Aiseya 13 - Intas Etipup

Nuarin tas alupas 13.

1 Et asjapicnaig ilpu eucsupo o un a Atua va nedemda o un. 6 Et tas emda ehele nup u Babelon aien, um ika, eri auahas ra a nup u Mitia. 19 Etpu uarin ahyuahpu inmaliyum Babelon.

¹ INTAS eduahpan vai nup u Babelon nigki, is ahuumtidec iran a Aiseya inhal u Emos.

² Akumu aiyihi nitai ahlaig aijaua an lolan nau, ahlaig ijinies vai ra, akumu regeig irai ikmamia aijaua, erumu lep han ara irai iji eucse athatahau irai imnim u ilpu atimarid ura.

³ Ek mun tas alep ainyak ehele ilpu atimi iji ig kis ikni ra ainyak, mika eri atau nyak ara vai intavaitap unyak, maiya, ek mun ahlaig vai ilpu atimi emda unyak ainyak, ilpu atimi unyak marom era tas emda ara.

⁴ Er ahgei inmotjan nasjapicnaig u atimi irai iji edoon, et idvaig inmotjan natimi et ahinag; inmotjan nasjapicnaig u nup urai iji elcau im nup urai iji pece era asjapicnaig ara: et esiaig niji pak irai edoa o un a Ihova esjilid acen.

⁵ Era ahes an pece itac acen ara um apam, era ahes an tid an nohatag ara, nikavaig, Ihova im nij va atimi an nedemda o un, mika eri auahas inpece asega ara.

⁶ Akumu aunyauwaig aijaua; et idim ubupotet u nadiat u Ihova; etpu ham um idivaig nauahas itai vaig et ahes irai Atua emda acen.

⁷ Va nitai inigki etpu asjileuc nikma atimi asega, um auatialidi inliinmopoi atimi asega:

⁸ etpu ehioehio inliinmopora ara: erupu ohocred ara um ahka; et idivaig intakata an napos vaig inhal o un: erupu imiali jipe ra ara um imtitaig; etpu idivaig incap alaume nesganimtara ara.

⁹ Almoi, et ham nadiat u Ihova, er imtitaig vaig va nedemda im intavaitap ehri o un, mika etpu ahwai lelcai inpece: etpu lep auahas ehni ilpu atimi auatatimi iran aien.

¹⁰ Inyi eti ememina tah irai iji moijeuv asega an nohatag: etpu apat nagesega an ridjai o un, um eti alahala van mohoc.

¹¹ Ekpu ateghe nup uran nobohtan ainyak va nedo imipalea ura, um aru nedo has u ilpu atimi auatatimi; ekpu ika ainyak yi idim tiih nedo ijinies u ilpu atimi esjilid, ekpu lep imiasuol ainyak nimtakrei u nesgaiimtai ilpu atimi edemda.

¹² Ekpu ika ainyak eri eti elpat natimi et idivaig nuari colt esjiiid; um lep ika eri eti elpat a ilpu hal u atimi et idivaig colt et ahes Ofir.

¹³ Va nitai inigki ekpu ika ainyak yi amaamai nohatag, etpu lep omoi nobohtan um udei nuarin o un, an nedemda u Ihova esjilid acen, im lep au nadiat u intavaitap ehri o un.

¹⁴ Erupu adumoij pan ehele nup urai pece ura natimi asega, erupu lep aha pan an pece ura ara asega: et idivaig anin er ahau, um idivaig siip et eti asjapicnaig ra tah.

¹⁵ Vaig inig nikavaig, uhpu ahcai atimi asega eri ecet ra; uhpu lep atgei an nedoa atimi asega eri atau ra ara.

¹⁶ Uhpu auhaig yi oplecoplec ilpu hal ura an nuhup ura; uhpu atoraliak itai irai imnim ura, uhpu lep auahas ilpu ehnaa ura.

¹⁷ Almoi, ekpu ika ainyak eri aat ira ra a nup u Mitia; erupu eti aktaktai silver ara, erupu eti lep merit vai colt ara.

¹⁸ Etpu auhaig yi oplecoplec ilpu dualep niji cee efana ura; erupu eti aiheuc vai ilpu halav ara; etpu eti aiheuc vai ilpu hadi nesganimtara ara.

¹⁹ Uhpu auahas Babelon, inmaliyum esjilid irai elcau, inmaliyum eklim upene, era imiacitak a nup u Kaltia, uhpu auahas um idivaig Sotom im Comora is auahas a Atua.

²⁰ Eri eti amen iran natimi irai iji mesese, inyi ahyuahyu um yetpan irai iji opan: erupu eti athai eom apelumai ura eahki a nup Arebia; erupu eti ago irahed ura eahki a ilpu atimi asgi siip.

²¹ Erupu asjeuc eahki niji itai aleg irai amasacen; etpu ohua nalidmot irai eom ura; erupu amen iran niji ostrij atahig; erupu lep edo jipe eahki niji anin aleg.

²² Erupu aunyauwaig niji kuri aleg irai imnim u natimarid ura, im lep puse aleg irai tiptag ura er imiacitak iran: et ubutpotet u nopan o un, eri eti ika yi itu niji adiat o un.