Aiseya 1 - Intas Etipup

Nuarin tas alupas 1.

Et asaig intas ehti a Aiseya vai nup u Juta va nedo imipalea ura. 5 Et imitaig ra aien va nohocred ura. 10 Et acaiji ra aien va nalaigaheni asega ura. 16 Et ated ra aien mika yi eche inliinmopora ara, et lep asuptecnaig aien namen upene im namen has. 21 Et ehtigtaig aien va nedo has ura, um ika yi aru ira ra a Atua. 26 Et lep ika aien eri amen upene a ilpu atimi upene, 28 ja uhpu auahas ilpu atimi auatatimi.

¹ NITAI inig is ahuumtidec iran a Aiseya inhal u Emos nigki, is almoi aien vai nup u Juta im nup u Jerusalem, is wat umoh a Usaia, im Jodam, im Ehas, im Hesekaia, ilpu atimarid an pece Juta.

² Ak nohatag, namu atahaijeg aiek; ak nobohtan, namu ahgei aiek: et mun tas a Ihova, um ika, Kis mun alayi ilpu hal unyak nitai caig ainyak, um aminjinai ra; ja era mun imipalea intas unyak ara.

³ Et ato natimi ohuun yin a kurimatau; et ato a togke nelcau inig u natimi ohuun yin er ati nitai caig incan: ja era eti ato nyak a nup Isreel, era eti aktaktai, vai nyak a ilpu atimi unyak.

⁴ Kaiheuc vai caua, ak ilpu atimi auatatimi, et ehtipidai caua nedo has unyimia; eka ilpu hal u ilpu atimi imipalea aijaua, et eheshas nedo unyimia: era mun udei Ihova ara; era mun auahas inliinmopoi Atua Upene u nup Isreel ara; era mun adumoij pan itac ara.

⁵ Et eteuc inuarin inig iramia eda par aketo um aredei caua iran, mika akupu lep aketo aijaua, um imiapalea intas o un et emehe nidjinimia asega, et lep auatialidi inliinmopomia asega.

⁶ Et eti upene tah inuarin nohun inigki, ahes an nugnyan neduon um yetpan an nidjinin; ja et eteuc inmocop iran, im inuarin inig et opapig vai inja iran, im nugnyan naredei tupko: eh mun eti avise iran, um eti arore iran, um eti aspi iran an narakei.

⁷ Et idivaig namasacen inpece unyimia, eh mun atnamud niji maliyum unyimia: era auahas umamia a ilpu atimi an taka pece an nuhup unyimia; et amasacen, um idivaig inpece inig eris auahas a ilpu atimi an taka pece.

⁸ Et lep tup echim amen a inhalav atahig u Saion, et idivaig niyum wudig an nokoro vaine, et idivaig niyum araho an nahapol melone, um idivaig inmaliyum eris arehed iran a ilpu eucsupo, um yiat ira atimi.

⁹ El is eti udei nahaiji atimi eti elpat vai caija a Ihova Atua esjilid acen, ele tis idivai nup u Sotom akaija, um lep idivai nup u Comora.

¹⁰ Ak ilpu atimi alupas an pece Sotom, akumu atahaijeg intas o Ihova aijaua; ak nup u Comora, akumu imiaiji intas alep u Atua uja aijaua.

¹¹ Et ika a Ihova, Et eti upene irak niji itai ahlap et ahinag unyimia: ek geije ainyak irai itai ahlap atnamud irai siip atamaig, im nagako irai kurimatau alupas; ek eti merit ainyak vai inja irai kurimatau, im hakli siip, im nanin atamaig.

¹² Eka wat ehcohos pam aijaua mika aki aiji an nuhup unyak, et mun abrai caua a di par ago nedo inigki, um auwihi niji uarin itap unyak?

¹³ Akumu jim lep imiapam aijaua, niji itai tup ahtai iji ig et takitai ache; ek amcel vai nitai auanipin upene unyimia ainyak; ek esjum ainyak va nasjapicnaig unyimia irai iji upyi het im lep irai adiat atumop; et edo has nasjapicnaig unyimia vai nalaigaheni.

¹⁴ Et acen inliinmopok ainyak va nasjapicnaig unyimia irai iji upyi het, im lep irai opan eris ati: et itai ahelwei imi nyak nitai iji igki; et lep esvi nyak nitai iji igki.

¹⁵ Aku wit ada nikmamia aijaua, ekpu adahpoi nesganimtak ainyak vai caua: maiya, aku wit ecahinag alaigaheni aijaua, ekpu eti atahaijeg caua ainyak: eka mun atgei atmas atimi et ahinag aijaua.

¹⁶ Akumu yiri caua aijaua; akumu ago adicinadicin caua aijaua; akumu ati itac acen nedo has unyimia aijaua an nuhup unyak; akumu udei nedo maumau aijaua;

¹⁷ akumu ato aijaua par ago nedo upene; akumu ahilek nedo atoh aijaua, um imiatamaig ra er ehcerucai ra, um imiaras ilpu umnij, um atau irai ilpu takata iji ig era emesmas a ilpu atumnyu ra.

¹⁸ Et ika a Ihova, Akumu apam aijaua, mika ti tas jipe akaija: el etidivaig napelumai cap nedo has unyimia, etpu ahi um idivaig sno; el et idivaig napelumai cap eijilid, etpu ahi um idivaig numri siip.

¹⁹ El eka atahaijeg aijaua um imiaiji intas o Atua, akupu hegaig itai upene an pece inigki aijaua:

²⁰ ja el eka esjum aijaua, um imipalea intas o Atua, uhpu auahas caua an nedoa: et mun idim asaig intas inigki a nipjeneucse Ihova.

²¹ Et echamecha, et idivaig intakata has inmaliyum inveijec? is ohua nedo upene iran; is amen iran nedo atoh; ja era amen iran a ilpu atimi atgei atmas an nopan inig.

²² Et mun ohok silver unyum; er ago pelaig nide vaine unyum an wai:

²³ era atimi imipalea a ilpu atimi alupas unyum; era atau imi ilpu atimi atoraliak itai ara; era merit va niji itai tup ahtai ara asega, um ahilek nimtan: era eti imiatamaig ilpu umnij ara, et eti yetpan ira ra jutas ugyi ra u ilpu takata iji ig era emesmas a ilpu atumnyura.

²⁴ Va nedo inigki et ika a Natimarid, Ihova esjilid acen, Atua emda u nup Isreel marom, Kaiheuc vai ra, ekpu atcijaig ilpu atimi tak atimi irak ainyak; ekpu aru nedo o ilpu atimi edemda vai nyak ainyak.

²⁵ Ekpu imiadumoij pam nikmak ehelum ainyak, um atnamud pikgaig nohok unyum, um atipagki nitai has asega unyum:

²⁶ ekpu imiadumoij pam ilpu atimi tas alep unyum ainyak et idivaig au nopan uhup, im ilpu atimi tas jipe unyum et idivaig an nopan iyehki eris atupun itai iran: ja par apitac uhpu anvi nidam par ika, Inmaliyum inig er ago nedo atoh iran, inmaliyum inveijec.

²⁷ Uhpu imiatamaig nup u Saion an nedo atoh; uhpu imiatamaig ilpu atimi o un era adumoij an liinmopora ara an nedo upene.

²⁸ Im lep inig, au nopan et ethi uhpu auahas ilpu atimi imipalea im ilpu atimi auatatimi; uhpu auahas pikgaig ilpu atimi iji ig era atidjira ira Ihova ara.

²⁹ Erupu ehcamai ara vai cai alupas iji ig akis merit vaig aijaua; akupu ohocred aijaua vai nahapol iji ig akis leh aijaua.

³⁰ Akupu idivaig tah incai alupas aijaua et imlai niji erin, um idivaig tah nahapol et ti inwai iran.

³¹ Etpu idivaig nerid u uncat a natimi emda; etpu idivaig nisincai nauritai o un; erupu ehricas arau ehro, etpu eti ahni rau tah.