Niji auritai o ilpu Apostolo 6 - Intas Etipup

Nuarin-tas alupas 6.

¹ AN naopan iyehki eris wat ahinag a ilpu atimi alaigaheni, eris tas upoupo atimi tas an tas Crisi va atimi tas an tas Hibru, vai ilpu takata ura eris emesmas a ilpu atamnyura, eris eti aktaktai ra ara an nahaigvaig niji itai ura irai iji adiat.

² Eris asjapicnaig ilpu atimi alaigaheni asega a ilpu apostolo is twelv, um ika, Et eti upene vai cama nudevaig intas o Atua um ahai itai:

³ va nitai ineigki, ak ilpu etoama, akumu ahilek natimi inyi seven iramia aijaua eh tas upene vai ra, um lep amen alupas ehele ra a Nesgan Upene, um esjilid narapakau ura, ecrupu ikni ra aijama va nauritai ineigki:

⁴ ja ecrupu aminjinaig nalaigaheni aijama irai iji adiat, um asuptecnaig intas.

⁵ ¶ Is upene intas ineigki an nuhup o atimi asega: eris aniv Stifanus ara, is atimi imyiisjis emda ninivaijec aien, is lep amen alupas ehelen a Nesgan Upene, im lep Filipus, im Prokorus, im Naikenor, im Taimon, im Parmenas, im Nikolas nupu Anteok, is leh nalaigaheni u nupu Jutaia aien;

⁶ eris ikni ra an nuhup o ilpu apostolo ara: eris alaigaheni ara, um atijai nikmara ira ra.

⁷ Is edel intas o Atua; eris ahinag acen a ilpu atimi alaigaheni Jerusalem; im lep ineig, eris leh intas inivaijec a ilpu atimi ahlap is ahinag.

⁸ IS esjilid nimyiisjis ninivaijec o Stifanus im nemda o un, is ago niji auritai imyiali aien, im niji auritai ehka esjilid an nuhup o atimi.

⁹ Eris atidai nahaiji atimi u neom alaigaheni iyehki eris anvi nidan mika u ilpu atimi eris ahiyi ilpu atmil ura, im lep ura eris apos ra Sairini, Im lep ura eris apos ra Aleksantrea, im lep ura eris ahes Silisea ara im Esya, um imyiisjis itai irai Stifanus.

¹⁰ Ja eris auatialidi ara nauud yi aijiraig vaig narapakau o un, im intas emda o un.

¹¹ Ja eris abra atimi ara, mika eri ika ara, Ecris atahaijeg intas has esjilid o un aijama, vai Moses im lep vai Atua.

¹² Eris auahas inliinmopoi atimi ara, im ilpu atimi tas alep, im ilpu atimi esege; eris athut pan ehelen ara, um arop iran, um imyiapan yin an nasjapicnaig u ilpu atimi alupas;

¹³ eris ikni ilpu atimi athai nahcil ara, eris ika ara, Et eti atumop a natimi ineigki nasaigvaig intas has esjilid va neom itaup in-eigki, im lep vai intas alep:

¹⁴ ecris atahaijeg intas o un aijama, is ika aien, Etpu auahas neom ineigki a Iesu nup an Nasared, um hedaig nedo ineig is asuptecnaig eheleija a Moses.

¹⁵ Ara asega eris ateuc ara u nasjapicnaig u ilpu atimi alupas, eris anani nesganimtara iran ara, um ecetai nesganimtan, is idivaig nesganimtai nagelo.