Aiseya 14 - Intas Etipup

Nuarin tas alupas 14.

1 Et aiheuc vai nup Isreel a Atua um imiadumoij pam ra an pece ura. 4 Era esjilid irai nup u Babelon ara um imiacitak vaig. 24 Intas anacanac u Atua vai nup Asiria. 29 Er asan tas emda va nup u Filistia.

¹ ETPU idim aiheuc vai ilpu mapoi Jekob a Ihova, etpu lep aketo aien um ehtai nup Isreel, um ika eri amen an pece ura ara: erupu ehramen ehele ra a nup urai taka pece; erupu lep apol nai ilpu mapoi Jekob ara.

² Erupu lucsei ra a nup urai pece, um imiapan ra an pece ura: erupu ohuun ra a nup Isreel mika eri ilpu aheca atamaig im ilpu aheca atahig ara an pece u Ihova: erupu arop irai ra sji igki ara, eris arop ira ra ara; erupu lep esjilid irai ilpu atimi ehcerucai ra ara.

³ An nopan iyehki etpu ika a Ihova an atumop aiek va nohocred unyum, im lep va nehioehio u inliinmopom, im lep va naheca opoc as ago aiek,

⁴ napu acesaces nohranitai inigki aiek vai natimarid u nup u Babelon, um ika, Et echamecha et mun tiih a natimi ehcerucai caija! et mun tiih aien et imiacitak colt aien!

⁵ Et mun esvi niseuc u ilpu atimi auatatimi a Ihova, im nelop u ilpu atimi alupas.

⁶ Aieu aigki is auud nup urai iji pece aien jam eti atumop, is lep atimarid irai nup urai iji pece aien um edemda, er atmas piv vai yin, ja et eti atapnes tah.

⁷ Era atumop a nup uran nobohtan asega um igpa: era ahlaig ijinies ara um acesaces nohranitai.

⁸ Et lep imiacitak vai euc niji eijiv, im niji sitar Lebanon, um ika, Na idim asjeuc aiek, va nitai inigki inyi eti aridjipam ehelema tah natimi attai cai.

⁹ Era amaamai a nup uma atmas sepagko mika eri aubilid euc ara an napam unyum: er ahugni vai euc ilpu atimi emesmas esjilid, nikavaig, ilpu atimarid asega an nobohtan; er imiatidai jai ilpu atimarid asega u nup urai pece ira dorona ura.

¹⁰ Erupu tas ara asega, um ika ehelum, Na mun idim auatialidi aiek, um idivaig cama; na idim apapa pan irama aiek.

¹¹ Et mun asuol natimi alupas unyum um yetpan netheso, im lep nahlai u niji harp unyum: er ahled niji ija itham, et itai adahpoi euc niji imijan.

¹² Et echamehca na mun ahes an nohatag aiek um etjose, ak Katcapohod, inhal u nuhialeg! eris acaldei euc, na mun eropse an nobohtan aiek, as atimarid aiek um ehcerucai nup urai iji pece!

¹³ Ja as ika aiek an liinmopom, Inki aridjipan an nohatag ainyak, inki atijai dorona unyak ainyak ijinies irai moijeuv u Atua: inki ateuc ainyak an nedoon er asjapicnaig iran, irai ahaijin pece inig et ahes narutu iran:

¹⁴ inki aridjipan jipagko ainyak ijinies irai uarin u iji epig; inki ika ainyak ek idivaig Atua esjilid acen.

¹⁵ Ja uhpu imiasuol euc uma atmas, irai iji ehni an nehpanitai.

¹⁶ Ara erupu alum euc ara erupu aespam euc ara, um aktak-tai euc, um ika, Natimi iyehki mun igki, ka oʼo, is ika aien yi omoi nobohtan, is lep amaamai niji pece vai yin;

¹⁷ is ika aien yi idivaig namasacen nobohtan, is auahas niji maliyum iran aien, jam eti atcijaig ilpu atimi is arore ra aien mika eri apan irai iji pece ura?

¹⁸ Era asjeuc a ilpu atimarid u nup urai iji pece an natimi alupas ura, ara asega marom, irai etheso ura, athi um athi ehni.

¹⁹ Ja er ethaig pan itac euc et idivaig inrancai er amcel vaig, na eti amen an netheso unyum aiek, na idivaig napelumai u atimi eris atgei ra aiek, eris ahcai ra an nedoa, era asuol ara ui hat an nehpanitai; et idivaig nohui natimi mas er auwihise iran.

²⁰ Napu eti asjeuc ehele ra aiek an netheso ura, vaig inig nikavaig, as auahas inpece unyum aiek, as atgei atimi unyum aiek. Uhmu jim lep anvi nidai ilpu hal u ilpu atimi auatatimi um yetpan irai iji mesese.

²¹ Uhmu ika eri atgei ilpu hal o un va nedo has u etmara; erumu jim aridjai ara um ohuun nobohtan, um ika yi ohua niji maliyum an narasin nobohtan.

²² Et ika a Ihova esjilid acen,Ek-pu atidai ainyak um aat ira ra, um atipagki ehele nup u Babelon nidara, im ilpu hal ura, im ilpu mapora, im nahri atimi ura.

²³ Et lep ika a Ihova esjilid acen, Ekpu ika ainyak yi uarin amen iran u nekrei, etpu eteuc niji etpeiwai iran: ekpu ahrei Babelon ainyak an hudra auahas itai.

²⁴ Et mun asig yi aktit intas a Ihova esjilid acen, um ika, Etpu idim eteuc nitai inigki et idivaig intas upyi anacanac unyak; uhpu lep idim ati aktit nitai inigki et idivaig intas upyi anaclelek unyak: nikavaig,

²⁵ ekpu auoh oplecoplec natimarid u nup Asiria ainyak an pece unyak, inki auwihise yin ainyak irai lola edoon unyak: etpu tup tiih pan nitai ahelwei o un ira ra, etpu lep tiih pan nitai apos o un irai euhlira.

²⁶ Intas anacacnac nigki eh anacanac iran va nobohtan asega: im lep nikman nigki er atgeig yi apidi vai nup urai iji pece asega.

²⁷ Et mun anacanac nitai inigki a Ihova esjilid acen, etpu atipagki intas o un a di? nikman nigki er atgeig yi apidi, etpu lep imiaduumoij pan a di?

²⁸ ERIS asaig intas eduahpan inigki an mesese iyehki is mas iran a Ehas natimarid.

²⁹ Akumu jim imiacitak aijaua, ak nup u Filistia asega, vaig inig nikavaig, eh mun asvi niseuc o un is auud caua aien: etpu idim ahes ehele nimyeuv a nispeuv, etpu lep ahes ehelen nigki a nimyeuv cap et ae.

³⁰ Etpu hag a inhalav u nihkin natimi inmeto, etpu asjeuc upene a nihkin natimi: ekpu atgei neucvam ainyak vai numlaig has, etpu lep auahas nahrim aien.

³¹ Aunyauwaig, ak ilpu atimi an neucse nathatahau; ahlaig ijinies, ak nup uran maliyum; eka mun auatialidi aijaua, ak nup u Filistia asega: et ahes an narutu nadran cap um ehcohos pam, et eti melga tah irai ilpu eucsupo o un.

³² Uhmu asaig inhe ehele ilpu atimi imiabrai intas ehele nup urai pece? Uhpu asaig mika et mun ati aktit Saion a Ihova, erupu lep ahilek namen upene iran a ilpu atimi ohocred o un.