Niji auritai o ilpu Apostolo 27 - Intas Etipup

Nuarin-tas alupas 27.

¹ ERIS wat ika ecri atga an nelcau an pece Itale aijama, eris ati Paulo im lep nahaiji ilpu atimi eris arore ra ehele natimi is ethi, nidan Juleus, natimi alupas o ilpu eucsupo iji ehki eris anvi nidara mika Ilpu eucsupo o Akustus.

² Ecris aridjai aijama an nelcau is ahes Atramityum, um atceijaig, mika ecri athut tarere an yipin pece Esya; is amen ehelema a Aristarkus nupu Desalonaika an pece Masetonea.

³ Is wat lahlah an tak apnyin, ecris atise inhititautau aijama Saiton. Is ago nedo upene vai Paulo a Juleus, um ika yi apahai ehele ilpu etoan aien, eri aiheuc vai yin ara.

⁴ Ecris ahes eahki aijama, um lep atceija nelcau, um athut tarere an yipin pece Saiprus va nimtinjop has.

⁵ Ecris apaahni an tuboahau Silisya im Pamfilya aijama, ja par apahai Maira, inuarin-pece an pece Lisya.

⁶ Is ecetai nelcau is ethi a natimi alupas o ilpu eucsupo is ahes Aleksantrea, eris ika yi apan Itale; is ikni cama iran aien.

⁷ Ecris tup eklim athut aijama an nadiat is ahinag, um uhum pan Naitus, ja is ehka, is has nimtinjop; ja ecris athut tarere aijama an yipin pece Kriti, ubutputet u Salmoni;

⁸ is idim ehka, ja ecris ahtaregdei aijama, um apan an nuarin is ethi nidan Nafaiava Upene; et ubutpotet pan o un nuarin-pece Lasia.

⁹ Is ti pan itac nadiat is ahinag, is lep ehka naheledvaig an naopan iyehki, is idim ti pan itac nadiat atwakam, va nitai ineigki is tas ehele ra a Paulo,

¹⁰ um ika, Ak ilpu atimi alupas, ek ato ainyak mika inyi ehka um has acen inheldai ineigki, vai nelcau, im niji itai iran, im lep nohuja.

¹¹ Ja is eteuc an tas o natimi alupas im natimi ohuun nelcau a natimi alupas o ilpu eucsupo, jam eti eteuc an tas ineig is asaig a Paulo.

¹² Is eti upene nafaiava iyehki namenvaig iran an naopan ehio, va nitai ineigki eris ika nahaiji ra is ahinag, eri ahes eahki ara um atceija nelcau, el et eti ehka napanvaig Finiks, um amen eahki an naopan ehio; nafaiava an pece Kriti iyehki, et tahijpen vai nuritoga atahaig, im lep natokorau.

¹³ Is wat eklim ara nuritoga atamaig, eris aktaktai ara mika eris; mun leh inmerit ura ara, eris atceija nelcau eahki ara, um athut; tarere an yipin pece Kriti.

¹⁴ Ja is eti laulau um apok eahki nehio alupas, nidan Yurokliton.

¹⁵ Is uhum pan nelcau, is ehka nahauvaig nohuun nimtinjop, ecris lep attai aijama.

¹⁶ Ecris athut tarere aijama an yipin haklin-pece Elata, is ehka vai cama inlehvaig bot:

¹⁷ eris wat aiyihijai ara, eris ago upene itai ara, um arorapicnaig nelcau; eris imtitaig ara va yi jim ecetaig an nauanavig, eris iknise ipan ara, is atga an nidjin nelcau.

¹⁸ Is ahlapitpit alupas irama aijama: nehio, is wat lahlah an tak apnyin, i eris arah an nelcau ara;

¹⁹ is wat ti pan itac nadiat is eseij, ecris ethaigse an jop niji itai an nelcau aijama.

²⁰ Is eti ehcohos nagesega im lep inmoijeuv ira adiat is ahinag, um lep esjilid nehio, ecris aktaktai aijama mika ecrumu eti umumoh.

²¹ Ecris eti hag aijama ira adiat is ahinag, ja is par atidai a Paulo an nuhup ura, um ika, Ak ilpu atimi alupas, eris idim ika aki imyiaiji intas unyak aijaua, um eti atceija nelcau Kriti, el et eti eteuc niji itai ehka um has iji eigki;

²² ja ek asaig ehelemia ainyak an naopan ineig mika yi emda inliinmopomia aijaua: inyi eti auah tah anuarin tah caua, nelcau ache:

²³ et mun idim aiji ehelek an nepeig ineigki a nagelo o Atua ineig, ek aheca o un ainyak, um alaigaheni vai yin,

²⁴ um ika, Jim imtitaig aiek, ak Paulo; eris idim ika napu aiji aiek an nuhup u Sisar: et mun idim lep alupai euc ra asega a Atua, eka ehratga aijaua an nelcau.

²⁵ Va nitai ineigki etmu emda inliinmopomia aijaua, ak ilpu atimi alupas: ek idim eteuc an tas o Atua ainyak, mika uhpu idivaig eh mun asaig ehelek.

²⁶ Ja eris idim ika intupu poijigjigse akaija an haklin-pece inyi ethi.

²⁷ Is wat ti pan itac nadiat is fortiin wat lep epeig, ecris apetpet jipe aijama an jop Etrea, eris aktaktai a ilpu atimi aminjina nelcau mika eris mun ubutpotet pahai an tah anpece;

²⁸ eris atagat ara, um ato, mika is twente fadom: eris eti elvathut ara, ja par lep atagat, um ato, mika is fiftiin fadom.

²⁹ Eris imtitaig ara va yi jim ecetaig an moijeh, eris atise inhititautau is for ara an nilpun nelcau itac, um merit mika yi fi adiat.

³⁰ Eris ika a ilpu atimi aminjina nelcau eri ahna an nelcau ara, eris atise bot an jop ara, um ika eri aheldai hititautau an nilpun nelcau uhup;

³¹ is um ika a Paulo ehele natimi alupas o ilpu eucsupo, im lep ehele ilpu eucsupo, El era eti amen an nelcau ara sji eigki, inyi ehka vai caua nimyiatamaig caua vaig.

³² Eris ucsamud jaula a bot a ilpu eucsupo, is um etjose an jop.

³³ Eris wat aitga nadiat ara, is ika ehele ra asega a Paulo eri hag ara, um ika, Akis amen aijaua an nadiat is fortiin um eti hag:

³⁴ va nitai ineigki ek ika ehelemia ainyak, aki hag aijaua um as-jira nohumia: inyi idim eti etjose tah numri nidjinin tah iramia.

³⁵ Is wat ucce intas o un, is leh nareto aien, um naaurineig vai Atua an nuhup ura asega: is wat iswoplecoplec aien, um atupun um caig.

³⁶ Is emda inliinmopura ara asega, eris um hag ara.

³⁷ Ecris tu huntret im sevente siks aijama asega an nelcau.

³⁸ Eris wat gaije ara, eris arah an nelcau ara, um ethaigse hwiit an jop.

³⁹ Is wat lahlah pan, eris eti ato inpece iyehki ara: ja eris ecetai nafaiava is ethi ara, im lep nauanavig iran, eris ika ara, el is eti ehka, eri imyiapan nelcau iran.

⁴⁰ Eris ucsamud jaula irai hititautau ara, um lep atceijaigse an jop, um ahiyi nitai arore nehev apos nelcau, um aiyihijai nepan va nimtinjop, um athut pahai.

⁴¹ Is apan nelcau an nuarin is ethi is acetaig injop is ero iran, is um ecetaig nelcau; is ecetaig aktit nilpun nelcau uhup, um eti amaamai, ja is ahpagrei nilpun nelcau itac nepeau alupas.

⁴² Eris tas jipe a ilpu eucsupo, um ika eri atgei ilpu atimi arore ra, va yi jim agag tah ira ra, um aha.

⁴³ Ja is merit a natimi alupas o ilpu eucsupo nimyiatamaigvaig Paulo, um acaiji naktaktai ura; um ika ehele ra sji ehki eris ato ara par agag, eri uhup ara um aliaujaise an jop, um apahai:

⁴⁴ eris lep ahman nahaiji ra irai uari-cai, im nahaiji ra irai iji itai an nelcau. Eris aiijai ara asega an pece.