai a ilpu atimi atcijaig itai; erupu idivaig ilpu atimi alupai nimtan vai mune a ilpu atimi leh nimtan vai mune.

³ Etpu ahyuahyu ehni inpece, uhpu auahas ehni: et mun idim asaig intas inigki a Ihova.

⁴ Et mese inpece um imlai, era auatialidi a nup urai pece um areci, era auatialidi a ilpu atimi alupas an pece.

⁵ Era mun auahas nitap an pece a ilpu atimi amen iran; vaig inig nikavaig, eris mun atladwi intas alep u Atua ara, um atipagki intas itap o un, um auahas intas etipup inyi eti lep ti o un.

⁶ Va nitai inigki et auahas inpece intas ahlaijaig, im lep inig, eris ika eri leh neruvaig a ilpu atimi amen iran: va nitai inigki eris atnamud nup urai pece, era amen iran natimi et eti elpat.

⁷ Et taigtaig nide vaine mat, et imlai vaine, era ededaijai ra ara asega et imiacitak inliinmopora.

⁸ Er eti lep auud elcau, et tiih nohrai ilpu atimi imiacitak, er eti lep atcei harp.

⁹ Erupu eti umnyi waina ara um acesaces nohranitai; etpu acen kava itoga vai ilpu atimi umnyi.

¹⁰ Eh mun alcapdicraig inmaliyum ahyuahyu: eh mun atapnes neom asega, et ehka vaig tah par apan iran.

¹¹ Er ugyi waina irai efalaig; et apat nimiacitak asega, et idim tiih incediaig an pece.

¹² Et ahyuahyu inmaliyum asega, er alcapdicraig ehni neucse nathatahau.

¹³ Etpu idim uco an niblan nobohtan ehele nup urai iji elcau, et idivaig inwud yi eucreucraig incai oliv, et lep idivaig naldei negai vaine era wat asjapicnaig ehni nohwai vaine ara.

¹⁴ Erupu ahlaig ijinies ara, erupu acesaces nohranitai ara, erupu ahlaig ijinies an jap ara va natimi alupas u Ihova.

¹⁵ Va nitai inigki akumu imiahpas Ihova aijaua an ridjai o un, um imiahpas nidai Ihova Atua u nup Isreel irai hakli pece an jap.

¹⁶ Inta mun atahaijeg ohranitai akaija et ahes an tid an nobohtan, nikavaig, intas imiahpas ilpu atimi upene. Ja kis ika ainyak, Awe! awe! kaiheuc vai nyak! era ago nedo efaifa a ilpu atimi efaifa; maiya, era idim ago nedo efaifa esjilid a ilpu atimi efaifa.

¹⁷ Ak nup uran pece, et eteuc iram nitai imtitaig vaig, im nehpanitai, im napro itai.

¹⁸ Etpu idim uco, aien et aha aien vai nohrai itai imtitaig vaig etpu etjose an nehpanitai aien; im lep aien et ahes an nehnise u nehpanitai aien um aridjai uhpu asjiraig yin an nitai apro itai: vaig inig nikavaig, eh mun asalgei nohatag ijinies, et mun amaamai nededuon nobohtan.

¹⁹ Eh mun ohuoplec ehni nobohtan, eh mun ahtagrei ehni nobohtan, et omoi alupas acen nobohtan.

²⁰ Et aedyaui nobohtan, et aedyaui et idivaig natimi ahnag vai kava, et amaamai et idivaig intinan tah er aijcei; et opoc iran neruvaig nedo has u atimi iran; etpu eropse, jam eti lep atidai.

²¹ Etpu lep idim uco an nopan iyehki, etpu aru nedo o ilpu atimi alupas a Ihova an namen esjilid ura, im lep nedo o ilpu atimarid irai iji pece an nobohtan.

²² Uhpu asjapicnaig ra eri atamerit et idivaig ilpu atimi er arore ra an nehpanitai, uhpu lep atapnes ra anliin neom ipjin, ja etu wit ti pan itac niji adiat inyi ahinag uhpu ateghe ra.

²³ Etpu yag inmohoc, etpu auoc nagesega, vaig inig nikavaig, et atimarid a Ihova esjilid acen an nedoon Saion, im lep an maliyum Jerusalem; et lep eteuc natimi alupas o un an nuhup u ilpu aheca o un.