Aiseya 19 - Intas Etipup

Nuarin tas alupas 19.

1 Namen has u nup Ijipt, 11 Nedo ahnag u ilpu atimi alupas ura,. 18 Er imiacaij nup Ijipt mika, eri up a,n nakalasia ara, 23 Intas etipup u nup Ijipt im nup Asiria, im nup Isreel.

¹ INTAS eduahpan vai nup Ijipt nigki. Almoi Ihova aijaua, et ateuc an nepig aien, et ae aiheucaiheuc aien, et lep apam an pece Ijipt aien: era amaamai niji atmasimai u nup Ijipt an nuhup o un, et lep auatialidi inliinmopoi nup Ijipt.

² Ekpu etinohun nehri jipe nup Ijipt ainyak: erupu ago nedoa ara, nikavaig, etpu ati nedoa tah vai etwan, im lep tah vai napa o un, im lep nup uran maliyum inyi ethi vai nup uran maliyum inyi eche, im lep nup uran nelcau inyi ethi vai nup uran nelcau inyi eche.

³ Etpu idim tiih lele nup Ijipt an nibla ra; ekpu atipagki narapakau ura ainyak: erupu ahodaig ilpu atmas ura ara, im ilpu atimi iji ig era tas ilohol ara, im ilpu atimi iji ig era ahu intas ira ra a ilpu atmas, im ilpu atimi iji ig era asaig vi opdicrai itai ara.

⁴ Et ika a Natimarid Ihova esjilid acen, Ekpu atise nup Ijipt ainyak an nikmai natimi alupas ura inyi ipjin aien; etpu esjilid ira ra a natimarid emda.

⁵ Etpu ame injap ura, etpu tiih nofowai um ame.

⁶ Etpu epiv niji ofowai; etpu tiih um ame niji eucse wai Ijipt: etpu imlai niji ieg im niji auwau.

⁷ Etpu etgig niji lelitai u nofowai, im lep irai ohmai wai, im lep niji ahapol asega u nofowai, uhpu terimterim iran, eri eti lep ecetai.

⁸ Erupu ehtigtaig a ilpu atimi ahilek mu, erupu aunyauwaig ara sji igki asega era atise incauaij an nofowai ara, erupu auatialidi ara sji igki era ana irai opoig an narasin wai ara.

⁹ Erupu ehcamai ara sji igki era ilahol upene irai va ara, im lep ara sji igki era ahod apelumai ahi ara.

¹⁰ Uhpu alcapdicraig niji oboatau ura, etpu ohocred inliinmopoi ilpu atimi asega era auaraheca ara vai nimtan.

¹¹ Era ilpu atimi ahnag ache a ilpu atimi alupas Soan, et maumau intas asuptecnaig u ilpu atimi asuptecnaig intas arapakau u Fero: eka a uri aijaua par ika ehele Fero, Ek mapoi ilpu atimi arapakau ainyak, ek mapoi ilpu atimarid itu ainyak?

¹² Era sji ek eda ara? ilpu atimi arapakau unyimia yek eda? erumu idim asuptecnaig ehelemia; ara, ka erumu idim ato ara nitai inig et mun anacanac a Ihova esjilid acen vai nup Ijipt.

¹³ Era ahnag a ilpu atimi alupas Soan, er imiahnag ilpu atimi alupas Nof; era mun ahiyek nup Ijipt a ilpu atimi alupas irai uari pece ura.

¹⁴ Et mun ati ehele ra inliinmopora ahnag a Ihova, era mun imiahnag nup Ijipt ara an nauritai ura asega, et idivaig natimi ahnag vai kava an nalo vaig o un.

¹⁵ Inyi eti eteuc tah nauritai an pece Ijipt, mika yi ago aieu et idivaig nipek u atimi aien, ka aien et idivaig neduon aien, ka aien et idivaig inrancai aien, ka aien et idivaig narasi itai aien.

¹⁶ An nopan iyehki erupu idivaig ilpu takata a nup Ijipt: erupu imtitaig ara um eucjeucjeucaij va nikmai Ihova esjilid acen, et auud ra iran aien.

¹⁷ Erupu imtitaig nup u Juta a nup Ijipt, ara asega era imiehva ra ara erupu imtitaig ara, van tas anacanac inig u Ihova esjilid acen, et anacanac ira ra aien.

¹⁸ An nopan iyehki erupu tas an tas Kenan a nup urai maliyum inyi faiv an pece Ijipt, um asig yi aktit intas enele Ihova esjilid zacen: uhpu anvi nidan et ethi par ika, Inmaliyum umaruma.

¹⁹ An nopan iyehki etpu eteuc natau vai Ihova juju an pece Ijipt, uhpu lep aduwi inhat vai Ihova an tid nan.

²⁰ Etpu eteuc vai itai asjaaicnaig im nitai asuptecnaig ehele Ihova esjilid acen an pece Ijipt: erupu idim ahlaig vai Ihova ara vai ilpu atimi ehcerucai ra, etpu lep abraig pan ehele ra aien natimi imicoho ra, natimi emda marom, etpu imiatamaig ra aien.

²¹ Uhpu ato Ihova an pece Ijipt, erupu ato Ihova a nup Ijipt an nopan iyehki, um aheca o un irai itai ahlap im nitai tup ahtai; erupu asan tas yi aktit ura ehelen ara, um ehneijid.

²² Etpu auud nup Ijipt a Ihova: etpu auud ra aien ja etpu ago cehcehe ra aien: erupu adumoij pam ehele Ihova ara, etpu at ahaijeg intas ura aien, um ago cehcehe ra.

²³ An nopan iyehki etpu eteuc nefalaig alupas, etpu ahes Ijipt um yetpan Asiria, erupu apan Ijipt a nup Asiria, um lep apan Asiria a nup Ijipt, erupu ehrauanaheca u Atua a nup Ijipt im nup Asiria.

²⁴ An nopan iyehki erupu idivaig nahaijin dirt a nup Isreel vai nup Ijipt im lep vai nup Asiria, nikavaig, nitai acis yi alwai ra an nobohtan.

²⁵ Natimi iji igki et mun asan tas acis yi alwai ra a Ihova esjilid acen, um ika, Erumu ahesmoij a nup Ijipt ilpu atimi unyak, im lep nup Asiria nauritai an nikmak, im lep nup Isreel ek ohuun ra ainyak.