Aiseya 12 - Intas Etipup

Nuarin tas alupas 12.

1 Era acesaces nohranitai a ilpu atimi imiisjis ninveijec, um ago naaurinig va nedo aiheuc u Atua.

¹ AN nopan iyehki napu ika aiek, Ak Ihova, ekpu imiahpas euc ainyak: as idim edemda vai nyak aiek, ja et mun tiih nedemda unyum, na mun ago eropse inliinmopok aiek.

² Almoi, et atimi imiatamaig nyak a Atua; ekpu asgeig iran ainyak, um eti imtitaig: et emda unyak a Natimarid, et ohranitai unyak a Ihova; et idim atimi imiatamaig nyak aien.

³ Va nitai inigki akupu imiacitak aijaua, um athoi wai irai ehpaiwai iji ig er imiatamaig caua vaig.

⁴ Akupu lep ika jipe aijaua an nopan iyehki, Akumu imiahpas Ihova aijaua, akumu arohwan nidan aijaua, akumu asuptecnaig niji auritai o un aijaua ehele nup urai iji pece, akumu asaig ehele ra mika et esjilid nidan.

⁵ Akumu acesaces nohranitai vai Ihova aijaua; vaig inig nikavaig, et mun ago niji itai esjilid aien: uhmu ato nitai inigki an nobohtan asega.

⁶ Akumu ahlaig ijinies aijaua um acesaces nohranitai, ak nup u Saion: vaig inig nikavaig, et esjilid a Atua Itap u nup Isreel et amen ehelemia aien.