Aiseya 10 - Intas Etipup

Nuarin tas alupas 10.

1 Er awe vai ilpu atimi ehcerucai atimi. 5 Era aru nedo o ilpu atimi efaifa a nup Asiria, ja uhpu auahas ra vai nijinies u inliinmopora. 20 Uhpu imiatamaig ilpu ahri nup Isreel. 24 Er ago eropse inliinmopoi nup Isreel vai intas upyi asaig mika eri imicoho ra vai nup Asiria.

¹ KAIHEUC vai ra sji igki era asan tas alep has ara, um aged intas ehcerucai atimi iji ig eris idim asaig ara;

² mika eri ago nedo acalacal ara vai ilpu ihki atimi, um atoraliak itai u ilpu atimi ohocred unyak, um iknipagki itai u ilpu takata eris emesmas a ilpu atumnyura, um lep lucsei naga u ilpu umnij!

³ Akupu ago inhe aijaua an nadiat aru vaig iran, im lep an nohocred unyimia inig etpu ahes itac acen? akupu aha ehele di aijaua par atau imi caua? akupu ikni niji itai upene unyimia aijaua eda?

⁴ El era eti atpuse ara ehele ilpu atimi iji ig er arore ra an nedoa, erupu eropropse ara ehele ilpu atimi iji ig er atgei ra. Et eteuc nitai iji igki asega, ja et eti imiadumoij intavaitap o un aien, et lep atgeig yi apidi nikman aien.

⁵ KAIHEUC vai natimarid u nup Asiria! et rancai u intavaitap unyak aien, et edemda unyak niseuc an nikman.

⁶ Ekpu abrai yin ainyak mika yi apan ehele nup uran nelcau efaifa, im lep ehele ilpu atimi iji ig ek edemda vai ra ainyak; ekpu asaig ehelen ainyak mika yi tup lucsei naga ura an nedoa aien, um atoraliak niji itai ura, um auwihise atimi et idivaig nosal irai efalaig.

⁷ Ja et eti uce intas o un, et lep eti uce naktaktai u inliinmopon; et ika inliiumopon aien yi auahas um iknipagki nup urai elcau inyi ahinag.

⁸ Vaig inig nikavaig, et ika aien, Et idim inveijec nigki, era idivaig ilpu atimarid a ilpu atimi alupas unyak.

⁹ Era idivaig nup u Karkemis a nup u Kalno; era idivaig nup Arpat a nup u Hemad; era lep idivaig nup u Tamaskus a nup u Sameria.

¹⁰ Ek mun idim asjiraig niji elcau u ilpu atmas an nikmak ainyak; is lep esjilid niji atmasimai ura irai iji atmasimai u nup u Jerusalem im nup u Sameria;

¹¹ ekpu idim ago nedo inig ainyak vai nup u Jerusalem im ilpu atmas ura, et idivaig ek mun ago ainyak vai nup u Sameria im ilpu atmas ura.

¹² Ja etpu idim ago ehni nauritai asega o un a Natimarid an nedoon Saion im lep Jerusalem, etpu lep aru nedo irai natimarid u nup Asiria a Ihova vai intas emda o un, im nijinies u inliinmopon, im nimtakrei u nesganimtan.

¹³ Et idim ika aien, Et mun ago nitai inigki ainyak an nemda u nikmak, im lep an narapakau unyak; ek idim arapakau ainyak: ek lep iknipagki niji atcai u nup urai elcau ainyak, um atoraliak niji itai ura eris ikni, um imiasuol nup urai iji pece et idivaig natimi emda:

¹⁴ ek mun asjiraig naga u nup urai iji elcau au nikmak ainyak: ek mun asjapicnaig nup uran nobohtan asega ainyak, et idivaig tah et asjapicnaig hakli man aien eris udei; is eti ecreiecrei nehpan tah, um eti asalgei nipjineucsen tah, um eti laav tah.

¹⁵ Etpu ika a inpas et esjilid irai natimi attai cai iran, ka oʼo? etpu ika nitai ucsei cai et esjilid irai natimi ucsei cai iran, ka oʼo? Oʼo, el et ago nedo inigki, etpu apos natimi inrancai, jam eti apos inrancai a natimi; etpu alcacsei natimi niseuc o un, jam eti alcacsei niseuc o un a natimi.

¹⁶ Va nitai inigki etpu ika a Natimarid, Natimarid esjilid acen marom, eri erek a ilpu atimi emda o un; etpu lep cas incap ithan natimi alupas o un et idivaig incap alaume.

¹⁷ Etpu idivaig incap alaume a Inlah u nup Isreel, etpu idivaig nalaume a Atua Itap o un: etpu ahli um atnamud niji cai upunupun im nefelelicai has u nup Asiria an nadiat inyi ethi;

¹⁸ Etpu auahas ehni aien niji itai upene asega an nesei o un, im numan et esjilid: etpu picritcat et idivaig natimi emehe.

¹⁹ Inyi eti elpat niji cai an nesei o un etpu eled, etpu tup upene vai inhalav nesvi vaig.

²⁰ An nopan iyehki erupu eti lep aketo a ilpu ahri nup Isreel, im ilpu mapoi Jekob eris eti emesmas, um asgeig iran is auud ra aien; ja erupu asgeig inveijec ara irai Ihova, Atua Itap u nup isreel.

²¹ Erupu adumoij pam a ilpu ahrin, ilpu ahri mapoi Jekob marom, ehele Atua emda acen.

²² El era idivaig nauanahvig an nohmunjap a ilpu mapoi Isreel, erupu adumoij pam a ilpu ahaiji ra ache: eris anacanac mika uhpu auahas ra, etpu ago nedo atoh aien um auahas alupas ra.

²³ Et idivaig intas anacanac o un, etpu auahas ra a Natimarid Ihova esjilid acen an nobohtan asega.

²⁴ Va nitai inigki et ika a Natimarid Ihova esjilid acen, Akumu jim imtitaig natimarid u nup Asiria aijaua, ak ilpu atimi unyak, eka amen Saion aijaua: etpu aredei caua an rancai o un aien, um alcacseijai niseuc o un ijinies iramia, is idivaig nedo o un vai nup Ijipt.

²⁵ Ja inyi eti laulau um tiih nedemda o un, etpu lep ehcohos intavaitap unyak par auahas ra.

²⁶ Etpu imiapam nitai aredei yin a Ihova esjilid acen et idivaig natgei nup u Mitian u nij Oreb: etpu lep ijinies an jap niseuc o im, etpu lep adaigjai niseuc o un aien is idivaig nedo o un vai nup Ijipt.

²⁷ Au nopan iyehki uhpu atipagki nitai ahelwei o un an neuhlim, im nitai arore o un an nauinwam, uhpu lep auahas nitai arore o im an narakei.

²⁸ Et mun yetpan Eaiad aien, et mun apan Maicron aien; et mun ikni niji padiaig o un Mikmas aien:

²⁹ era mun ahtaregdei nuarin ehka ara: era atumop Ciba ara; era eucjeucjeucaij a nup u Rema; era mun aha a nup u Cibea u Saal.

³⁰ Ahlaig ijinies aijaua, ak nup u Calim: atahaijeg aijaua, ak nup u Lees; kaiheuc vai caua, ak nup Anadod.

³¹ Era tup tiih a nup u Matmina; era auarahcil a nup u Cibim mika eri aha.

³² Ja etpu yetpan Nob inpig aien: etpu auhaig nikman aien va nedoon u nup u Saion, nedoon Jerusalem marom.

³³ Almoi aijaua, etpu acaldei inrancai esjilid a Natimarid, Ihova esjilid acen, etpu alupas inmotjan: uhpu attai niji cai ijinies, uhpu imiasuol incai iji ehki era ijinies acen.

³⁴ Etpu attai niji cai et ahinag an nesei aien an pas, etpu eropropse niji cai Lebanon van pas esjilid.