Niji auritai o ilpu Apostolo 3 - Intas Etipup

Nuarin-tas alupas 3.

¹ ERUS ehraridjai a Pitrus im Joanes alaig an neom ahlap an nuarin-nadiat alaigaheni, an jupki.

² Eris imyiapan natimi is ethi is isvihteuc neduon aien an napos yin vaig, um ati yin an neucse neom ahlap iyehki eris anvi nidan mika Eklim upene, irai iji adiat, mika yi ugni itai aien ehele atimi apan anliin neom ahlap;

³ is ecet Pitrus aien im Joanes napanvaig anliin neom ahlap, um ugni rau vai itai.

⁴ Is amah iran a Pitrus, im lep Joanes, um ika, Alum cumrau aiek.

⁵ Is wat alum rau aien, um aktaktai mika erupu alupai yin tah nitai arau,

⁶ is um ika a Pitrus, Et ti silver im colt unyak; jai nitai unyak ineigki ekpu alupai euc ainyak: namu atidai aiek um atga, an nidai Iesu Kristo nup an Nasared.

⁷ Is arahpan vai inmatan aien, um imyiatidai yin; is eti laulau um umoh nugnyan im lep nimtanid an neduon;

⁸ is areuctidai aien, um atga, um ahced rau um apan an neom ahlap, is atga adekdikjai aien um imyiahpas Atua.

⁹ Eris alum yin natimi asega natgavaig um imyiahpas Atua:

¹⁰ eris ato ara mika an yehki aien is ateuc aien um ugni itai an neucse neom ahlap Eklim upene: eris imyiali alupas ara, is ti intas ura, va nitai iji eigki is yetpam iran.

¹¹ Is apol irai Pitrus im Joanes natimi iyehki is isvihteuc neduon jam lep umoh, eris lep ehrathut pan ehele rau natimi asega an naiyu iyehki eris anvi nidan mika u Solomon, eris imyiali alupas ara.

¹² ¶ Is wat almoi nedo ura a Pitrus, is tas ehele atimi aien, um ika, Ak nupu Isreel, eka auri aijaua par imyiali nitai ineigki, um amah iramrau, um ika et atga a natimi ineigki va nedo emda im nedo upene unyimrau?

¹³ Et mun idim ehvaig natimi alupas o Iesu Naheca o un a Atua o Ebraham, im Aisak, im Jekob, Atua o ilpu retpoija; aien aigki akis ati yin aijaua an nuhup o Pailet, is wat ika aien yi atceijai yin, akis esjum vai yin aijaua.

¹⁴ Akis idim esjum aijaua vai natimi ineig et upene aien um atoh nedo o un, jam ika yi atceijaig imi caua natimi atgei atmas;

¹⁵ um atgei Natimi ineig et ahes nitai umoh iran ehelen, ja is imyinusjai yin a Atua vai inmas o un; ecra atimi asuptecnaig yin aijama.

¹⁶ Et mun lep emda a natimi ineig eka alum yin aijaua um ato, va nidan, im lep nimyiisjis ninivaijec va nidan: maiya, et cehcehe upene aien an nuhup unyimia asega va nimyiisjis ninivaijec ineig et ahes ehelen.

¹⁷ Ak ilpu etoak, ek ato ainyak, nikavaig, akis ago nedo ineigki aijaua va naupat u inliinmopomia, eris idim ucco a ilpu atimi alupas unyimia.

¹⁸ Ja et mun ehneijid nitai iji eigki a Atua is upyi ehvaig aien an nipjineucse ilpu profeta asega o un, nikavaig, etpu ohocred a Kristo.

¹⁹ Akumu adumoij anliinmopomia aijaua, um ahidai caua, va uhpu ohpodohpod nedo has unyimia, va inyetpam naopan upene iyehki etpu ahes ehele Natimarid;

²⁰ va etpu lep abrai Iesu Kristo aien, eris upyi hup um asuptecnaig yin ehelemia:

²¹ eris idim ika uhpu imyiaaij yin an nohatag um yetpan an naopan iyehki uhpu lep ehteduo niji itai asega, is tas vaig a Atua an nipjineucse ilpu profeta upene asega o un itu acen.

²² Is idim asaig a Moses ehele ilpu retpoija, um ika, “Etpu imyiatidai Naprofeta inyi ethi imi caua a Ihova Atua unyimia irai ilpu etoamia, inyi idivai nyak; akumu atahaijeg yin aijaua va nitai iji eigki asega etpu asaig ehelemia aien:

²³ im lep ineig, natimi asega, eri eti atahaijeg Naprofeta iyehki ara, uhpu auahas ra um iknipagki ra ehele atimi.”

²⁴ Is lep upyi hup um tas va nadiat iji eigki a Samuel im lep ilpu profeta asega eris epitpitac iran ara, ara asega eris tas ara.

²⁵ Eka ilpu hal o ilpu profeta aijaua, um ilpu atimi leh intasetipup iyehki is ati a Atua ehele ilpu retpoija, nikavaig, is ika aien ehele Ebraham, “Erupu imyiacitak nup urai iji pece asega vai mapom.”

²⁶ Is wat imyinusjai Iesu Naheca o un a Atua, is upyi hup aien um abraig pan yin ehelemia, mika yi: aiheuc vai caua aien, um imyiadumoij caua asega an nedo has unyimia.