Niji auritai o ilpu Apostolo 7 - Intas Etipup

Nuarin-tas alupas 7.

¹ IS um ika a natimi esjilid an nahlap, Et idim ucco nitai iji eigki, ka oʼo?

² Is um ika aien, Ak ilpu atimi alupas, ilpu etoak, akumu atahaijeg nyak aijaua: Is ehcohos pan a Atua esjilid ehele etpoija Ebraham, an namen o un Mesopotemya, ja is par lep han amen Heran aien;

³ is um ika ehelen aien, “Ude inpece unyum aiek, im ilpu atimi ehpan iram, um apam an pece ineigki ekpu asuptecnaig ehelum ainyak.”

⁴ Is ude inpece o nupu Kalti aien, um han amen Heran: is wat mas a etman, is atipagki yin eahki a Atua um imyiapam yin an pece ineigki, eka amen iran aijaua.

⁵ Is eti fi atceijaig tah inuarin nobohtan imi yin aien, is idim ti inuarin ineig nathaivaig neduon iran: ja is upyi asaig aien mika yi alupai yin inpece ineig yipu ohuun aien, im ilpu mapon; ja is eti fi eteuc inhal o un an naopan iyehki.

⁶ Is um ucco intas o Atua, is ika aien, “erupu amen a ilpu mapon an taka pece, erupu ikni ra ara mika eri aheca ura ara, um agahas ira ra, irai mesese inyi tor huntret.”

⁷ Ja is ika a Atua, “Ekpu aru ainyak irai nup uran pece iyehki eri aheca o atimi iran ara; erupu lep ahes eahki ara, um atga ura, um ham, um alaigaheni vai nyak igcaki.”

⁸ Is alupai yin intas-etipup aien va naperitome: is apos Aisak a Ebraham, um aperitome iran an nadiat eet; is apos Jakob a Aisak; is apos ilpu retpoija is twelv a Jekob.

⁹ Ja eris auatitai a ilpu retpoija vai Josef, um ahtai yin imi atimi alaig Ijipt: ja is amen ehelen a Atua,

¹⁰ um imyiatamaig yin va nohocred asega o un, um alupai yin narapakau an nuhup o Fero natimarid an pece Ijipt, um ago upene inliinmopoi Fero vai yin; is ati yin aien mika yi atimi alupas an pece Ijipt aien, im lep an nimnim o un asega.

¹¹ Ja is eteuc numlaig has an pece Ijipt asega im lep Kenan, is esjilid nohocred o atimi, is ti nitai caig o ilpu retpoija,

¹² Is wat atahaijeg a Jekob, nikavaig, is eteuc hwiit Ijipt, is uhup aien um abraig pan ilpu retpoija eahki.

¹³ Eris ehcero apan ara, ja is par ehvai yin a Josef ehele ilpu etoan; eris lep ehvaig ehele Fero ilpu atimi ehpan irai Josef.

¹⁴ Is abrai ra a Josef, um ika, yi apan ehelen a etman Jekob, im ilpu atimi ehpan iran asega, eris atimi is sevente faiv ara.

¹⁵ Is apan Ijipt a Jekob, um mas eahki, im lep ilpu retpoija,

¹⁶ eris imyiapan ra Sikem, um ikni ra an mun nij iyehki is aua-nimtan irai mune a Ebraham imi ilpu mapoi Hemor etmai Sikem.

¹⁷ Is wat ubutpotet pan u naopan iyehki etpu ehneijid intas upyi asaig iyehki, is asig yi aktit a Atua ehele Ebraham, eris asvalav atimi um atamerit an pece Ijipt,

¹⁸ um yetpan an naopan iyehki is atidai a natimarid is eche, is eti ato Josef aien.

¹⁹ Is ago nedo efaifa aien vai ilpu atimi ehpan iraija, um agahas irai ilpu retpoija; eris erekhaig ilpu hal ura ara inhadi, mika eri jim umumoh ara.

²⁰ Eris apos Moses an naopan iyehki, is eklim upene aien, eris aminjinai yin anliin neom o etman an mohoc is eseij:

²¹ eris ethai yin ara, ja is pah leh yin a inhalav atahaig o Fero, um aminjinai yin mika yi hal o un.

²² Eris esege imi Moses narapakau asega o nupu Ijipt; is esjilid intas o un im nedo o un.

²³ Is wat forte inmesese iran, is ika anliinmopon aien yi ateghe ilpu etoan nupu Isreel.

²⁴ Is ecet natimi is ethi aien ira ra eris agahas iran, is imyiahras yin aien, um ejejei yin eris ago nedo has vai yin, um atgei nupu Ijipt iyehki:

²⁵ is aktaktai aien, mika eris ato a ilpu etoan mika etpu imyiatamumoh ra a Atua an nikman; ja eris eti ato ara.

²⁶ Is wat lahlah an tak apnyin, is ehcohos pan aien ehele natimi is ero erus ehtauo arau, um ika yi asan neigpa an nehtauo urau, um ika, Ak ohwat raigki, arau raimu aijaurau; erau auri aijaurau par ago nedo has jipe vai caurau?

²⁷ Ja is ahtahlo yin a natimi ineig is agahas irai etoan aien, um ika, Is ati euc a di mika an atimi alupas aiek, um atimi aru nedo unyima?

²⁸ na ika aiek an lep atgei nyak, et idivaig natgei nupu Ijipt iyehki unyum ianiv, ka oʼo?

²⁹ Is aha a Moses vai intas ineigki; is amen ehcid aien an pece Mityan, um apos inhalav atamaig o un is ero eahki.

³⁰ Is wat ti pan itac inmesese is forte, is ehcohos pan ehelen an namasacen ubutpotet u nedoon Saine a nagelo o Natimarid an nalauma u incop an cai.

³¹ Is wat ecetai a Moses, is imyiali aien va nitai ineig is ecetai aien: is apan ubutpotet aien par almoi, is atahaijeg nohrai Atua aien,

³² is ika, “Ek Atua o ilpu retpom ainyak, Atua o Ebraham, im; Atua o Aisak, im Atua o Jekob.” Is ucjucjucaij a Moses, um imtitaig nalmoivaig.

³³ Is ika ehelen a Natimarid, Atipagki incedpun eduom aiek: nuarin itaup neigki na aiji iran aiek:

³⁴ kis idim ecetai ainyak nohocred o ilpu atimi unyak an pece Ijipt, kis lep atahaijeg nahlaig esjum ura ainyak, ek mun asuol ainyak mika ki imyiatamaig ra: apam aiek, ekpu abraig pan euc Ijipt ainyak.

³⁵ Moses iyehki eris esjum vai yin ara, um ika, “Is ati euc a di mika an atimi alupas aiek, um atimi aru nedo has?” aien aigki, is abrai yin a Atua mika yi atimi alupas aien, um atimi inyiatamaig ra an nikmai nagelo iyehki is ehcohos pan ehelen an cai.

³⁶ Is iknipagki ra aien, ja is upyi hup aien um ago niji auritai imyiali im niji auritai ehka, an pece Ijipt, im lep an jop Cop, im lep an namasacen irai mesese is forte.

³⁷ Aien ahki Moses, is ika aien ehele nupu Isreel, “Etpu imyiatidai imi caua Naprofeta inyi ethi a Ihova Atua unyimia irai ilpu etoamia, inyi idivai nyak; akumu atahaijeg yin aijaua.”

³⁸ Aien ahki, is amen aien ehele atimi an nasjapicnaig an namasacen ehele ilpu retpoija, im lep ehele nagelo iyehki is tas ehelen aien an nedoon Saine: is leh niji tas umumoh vaig aien par alupai caija:

³⁹ ja eris ika a ilpu retpoija eri eti imyiaiji intas o un, eris ahpaadeig pagki yin ara, is ahidaig pan Ijipt inliinmopura ara,

⁴⁰ eris ika ehele Eron ara, “Ago ilpu atua imi cama aiek eri uhup iraija ara: ecra eti ato aijama, nikavaig, et echamecha vai Moses ineigki, is iknipagki caija aien an pece Ijipt”

⁴¹ Eris ago inhakli kurimatau ara an naopan iyehki, um ahlap vai natmassimai iyehki, um imyiacitak va nauritai irai ikmara.

⁴² Is atidjin ira ra a Atua, um ude ra, mika eri alaigaheni ara va niji itai an nohatag; is idivaig eris aged an nitasvitai u ilpu profeta, um ika, “Ak nupu Isreel, akis ahlap vai nyak aijaua irai iji kurimatau eris atgei, im niji itai ahlap, irai mesese is forte an namasacen, ka oʼo?

⁴³ akis idim apos neom atga o Molok aijaua, im lep inmoijeuv o Remfan atua unyimia, nalmuitai iji eigki akis ago aijaua mika aki alaigaheni vaig: ekpu idim imyiapan caua ainyak an nahaijin Babelon itac.”

⁴⁴ Is amen ehele ilpu retpoija an namasacen neom atga, nitai asuptecnaig imi ra, is idivaig is asaig aien, is ika ehele Moses aien, yi ago et idivaig nitai asjaaicnaig is ecetai aien.

⁴⁵ Eris lep imyiapam neom iyehki a ilpu retpoija eris epitpitac ara im Josua, an pece ineig eris ohuun a nup urai taka pece iji ehki, is ahlo ra a Atua an nuhup o ilpu retpoija, um yetpan an naopan iyehki an numoh o Tevit;

⁴⁶ is upene inliinmopoi Atua vai yin, is merit aien necetaivaig neom ahlap vai Atua o Jekob.

⁴⁷ Ja is acta neom imi yin a Solomon.

⁴⁸ Ja et eti amen aien et Esjilid aien irai eom ahlap er ago irai ikma atimi; et idivaig is asaig a naprofeta, um ika,

⁴⁹ “Et ika a Ihova, Et dorona unyak nohatag, um itai atijai neduok iran nobohtan: inyi echamecha neom ineig akupu ago imi nyak aijaua? inyi lep echamecha inuarin ineig ekpu amen iran ainyak?

⁵⁰ kis idim ago niji itai asega iji eigki an nikmak ainyak.”

⁵¹ ¶ Ak ilpu atimi ipjin inliinmopomia, im ilpu atimi eti aperitome anliinmopomia im intikgamia, eka acaijaig Nesgan Upene aijaua irai iji adiat: eka ago nedo o ilpu retpomia aijaua:

⁵² tah ilpu profeta a di neigki eris eti atmas vai yin a ilpu retpomia? eris lep atgei ra sji ehki ara eris upyi asuptecnaig napam o Natimi Upene ara; aien aigki akis aniv yin aijaua um atgei yin:

⁵³ akis leh intas alep aijaua, eris ati a ilpu agelo, jam eti imyiaiji.

⁵⁴ ¶ Eris wat atahaijeg intas iji eigki ara, is edemda alupas inliinmopura ara, eris aces eijera ara vai yin.

⁵⁵ Ja is amen alupas ehelen a Nesgan Upene, is easji pan aien an nohatag, um ecetai natimi alupas o Atua, im Iesu naijivaig an matai Atua,

⁵⁶ um ika, Ek idim almoi nohatag ainyak eh mun asalgei, im Inhal o natimi naijivaig au matai Atua.

⁵⁷ Eris ahlaig ijinies ara, um ucjipanes intikgara, um ehras telohtelo pan iran,

⁵⁸ um ahlo pan itac yin an nuarin-pece, um asji yin irai hat: eris atise napelumai ura a ilpu atimi asuptecnaig vai yin u neduei intakuras is ethi, nidan Saulo.

⁵⁹ Eris asji Stifanus ara irai hat, is wat alaigaheni aien, um ika, Ak Iesu Natimarid, leh nesgak aiek.

⁶⁰ Is atpuse aien, um ahlaig ijinies, um ika, Ak Natimarid, jim aru nedo has ineigki ura aiek. Is wat ucce intas o un, is umjegse aien.