Niji auritai o ilpu Apostolo 9 - Intas Etipup

Nuarin-tas alupas 9.

¹ IS esjilid natmas o Saulo vai ilpu atimi alaigaheni o Natimarid, is ika aien yi atgei ra; is apan aien ehele natimi esjilid an nahlap,

² um ugni yin vai itasvitai imi ilpu atimi alupas Jutaia, eris amen Tamaskus ara, um ika, el et ecet tah aien nagovaig nedo ineigki, ilpu atamaig, ka ilpu takata, etpu arore ra aien, um imyiapan ra Jerusalem.

³ Is wat atga an nefalaig aien, wat ubutpotet pan Tamaskus, is idim ememina inlah an nohatag um arahed iran:

⁴ is eropse an nobohtan aien, um atahaijeg nohran tah, is ika ehelen, Ak Saulo, ak Saulo, na auri aiek par atmas vai nyak?

⁵ Is um ika aien, Aiek tah Natimarid a di aigko? Is ika a Natimarid, Ek Iesu ainyak, na atmas vai nyak aiek: et ehka vai euc natgaig pan itac vaig neduom irai idjai mopul.

⁶ Is um ucjucjucaij aien, um imtitaig, um ika, Ak Natimarid, nai merit aiek mika ki ago inhe ainyak? Is um ika ehelen a Natimarid, Atidai aiek, um apan an nuarin-pece ineig, uhpu asuptecnaig ehelum nitai ineig eris idim ika napu ago aiek.

⁷ Eris aiji a ilpu atimi ahced yin um eti liglig, eris atahaijeg nohran iyehki ara, jam eti ecet tah natimi.

⁸ Is um atidai a Saulo, um asalgei nesganimtan, jam eti alum atimi: eris atau an nikman ara, um imyiapan yin Tamaskus:

⁹ is eti fi alum itai aien an nadiat is eseij; is eti hag aien um eti umwig.

¹⁰ Is amen Tamaskus natimi alaigaheni is ethi, nidan Ananaias; is um ika ehelen a Natimarid an numjeg ahnag o un, Ak Ananaias. Is ika aien, Ainyak ap aigki, ak Natimarid.

¹¹ As um ika ehelen a Natimarid, Atidai aiek um apan an nefalaig ineig er anvi nidan par ika, Nefalaig atoh, um ahilek natimi et ethi nidan Saulo, nupu Tarsus, an neom o Jutas: et idim alaigaheni aien.

¹² (Is um umjeg ahnag aien, um ecet natimi et ethi, nidan Ananaias, napanvaig ehelen, um atijai nikman iran, mika yi lah nesganimtan aien.)

¹³ Is um ika a Ananaias, Ak Natimarid, kis atahaijeg ainyak intas o atimi is ahinag va natimi ineigki, im nedo has esjilid o un vai ilpu atimi upene unyum Jerusalem:

¹⁴ et mun lep apos pam intas alep o ilpu atimi ahlap esjilid aien, mika yi arore ra sji eigki asega aien igcaki era arohoan nidam ara.

¹⁵ Is um ika ehelen a Natimarid, Namu apan aiek: et ipjinitai ehtaig unyak aien, mika yi asuptecnaig nidak aien an nuhup o ilpu atimi aupat, im ilpu atimarid, im nupu Isreel:

¹⁶ ekpu asuptecnaig ehelen ainyak nohocred esjilid iji eig eris idim ika etpu leucse aien va nidak.

¹⁷ Is um apan a Ananaias, um han anliin neom, um atijai nikman iran, um ika, Ak etoak Saulo, et abrai nyak a Iesu Natimarid iyehki is ehcohos pan ehelum aien an nefalaig an napam unyum, mika yi lah nesganimtam aiek, um leh alupas Nesgan Upene.

¹⁸ Is um auroauro um meijisse itai an nesganimtan is idivai isjua: is idim lah nesganimtan aien; is um atidai aien, um leh nabaptiso iran.

¹⁹ Is hag aien, um emda. Is amen a Saulo ira adiat is eti elpat ehele ilpu atimi alaigaheni Tamaskus.

²⁰ Is auroauro aien um asuptecnai Kristo irai eom alaigaheni, um ika, et Hal o Atua aien.

²¹ Ja eris imyiali ara asega eris atahaijcg yin ara, um ika, Idim aien aigki is auahas ilpu atimi arohoan nidan ineigki Jerusalem aien, is lep ham aien igcaki va nitai ineig mika yi arore ra, um imyiapan ra ehele ilpu atimi ahlap esjilid.

²² Ja is esjiiid nemda o Saulo, is auud yapidai nupu Jutaia aien eris amen Tamaskus ara, is tas aien um ayapdicraig upene itai, um ika, et idim Kristo a natimi ineigki.

²³ ¶ Is wat ti pan itac nadiat is ahinag, eris tas jipe a nupu Jutaia mika eri atgei yin:

²⁴ ja is ato nedo ura a Saulo. Eris imyiiris yin ara an neucse nathatahau irai iji adiat im niji epeig, mika eri atgei yin.

²⁵ Eris imyiapan yin an nepeig a ilpu atimi alaigaheni, um aiyihise yin an yipin nathatahau an nefehcat.

²⁶ Is wat yetpan Jerusalem a Saulo, is ika aien yi apol pan irai ilpu atimi alaigaheni: ja eris imtitai yin ara asega, um eti asgeig iran, um ika, Et eti atimi alaigaheni aien.

²⁷ Ja is leh yin a Barnabas, um imyiapan yin ehele ilpu apostolo, um asuptecnaig ehele ra, mika is idim ehcohos ehelen a Natimarid an nefalaig, um tas ehelen: is lep tas emda aien Tamaskus an nidai Iesu:

²⁸ is amen aien ehele ra Jerusalem, um uhum jipe:

²⁹ is tas emda an nidai Iesu Natimarid aien, um asuptecnaig um imyiisjis ehele nupu Jutaia iji eig eris tas an tas Crisi ara: ja eris ahilek yin ara mika eri atgei yin.

³⁰ Eris wat ato a ilpu etoan, eris imyiapan yin Sisaria ara, um abraig pan yin Tarsus.

³¹ Eris adejai ra a nup an nakalasia an pece Jutaia asega, im Calili, im Samerya, eris lep aridjai ara; eris eklim tup amen ara um eccen vai Natimarid, um imyiacitak vai Nesgan Upene; eris eldati pan ara um ahinag.

³² IS apan a Pitrus irai iji uari-pece asega, ja par lep han ehele ilpu atimi upene eris amen Litta ara.

³³ Is ecet natimi is ethi aien eahki, nidan Inyas, is asjeuc aien an tinan irai mesese is eet, is emehe aien va napalse.

³⁴ Is um ika ehelen a Pitrus, Ak Inyas, et ago cehcehe euc a Iesu Kristo; atidai aiek, um ati nitai ahled unyum. Is auroauro aien um atidai.

³⁵ Eris ecet yin ara asega eris amen Litta ara im Seron, um ahidaig pan ra ehele Natimarid.

³⁶ Is amen Joppa intakata alaigaheni is ethi, nidan Tabida, nesgan tas ineigki Torkas: is ago niji auritai upene is ahinag aien im nedo aiheuc ta atimi.

³⁷ Is emehe aien an naopan iyehki, um mas: eris yiri yin ara, um ati yin an nuarin-neom ijinies.

³⁸ Is ubutpotet pan Litta Joppa, eris wat atahaijeg a ilpu atimi alaigaheni, nikavaig, is amen eahki a Pitrus, eris abraig pan ehelen natimi is ero ara um ugni yin, mika yi auroauro aien um apan ehele ra.

³⁹ Is um atidai a Pitrus, um ahced rau. Is wat yetpan aien, eris imyiapan yin ara an nuarin-neom ijinies: eris aiji a ilpu takata asega eris emesmas a ilpu atamnyura, um imyitaig yin, eris ehvaig ehelen ara inlepei iji eig im lep napelumai is ago a Torkas an namen o un ehele ra.

⁴⁰ Is abraig pok ijo ra asega a Pitrus, um atpuse, um alaigaheni; is ahidaig pan yin u nohun aien, um ika, Ak Tabida, atidai aiek. Is asalgei nesganimtan aien: is wat ecet Pitrus aien, um atidai.

⁴¹ Is arapse va nikman aien, um imyiatidai yin; is ahlaig aien vai ilpu atimi upene im ilpu takata eris emesmas a ilpu atamnyura, um ati yin ehele ra, is ma umoh aien.

⁴² Eris ato a nupu Joppa asega; eris asgeig irai Natimarid natimi is ahinag.

⁴³ Is amen Joppa aien ira adiat is ahinag ehele Saimona natimi ago arasi kurimatau.