Aiseya 18 - Intas Etipup

Nuarin tas alupas 18.

1 Etpu auahas nup Idiopia a Atua an naiheuc o un vai ilpu atimi upene. 7 Va nedo inigki erupu auata ahinag a nup an nakalasia o un.

¹ ATAHAIJEG aijaua, ak nup uran pece inig et amen niji pak irai lag an pece unyimia, eka amen aijaua an nahaiji ofowai Idiopia eahki:

² eka abraig pan ilpu atimi ehced an jap aijaua, im lep irai elcau auwau an narasi wai. Akumu apan aijaua, ak ilpu atimi athut, um apos intas ehele nup urai pece eris ahiai ra um ucsei ra, ehele nup uran nelcau eris imtitaig vai ra, ahes an namen uhup ura um imihum pam an nopan inig; ehele nup uran nelcau et esjilid nemda ura, era auwihise atimi ara, et atiakoai inpece ura niji wai.

³ Ak ilpu atimi asega an nobohtan, im natimi amen irai iji pece, etu wit imiaridjai nitai ahlaig aien irai edoon, akumu almoi aijaua; etu wit ahlai toho aien, akumu lep ahgei aijaua.

⁴ Et idim uce intas o Ihova ehelek, nikavaig. Ekpu atumop ainyak, ekpu almoi ainyak an nuarin amen unyak, et idivaig nihlup an nopan igpa irai ceslum, et idivaig nepig inig et ahes nopoigmul iran an nihlup u inlidija.

⁵ An nopan iyehki etu wit eti fi yetpam upene inlidija, etu wit ehcohos intisiai vaine, et wat yetpan an nopan ehla u intisian, et attai niji ran aien irai auitoga, et ahtaldei niji cauwan aien um iknipagki.

⁶ Uhpu udei ra va niji man aleg irai edoon, im lep va niji itai eklim edo irai pece aleg: erupu amen irai vaine iji ehki irai lidija niji man aleg, erupu lep amen iran irai mesese niji itai eklim edo irai pece aleg asega.

⁷ An nopan iyehki erupu imiapan nitai tup ahtai imi Ihova esjilid acen a nup urai pece eris ahiai ra um ucsei ra, nup urai pece eris imtitaig vai ra ahes an namen; uhup ura um imihum pam an nopan inig, nup uran nelcau et esjilid nemda ura, era auwihise atimi ara, et atiakoai inpece ura niji wai, an nuarin u nidai Ihova esjilid acen, nedoon Saion marom.