Aiseya 21 - Intas Etipup

Nuarin tas alupas 21.

1 Et wat taigtaig a naprofeta va namen has u nup uran pece o un an taka pece, er ehvaig ehelen nahuumtidec inigki, nikavaig, et ecetai aien mika era auahas ehni nup u Babelon a nup u Mitia im nup u Persia. 11 Era wat imiafakahcil naprofeta a nup Itom, et ated ra aien mika eri adumoij an liinmopora ara. 13 Nopan eris ati mika eri auahas nup Arebia.

¹ INTAS eduahpan vai nup u namasacen u unjap nigki. Et idivaig niji arakiraki an nuritoga, et auroauro um apam, um ahes an namasacen, inpece inig er imtitaig alupas vaig.

² Er ehvaig ehelek nahuumtidec ohocred vaig; nikavaig, et ago nedo efaifa a natimi efaifa, et atoraliak itai a natimi atoraliak itai. Akumu aridjipan aijaua, ak nup Ham: akumu ati nedoa aijaua, ak nup u Mitia; ek mun ika ainyak eri atinau nefadijai asega ura ara.

³ Va nitai inigki et emda asega inwauahid unyak: ek ohocred ainyak, et idivaig intakata ahka irai inhal o un: ek ahgei ainyak, et ehtipidai nyak; ek almoi ainyak um eucjeucjeucaij.

⁴ Et asjiasji inliinmopok ainyak, ek imtitaig alupas ainyak: et mun ika aien ki eucjeucjeucaij ainyak irai iji epig, nopan imiacitak unyak iyehki.

⁵ Er ati nitai hag, er ahled napelumai, era hag ara, um umwig: ja et ahlaig tah, um ika, Atidai aijaua, ak ilpu atimi alupas, um aspi niji itai ahtaipup unyimia.

⁶ Et uce intas o Natimarid ehelek, nikavaig, Apan aiek, um ati natimi eas atimi, etmu asuptecnaig aien nitai inig et ecetai aien.

⁷ El et ecet ilpu atimi ateuc irai hors aien, ero um ero ehni, im ilpu atimi ateuc irai togke, im ilpu atimi ateuc irai kamela, etmu ahgektit aien.

⁸ Is ahlaig ijinies aien et idivaig laion, um ika, Ak natimarid, ek aiji ainyak an neom eas atimi iran an nadiat asega, eh mun ati nyak an nuarin eas atimi iran irai iji epig.

⁹ Almoi! era ham a ilpu atimi ateuc irai hors, ero im ero ehni: is lep aketo aien um asaig, um ika, Er mun atoraliak inmaliyum Babelon, er idim atoraliak inmaliyum Babelon; et mun ahtagrei niji atmasimai asega u ilpu atmas ura aien an nobohtan.

¹⁰ Ak ilpu atimi unyak eris auud caua, ak ilpu hal unyak eris ikni caua an nuarin auud korn iran: ek mun asuptecnaig ehelemia ainyak nitai inig kis atahaijeg ainyak ehele Ihova esjilid acen, Atua u nup Isreel.

¹¹ Intas vai nup u Tuma nigki. Et ahlaig vai nyak tah an pece Sier, um ika, Ak natimi eas atimi, et echamecha vai itai an nepig? Ak natimi eas atimi, et echamecha vai itai an nepig?

¹² Et ika a natimi eas atimi, Et yetpam a nuhialeg, im lep nepig: el eka ahodaig aijaua, um idim ahodaig: akumu adumoij pam aijaua, um idim apam.

¹³ Intas vai nup Arebia nigki. Akupu amen aijaua irai lelitai an pece Arebia, ak nup u Titan, eka ehratga aijaua.

¹⁴ Era imiapan inwai a nup uraipece Tima um alumai ra sji ig era ahvig wai ara, era aubilid atimi aha ara um alaa ra nitai caig incara.

¹⁵ Vaig inig nikavaig, eris aha ara va nauitoga eris aihiaig, im lep va nefana eris aiyihi, im lep va nedoa er ohocred vaig.

¹⁶ Et uce intas o Natimarid ehelek, nikavaig, Etu wit ti pan itac yier inyi ethi, et idivaig niji yier u natimi auanaheca vai nimtan, etpu idim tiih natimi alupas asega u nup u Kitar:

¹⁷ etpu eti elpat nahri ilpu atimi atcijaig efana, ilpu atimi emda u nup u Kitar marom: et mun idim asaig a Ihova Atua u nup Isreel.