Aiseya 17 - Intas Etipup

Nuarin tas alupas 17.

1 Er eduahpan vai nup u Siria im, nup Isreel. 6 Eri udei nedo apat nahaiji ra. 9 Uhpu, auoh ohocred ra sji igki et eled va nedo imipalea ura. 12 Intas airu vai ilpu, atimi tak atimi u nup Isreel.

¹ INTAS eduahpan vai nup u Tamaskus nigki. Almoi, eh mun atipagki Tamaskus, et eti lep amen inmaliyum, et iji iran, eris alcapdicraig.

² Eris udei niji maliyum irai Aroer: uhpu ikni vai niji pak irai siip, erupu asjeuc eahki ara, inyi eti eteuc tah mika eri imtitaig vaig.

³ Etpu ti inmaliyum imi nup Ifreem, etpu ti natimarid imi nup u Tamaskus, im lep nahri nup u Siria: et ika a Ihova esjilid acen, Etpu ti natimi alupas ura, et idivaig et ti natimi alupas u nup Isreel.

⁴ An nopan iyehki etpu auatialidi natimi alupas u ilpu mapoi Jekob, etpu lep areci nemda alupas ura.

⁵ Etpu lep idivaig tah et asjapicnaig nohwai itai aien im korn meto, et lep ucsei negai korn aien an nikman; etpu idivaig tah et asjapicnaig negai korn aien an niskanse Rifeem.

⁶ Et ika a Ihova Atua u nup Isreel, Uhpu udei nahrin iran, et idivaig an nauhaig incai oliv, nikavaig, nohwan et ero ka et eseij an nilpun ran ijinies acen, im nohwan et for ka et faiv irai raicai oho.

⁷ An nopan iyehki etpu adumoij pan a natimi ehelen is ago yin, etpu anani nesganimtan aien irai Atua Upene u nup Isreel.

⁸ Etpu eti adumoij pan u natau iji ig is ago irai ikman aien, etpu eti aktaktai nitai iji igki is ago irai upsikman aien, nikavaig, niji atmasimai u Asterod, im niji atmasimai u nagesega.

⁹ An nopan iyehki etpu idivaig tah nitai er udei an nesei niji maliyum emda o un, um lep idivaig inrancai ijinies niji maliyum eris udei ara an nuhup u nup Isreel: etpu amasacen inpece.

¹⁰ Vaig inig nikavaig, eka mun ahnag ira Atua imiatamaig caua aijaua, um eti imiehva inhehteuc inig et ahes iran nemda unyimia, va nitai inigki akumu ago intinai itai eklim upene aijaua, um ahwaig niji raicai an taka pece iran.

¹¹ An nadiat ohwai itai unyimia akupu ago nirahed o un aijaua, im lep an nuhialeg akupu ago nupsiitai unyimia aijaua mika yi elwa: ja etpu ispun ti nohwan an nadiat u nohocred im nehtigtaig esjilid.

¹² Atahaijeg! nohrai nup urai elcau et ahinag nigki! era ahlaig ijinies ara et idivaig inmotjan jap; era auroauro a nup urai pece um apam, et idivaig inyah alupas u inwai et ahinag, era auroauro ara um apam.

¹³ Maiya, era auroauro a nup urai elcau et idivaig inyah alupas ui wai et ahinag: etpu acaiji ra a Atua, erupu lep ahapan itac acen ara, er ahau m, era idivaig narasi itai ara et ahlaadaig nimtinjap irai edoon, um lep idivaig nitai et atcelcal an narakiraki.

¹⁴ Et ehioehio inliinmopora ara an jupura; et wat eti fi yetpam nuhialeg era tup ispun atiih ara. Namen u ilpu atimi atoraliak itai uja nigki, im nimtan vai ilpu atimi auahas caija.