Niji auritai o ilpu Apostolo 28 - Intas Etipup

Nuarin-tas alupas 28.

¹ ERIS wat arijai ara, eris ato ara, nikavaig, nidan haklin-pece iyehki Meleta.

² Eris aiheuc vaig alupas cama a nup uran pece iyehki, jam eche intas ura: eris adnan cop ara, um leucse cama asega, vai incaupda iyehki is asuol, im neiweyu.

³ Is arecai a Paulo, um iknijai an cop, is ahes an cop nimyiv is ethi, um apol an nikman.

⁴ Eris wat almoi nitai aleg iyehki a nup eahki napolvaig an nikman, eris tas jipe ara, um ika, Et idim atimi atgei atmas a natimi ineigki, is eti mas an jop aien, ja et idivaig uhpu aru nedo has o un, inyi ti umoh aien.

⁵ Ja is auhaigjai nitai aleg iyehki an cop aien, um eti auah tah nedo vaig.

⁶ Eris amen ara um almoi mika etpu atop aien, ka auroauro um eropse um mas: ja eris wat amen ara um almoi is itu ira ra, jam eti fi ecet yin nauah tah nedo vaig, is lep eche naktaktai ura ara, um ika et tah atua aien.

⁷ Is eteuc nuari obohtan o natimi alupas esjilid an pece, nidan Publeus, an nahaijin pece iyehki; is leucse cama aien, um aminjinaig upene cama an nimnim o un, an nadiat is eseij.

⁸ Is asjeuc a etmai Publeus va nemehe ihlup, im naredared an ja: is apan ehelen a Paulo, um alaigaheni vai yin, um atijai nikman iran, um ago cehcehe yin.

⁹ Is wat ago nedo ineigki aien, eris lep apan ehelen hal atimi an pece iyehki eris emehe ara, is ago cehcehe ra aien:

¹⁰ eris eccen vai cama ara an niji itai upene is ahinag, um alupai cama nitai iji eigki is upene vai cama, an lep atceija nelcau unyima.

¹¹ ¶ Is wat ti pan itac inmohoc is eseij, ecris atceija nelcau ineig aijama is ahes Aleksantrea, is amen an haklin-pece iyehki an naopan ehio, natmassimai iran iraigki, Kastor im Polluks.

¹² Ecris apahai Sairakyus aijama, um amen eahki an nadiat is eseij.

¹³ Ecris lep ahes eahki aijama um atahaki um yetpan Rijeum: is wat ti pan itac nadiat is ethi, is ehlehel an nuritoga atamaig, is wat lahlah an tak apnyin, ecris yetpan Putiolai aijama:

¹⁴ ecris ecet ilpu etoama eahki aijama, eris imyiacaij cama ara mika ecri amen ehele ra aijama an nadiat inyi seven: ja ecris par apan aijama alaig Roma.

¹⁵ Eris wat atahaijeg vai cama a ilpu etoama, eris ahes eahki ara, um yetpan an Tiptag o Appeus, im lep an Neom is eseij ehele atimi asega: um aubillid cama, is wat ecet ra a Paulo, is naaurineig vai Atua aien, is lep emda inliinmopon aien.

¹⁶ ECRIS wat yetpan Roma aijama, is atceijai ilpu atimi arore ra a natimi alupas o ilpu eucsupo imi natimi alupas esjilid o ilpu eucsupo: ja eris ika yi echim amen a Paulo, im neucsupo is ethi par aminjinai yin.

¹⁷ Is wat ti pan itac nadiat is eseij, is asjapicnai ilpu atimi alupas o nupu Jutaia a Paulo: eris wat asjapicnaig ara, is ika ehele ra aien, Ak ilpu etoak, kis eti ago tah nedo has va atimi an pece uja ainyak, ka nedo o ilpu retpoija, ja eris arore nyak Jerusalem, um ati nyak an nikmai nupu Roma:

¹⁸ ja eris wat ahilek nedo unyak ara, eris ika ara eri atceijai nyak, kis eti ago tah nedo ineig ainyak ki mas vaig:

¹⁹ eris wat imyiisjis a nupu Jutaia, is ehka vai nyak intup amenvaig, jai kis arohoai Sisar ainyak; ja ek eti ika ainyak ki atijai tah nitai irai nup uran pece unyak:

²⁰ ek mun asjapicnai caua ainyak va nitai ineigki, mika ki alum caua, um tas ehelemia: eris idim arore nyak an natauhat ineigki va nitai ineig eris ika a nupu Isreel etpu yetpam.

²¹ Eris um ika ehelen ara, Ecris idim eti leh tah nitasvitai ahes Jutaia vai euc aijama, is idim eti aniv euc tah, um eti asuptecnaig tah nedo has unyum tah irai ilpu etoaija:

²² ja ecra merit aijama natahaijegvaig naktaktai unyum; ecra idim ato aijama, nikavaig, er asan tas has va nesege ineigki irai iji pece asega.

²³ Eris anvi nadiat is ethi imi yin ara, eris apan ehelen natimi is ahinag an neom o un; is tas ehele ra aien, um asuptecnaig nelcau o Atua, um esege upene imi ra niji itai vai Iesu, an tas alep o Moses, im intas o ilpu profeta, is tas aien an nuhialeg um yetpan an jupura.

²⁴ Eris imyiisjis ninivaijec intas o un nahaiji ra, ja eris imyipalea nahaiji ra.

²⁵ Is wat acheiachei inliinmopura ara, eris atga ura ara, ja is upyi hup a Paulo um asan tas is ethi ache ineigki, um ika, Et inivaijec intas is asaig a Aiseya naprofeta irai Nesgan Upene ehele ilpu retpoija,

²⁶ um ika, “Apan aiek ehele nup igcaki, um ika, Akupu idim atahaijeg itai aijaua, jam eti ato; akupu idim alum itai aijaua, jam eti almuktit:

²⁷ et ipjin inliinmopoi nup igcaki, um tehen intikgara, era atapanes nesganimtara ara; va eri jim alum itai an nesganimtara, ara, um atahaijeg itai an tikgara, um ato itai anliinmopura, um adumoij, mika ki ago cehcehe ra ainyak:”

²⁸ va nitai ineigki akumu ato aijaua, nikavaig, er alupai nup urai iji taka pece nitai imyiatamaig atimi ineig et ahes ehele Atua; erupu idim atahaijeg ara.

²⁹ Is wat ucce intas o un aien, eris atga ura a nupu Jutaia, um imyiisjis itai alupas jipe ira ra.

³⁰ IS amen a Paulo an mesese is ero an neom o un ineig is aunimtan aien, um leucse ra asega eris apan ehelen ara,

³¹ um asuptecnaig nelcau o Atua, um esege niji itai vai Iesu Kristo Natimarid, is esjilid nemda o un, is eti lep acaiji yin tah natimi.