Niji auritai o ilpu Apostolo 4 - Intas Etipup

Nuarin-tas alupas 4.

¹ ERUS wat tas arau ehele atimi, eris apan ehele rau a ilpu atimi ahlap, im natimi alupas an neom ahlap, im ilpu Satusi,

² eris taigtaig ara va nedo urau, nikavaig, erus esege imi atimi arau, um asuptecnaig inusjai o atimi vai inmas ura vai Iesu.

³ Eris arop ira rau ara, um ati rau anliin neom ipjin um yetpan an tak apnyin: va nitai ineig is mun jupura.

⁴ Ja eris imyiisjis ninivaijec natimi is ahinag ira ra eris atahaijeg intas ara; eris wat esvi atimi iji eigki eris idivaig eris faiv dausant ara.

⁵ ¶ Is wat lahlah an tak apnyin eris asjapicnaig Jerusalem a ilpu atimi alupas ura, im ilpu atimi tas alep, im ilpu atimi esege,

⁶ im Annas natimi esjilid an nahlap, im Keafas, im Joanes, im Aleksanter, im lep ra asega ilpu atimi ehpan irai natimi esjilid an nahlap.

⁷ Eris ati rau an nuhup ura ara, um ahodai rau, um ika, Erau mun ago nitai ineigki aijaurau va nemda u di, im nidai di?

⁸ Is amen alupas ehele Pitrus a Nesgan Upene, is um ika ehele ra aien, Ak ilpu atimi alupas an pece, im ilpu atimi tas alep u nupu Isreel,

⁹ el eka ahodai cumrau aijaua va nedo upene ineig eh mun ago irai natimi areci ineigki, um ika, er ago cehcehe yin, um uauo;

¹⁰ akumu ato aijaua asega, im lep nupu Isreel asega, nikavaig, et atidai a natimi ineigki um umoh an nuhup unyimia va nidai Iesu Kristo nup an Nasared, aien aigki akis atgei yin aijaua an nauincai atgeig, ja is imyinusjai yin a Atua vai inmas o un:

¹¹ et hat ineigki aien akis esjum vaig aijaua, ak ilpu atimi acta neom; et idim hat esjilid ineigki an nesvi va neom:

¹² et eti ahes nimyiatamaig caija ehele tak atimi: eris eti lep aniv tah ira atimi an nobohtan ineigki, eris idim ika uhpu imyiatamaig caija vai yin.

¹³ ¶ Eris wat almoi nemda o Pitrus im Joanes ara intasvaig, um ato, nikavaig, erus tup atimi arau, um eti atimi esege, eris imyiali ara; eris lep imyiehva ara, nikavaig, erus amen ehele Iesu arau.

¹⁴ Eris wat almoi natimi iyehki ara, eris ago cehcehe yin, naijivaig ehele rau, is ehka vai ra inlep asaigvaig tah nitai.

¹⁵ Eris ika ehele rau ara, eru ude sjak nasjapicnaig arau, um alau ijo; ja eris tas jipe ara,

¹⁶ um ika, Inti ago inhe akaija irai natimi iraigki? era idim ato natimi asega amen Jerusalem, nikavaig, erau mun ago nauritai ehka esjilid ineig arau; et ehka vai caija naterivaig:

¹⁷ jai intumu acaiji emda rau akaija, mika eru jim lep tas ehelen tah natimi arau an nidan ineigki, va yi jim apaahni nitai ineigki ehele atimi.

¹⁸ Eris lep ahlaig vai rau ara, um acaiji rau, mika eru jim lep tas an tah intas arau ka esege an nidai Iesu.

¹⁹ Ja erus tas a Pitrus im Joanes, um ika ehele ra, Eka ikha aijaua, et upene an nuhup o Atua nimyiaijivaig intas unyimia, ka nimyiaijivaig intas o Atua?

²⁰ et ehka vai cumrau naterivaig nitai iji eigki ecrus almoi aijumrau um atahaijeg.

²¹ Eris lep acaiji rau ara, um atceijai rau, va nedo o atimi, eris eti ecetai tah nitai ineig ara ehele rau uhpu aru vaig: eris imyiahpas Atua natimi asega va nitai ineigki erus mun ago arau.

²² Is forte um eled inmesese irai natimi iyehki eris ago nauritai ehka iran, um ago cehcehe yin.

²³ ¶ Eris wat atceijai rau ara, erus apan arau ehele ilpu etoara, um asuptecnaig intas asega eris asaig ehele rau a ilpu atimi ahlap esjilid, im ilpu atimi tas alep.

²⁴ Eris wat atahaijeg ara, eris ebras ahlaig vai Atua ara, um ika, Ak Natimarid, na Atua aiek, as ago nohatag aiek, im nobohtan, im injop, im niji itai asega amen iran:

²⁵ as tas aiek an nipjineucse Tevit naheca unyum, um ika, “Era auri a ilpu atimi aupat par atavaitap? era auri natimi par aktaktai intakitai?

²⁶ eris atidai a ilpu atimarid an nobohtan, eris lep ehras asjapicnaig a ilpu atimi alupas vai Ihova, im lep vai Kristo o un.”

²⁷ Et inivaijec ineig, nikavaig, eris ehras asjapicnaig a Herot, im Ponjus Pailet, im ilpu atimi aupat, im nupu Isreel, vai Naheca upene unyum, Iesu, as ati yin aiek,

²⁸ mika eri ago nitai iji eigki asega as upyi hup aiek um anacanac iran an nikmam, um ika uhpu ago.

²⁹ Im lep ineig, ak Natimarid, almoi intas atavaitap ura: um alupai ilpu aheca unyum nemda asega mika eri asuptecnaig intas unyum:

³⁰ namu ada nikmam aiek um ago cehcehe atimi; uhmu lep ago niji auritai ehka im niji auritai imyiali, an nidai Iesu Naheca upene unyum.

³¹ Eris wat alaigaheni ara, is um ahcatina nuarin iyehki eris amen iran ara; is amen alupas a Nesgan Upene ehele ra asega, eris asuptecnaig emda intas o Atua ara.

³² IS tup ethi ache inliinmopoi ra sji eigki is ahinag eris imyiisjis ninivaijec ara, im naktaktai ura: is lep eti ika tah, et o un ache niji itai o un; ja eris asipiaig jipe niji itai asega ura ara.

³³ Eris asuptecnaig emda inusjai o Iesu Natimarid a ilpu apostolo: is amen alupas ira ra asega naiheuc o Atua.

³⁴ Is eti ihki natimi tah ira ra: ara, eris ohuun nobohtan ara, im niji eom, eris ahtai ara, um leucse pan nimtan nitai iji eigki eris ahtai ara,

³⁵ um ikni u eduei ilpu apostolo: eris ahaig upene irai ilpu ihki atimi asega ara.

³⁶ Im lep Joses, eris lep anvi nidan a ilpu apostolo par ika Barnabas, (nesgan tas ineigki, Natimi tas upene,) is mapoi Livai aien, eris apos yin Saiprus,

³⁷ is ohuun nobohtan aien, ja is ahtai aien, um leucse pan nimtan, um ikni u eduei ilpu apostolo.