Aiseya 15 - Intas Etipup

Nuarin tas alupas 15.

Namen has u nup u Moab.

¹ INTAS eduahpan vai nup u Moab nigki; mika eri auahas nup Ar an pece Moab, um ika yi picritcat an nepig et ethi; mika eri auahas nup u Kir an pece Moab, um ika yi picritcat an nepig et ethi.

² Era aridjipan ara an neom itap, im lep i Taibon, niji uarin ijinies, mika eri ehtigtaig: era aunyauwaig a nup u Moab an maliyum Nibo, im lep an maliyum Meteba: et igpit nidjinira asega, eh mun ucsei ingeijira asega.

³ Era aso ra ara ira apelumai uucai irai efalaig ura: era aunyauwaig ara asega irai lola eom ura, im lep irai tiptag ura; era ehtigtaig ara an nasuol sepam ura.

⁴ Era ehtigtaig a nup u Hesbon, im lep nup Eliali: et yetpan Jehas nohrara: va nitai inigki era ehtigtaig a ilpu eucsupo u nup u Moab; et ehioehio inliinmopora ara.

⁵ Et taig ijinies inliinmopok ainyak vai nup u Moab; era mun aha a ilpu atimi ehcid ura um yetpan Soar, era aunyauwaig ara et idivaig kurimatau atahig et eteuc inmesese et dri iran: vaig inig nikavaig, aien et aridjipan Luhid aien um taig, et ubutpotet u naridjipan o un aien; era idim ahlaig ijinies ara va nauahas itai an nefalaig alaigpan Moroneem.

⁶ Et ame niji wai an Nimrim: et imlai nefelelicai, et mun tiih nomotmot, et eti edel tah nitai.

⁷ Va nitai inigki era algaunyi nofowai irai ahtaicai ara, um imiua pan nahrin ura eris ago ara, im niji itai ura eris asjapicnaig ara.

⁸ Vaig inig nikavaig, et ahparehed inpece Moab nehtigtaig ura; er atahaijeg naunyauwaig inigki um yetpan Eclcem, maiya, er atahaijeg naunyauwaig inigki um yetpan Bier-ilim.

⁹ Etpu ohua inja ira ra irai wai Taimon: ekpu aketo ainyak um imiapan niji itai has irai Taimon, im lep laion ehele nup u Moab eris aha, im lep ehele ilpu ahri atimi an pece.