Aiseya 23 - Intas Etipup

Nuarin tas alupas 23.

1 Uhpu auahas nup u Tairus eri lep ohocred ara. 17 Erupu lep adumoij pan ara um amen upene.

¹ INTAS vai nup u Tairus nigki. Akumu aunyauwaig aijaua, ak ilpu atimi aheled irai elcau Tarsis; eh mun auahas inmaliyum, et eti eteuc tah neom, et eti eteuc tah nafaiava: er asuptecnaig ehele ra an pece Kitim.

² Akumu atahaijeg aijaua, ak nup urai alvipece; er ikni itai imi caua a ilpu atimi ahtai itai Saiton, era atga an jap ara.

³ Is amen an jap alupas nupsiitai u Saihor, is alupas nitai caig ura eris leh an nofowai Ijipt; eris ahtai itai Tairus a nup urai iji pece.

⁴ Akumu ehcamai aijaua, ak nup u Saiton: era mun tas a nup u unjap, maiya, era mun tas a nup uran maliyum u unjap, um ika, Ecra eti ahka aijama, um eti apos ilpu halav, ecra eti alaa ilpu takuras nitai caig aijama, um eti aminjinaig ilpu atahig.

⁵ Eru wit ahgei a nup Ijipt, erupu ohocred ara vai intas vai Tairus.

⁶ Akumu ahapan Tarsis aijaua; akumu ehtigtaig aijaua, ak nup urai alvipece.

⁷ Inmaliyum imiacitak unyimia nigki, ka oʼo, eris atupun itu acen? uhpu imiapan ra itac acen, erupu atga ara mika eri auanaheca eahki ara.

⁸ Et mun anacanac an nedo inigki vai nup u Tairus a di, nup an maliyum esjilid, era atimarid a ilpu atimi ahtai itai iran, era atimi esjilid an nobohtan a ilpu atimi auarimtai itai iran?

⁹ Et mun anacanac iran a Ihova esjilid acen, mika yi auahas niji itai esjilid asega, um imiasuol ilpu atimi alupas asega an nobohtan.

¹⁰ Akumu ahced inpece unyimia aijaua et idivaig nofowai, ak nup u Tarsis: et eti eteuc tah nitai atapnes caua.

¹¹ Is ada nikman aien an jap, is imiamaamai nup urai iji elcau aien: is asan tas alep a Ihova vai inpece Kenan, mika eri alcapdicraig niji maliyum iran.

¹² Is um ika aien, Akupu eti lep imiacitak aijaua, ak nup u Saiton, er uhup um ehcerucai caua: akumu atidai aijaua, um atga an jap, um yetpan Kitim; akupu lep eti atumop eahki aijaua.

¹³ Almoi inpece u nup u Kaltia; eris eti eteuc itu acen natimi iji igki, eris ati inpece inigki a nup Asiria vai nup uran namasacen: era mun imiatidai eom eas atimi iran ara, era mun ahugni atimi amen irai eom esjilid iran ara, era mun auahas ehni inmaliyum Tairus ara.

¹⁴ Akumu aunyauwaig aijaua, ak ilpu atimi aheled irai elcau Tarsis: eh mun alcapdicraig inmaliyum emda unyimia.

¹⁵ An nopan iyehki eri eti imiehva nup u Tairus irai mesese inyi sevente, et idivaig niji adiat irai natimarid et ethi: ja etu wit ti; pan itac inmesese inyi sevente, erupu acesaces nohranitai a nup u Tairus et idivaig nohranitai u intakata has.

¹⁶ Namu leh harp aiek, um atga jipe an maliyum, ak intakata has eris eti imiehva euc; namu ahlai upene aiek, um acesaces nohranitai inyi ahinag, mika eri imiehva euc.

¹⁷ Im lep inig etu wit ti pan itac inmesese inyi sevente, etpu ateghe nup u Tairus a Ihova, erupu lep adumoij pan u nauarimtai itai upene ura ara, erupu lep ahtai itai jipe ara im nup urai iji pece asega an nobohtan.

¹⁸ Etpu itai itap vai Ihova naga ura im nimtan ura: erupu eti ikni itai ura ara um eti imiaaij; ja erupu ati naga ura ara vai ilpu atimi iji ig era amen an nuhup u Ihova ara, mika eri hag ara um geije, eri lep aso ra ira apelumai upene ara.