Niji auritai o ilpu Apostolo 8 - Intas Etipup

Nuarin-tas alupas 8.

¹ IS ika a Saulo et upene yi mas aien. An naopan iyehki is esjilid natmas vai nup an nakalasia Jerusalem; eris terimterim ara asega, um apan irai iji uari pece Jutaia im Samerya; eris amen ache a ilpu apostolo.

² Eris imyiapan Stifanus a ilpu atimi upene, um atelmoi yin, um imyitaig alupas yin.

³ Ja is esjilid natmas o Saulo vai nup an nakalasia; is apan aien irai eom asega, um leucse ilpu atamaig im ilpu takata, um ikni ra anliin neom ipjin.

⁴ Va nedo ineigki eris apan irai iji uari-pece ara sji eigki eris terimterim ara, um asuptecnaig intas-upene.

⁵ IS apan a Filipus an nuarinpece is ethi Samerya, um asuptecnai Kristo ehele ra.

⁶ Eris wat atahaijeg natimi is ahinag um ecetai niji auritai ehka is ago a Filipus, eris ehras imyiaiji ara nitai iji eigki is asaig aien.

⁷ Eris ahlaig ijinies a ilpu agelo has, um atceijaig natimi is ahinag eris amen ira ra ara: eris lep cehcehe natimi is ahinag eris emehe ara va napalse, im ilpu atimi asvahteuc neduora.

⁸ Is esjilid nimyiacitak an nuarin-pece iyehki.

⁹ Ja is eteuc natimi is ethi, nidan Saimona, is ahraces aien itu acen an nuarin-pece iyehki, eris imyiali yin a nupu Samerya, is ika aien is atimi esjilid:

¹⁰ eris imyiimtacimtac yin ara asega, ilpu atimi alupas im tup atimi, um ika, Et emda esjilid a natimi ineigki vai Atua,

¹¹ Eris imyiimtacimtac yin ara va nedo ahraces o un ineig, eris imyiali yin vaig ara itu acen.

¹² Ja eris wat imyiisjis ninivaijec intas asuptecnaig o Filipus ara, va niji itai upene an nelcau o Atua, im nidai Iesu Kristo, eris leh nabaptiso ira ra a ilpu atamaig im ilpu takata.

¹³ Is lep imyiisjis ninivaijec a Saimona, um leh nabaptiso iran, um amen ehele Filipus, um imyiali, is wat almoi aien niji auritai ehka im niji auritai esjilid acen eris ago.

¹⁴ Eris wat atahaijeg a ilpu apostolo Jerusalem, nikavaig, eris leh intas o Atua a nupu Samerya, eris abraig pan ehele ra Pitrus im Joanes ara:

¹⁵ erus wat yetpan arau, erus alaigaheni arau vai ra, mika eri leh Nesgan Upene ara:

¹⁶ is eti fi asuol pam ehelen tah ira ra aien an naopan iyehki: eris leh nabaptiso ache ira ra ara an nidai Iesu Natimarid.

¹⁷ Erus atijai nikmarau ira ra arau, ja eris par leh Nesgan Upene ara.

¹⁸ Is wat almoi a Saimona, nikavaig, erus wat atijai nikmarau ira atimi ahwat apostolo erahki, eris leh Nesgan Upene ara, is imyiapan nimtan ehele rau aien,

¹⁹ um ika, Alupai nyak nemda ineigki aijaurau, mika, ek wit atijai nikmak ainyak iran tah, yi leh Nesgan Upene aien.

²⁰ Ja is um ika ehelen a Pitrus, Uhpu auahas euc pan irai mune unyum, va nedo unyum, nikavaig, na mun aktaktai aiek mika an auanimtan nitai tup ahtai o Atua irai mune:

²¹ et ti nahaijin unyum im inuarin unyum an nitai ineigki: et eti inivaijec inliinmopom aiek an nuhup o Atua:

²² etmu adumoij inliinmopom aiek va nedo has unyum, um ugni Atua, kit uhpu eti aru iram va naktaktai u inliinmopom:

²³ ek ato ainyak, nikavaig, et eteuc nitai acen anliinmopom aiek, et lep arore euc nedo has.

²⁴ Is tas a Saimona, um ika, Arumu ugni Natimarid vai nyak aijaurau, va yi jim yetpam irak nitai iji eigki erau mun asaig vai nyak aijaurau.

²⁵ Erus esege arau, um asuptecnaig intas o Natimarid, ja par lep adumoij pan alaig Jerusalem, um asuptecnaig intas-upene irai iji uari-pece is ahinag o nupu Samerya.

²⁶ IS tas a nagelo o Natimarid ehele Filipus, um ika, Atidai aiek, um apan an nuarin ineig et ahes nuritoga iran, an nefalaig et ahes Jerusalem um yetpan Cesa, et amasacen.

²⁷ Is um atidai aien, um apan: is ecet natimi alupas is ethi aien, nupu Idiopya, is aheca esjilid o Kantasi aien natimarid takata Idiopya, is aminjinaig inpadiaig asega o un aien; is apan Jerusalem aien mika yi alaigaheni;

²⁸ is wat adumoij pan aien, is ateuc aien an nitai atga o un, um esvi intas o Aiseya naprofeta.

²⁹ Is ika a Nesgan Upene ehele Filipus, Aiheucaiheuc aiek, um uhum nitai atga naico.

³⁰ Is athut pan ehelen a Filipus, um atahaijeg yin nesvivaig intas o Aiseya naprofeta, um ika, Na ato aiek nitai ineig na esvi aiek, ka oʼo?

³¹ Is um ika aien, Et ehka, et ti natimi par esege imtak. Is ika aien ehele Filipus yi aridjai aien um ateuc ehelen.

³² Is esvi intas ineigki aien, eris aged, um ika. “Eris imyiapan yin is idivaig siip par atgei yin; is eti tas aien, is idivaig inhakli siip an nuhup u natimi eucsei nalau iran:

³³ an naopan iyehki is wat upoupo nedo o un, eris atipagki yin vai intas alep ura: etpu asuptecnaig naopan o un a di? va nitai ineig, nikavaig, eris atgei yin an nobohtan.”

³⁴ Is tas a natimi alupas ehele Filipus, um ika, Asaig ehelek, is asan tas ineigki a naprofeta vai di? vai yin, ka vai intak atimi?

³⁵ Is asalgei nipjineucsen a Filipus, um atupun an tas iyehki eris aged, um asuptecnai Iesu ehelen.

³⁶ Erus atga arau an nefalaig um yetpan an wai is ethi: is um ika a natimi alupas, Almoi inwai ineigki aiek; ek auri ainyak par eti leh nabaptiso irak?

³⁷ Is um ika ehelen a Filipus, El et imyiisjis ninivaijec anliinmopom asega aiek, el et upene. Is tas aien, um ika, Ek imyiisjis ninivaijec nitai ineig ainyak, nikavaig, et Hal o Atua a Iesu Kristo.

³⁸ Is ika aien yi aiji nitai atga o un: erus asuol an wai arau, Filipus im lep natimi alupas; is baptiso iran aien.

³⁹ Erus ahes an wai arau, ja is par leh Filipus a Nesgai Natimarid, is um tup eti ecet yin a natimi alupas: ja is atga o un aien an nefalaig, um imyiacitak.

⁴⁰ Ja eris um lep ecet Filipus an nuarin-pece Asotus: is atga asuptecnaig intas-upene aien irai iji uari-pece asega, um yetpan Sisaria.