Aiseya 20 - Intas Etipup

Nuarin tas alupas 20.

Nitai asjaaicnaig nigki, nikavaig, va nedo o naprofeta er asuptecnaig nehcamai u nup Ijipt im nup Idiopia an nimiapan ra vaig an taka pece.

¹ AN nopan iyehki is yetpan inmaliyum Astot a Tartan, is wat abraig pan yin a Sarcon natimarid an pece Asiria, is ati nedoa vai nup Astot aien, um esjilid ira ra;

² an nopan iyehki is tas a Ihova ehele Aiseya inhal u Emos, um ika, Apan aiek um ahiyi napelumai uucai an wauahid unyum, um atipagki incedpun eduom. Is ago aieu is uce, is lep ahid lavalava ache aien, is lep ti incedpun eduon.

³ Is ika a Ihova, Is idim ahid lavalava ache irai mesese is dri a naheca unyak Aiseya um ti incedpun eduon, mika yi itai asjaaicnaig aien um lep nitai asuptecnaig vai nup Ijipt im lep vai nup Idiopia;

⁴ Etpu idim uco, etpu imiapan ilpu atimi eri arore ra u nup Ijipt, im ilpu ohna u nup Idiopia, a natimarid an pece Asiria, ilpu takuras im ilpu efatimi, eri ahid lavalava achearaum ti incedpoi eduora, jam idivaig atimi era tup atga ara, nehcamai u nup Ijipt nigki.

⁵ Erupu etehto ara um ehcamai vai nup Idiopia eris asgeig ira ra ara, im lep vai nup Ijipt eris imiacitak ra ara.

⁶ Erupu asaig jipe intas inigki a nup urai pece u unjap an nopan iyehki, Almoi nitai asgeig iran uja nigki, intis ahapan iran akaija par leh nitai atau pam iraija, mika eri imiatamaig caija va natimarid au pece Asiria. Intupu lep evahapan akaija?