Niji auritai o ilpu Apostolo 26 - Intas Etipup

Nuarin-tas alupas 26.

¹ IS um ika a Acrippa ehele Paulo, Eris ika, namu ispum asuptecnaig nedo unyum aiek. Is atgeig yapidi nikman a Paulo, um tas, um ika,

² Ak Acrippa natimarid, ek ika ainyak ek mun ahesmoij, va nitai ineig, nikavaig, ekpu auud yi aijiraig nitai iji eigki asega ainyak an nuhup unyum an nadiat ineig, era atijai irak a nupu Jutaia:

³ na idim ato upene aiek nedo asega o nupu Jutaia, im nitai iji eigki er imyiisjis itai vaig: va nitai ineigki ek ugni euc ainyak, mika an jim auatiemda irak aiek um atahaijeg nyak.

⁴ Eris ato a nupu Jutaia asega nedo unyak an takuras unyak, um imyihum pam an naopan ineig, an nupyi amen unyak ehele nup uran pece unyak Jerusalem;

⁵ eris ato nyak ara itu acen (el era ika ara eri asuptecnaig) mika kis apol ainyak irai ilpu Farisi, um imyiaiji nalaigaheni ineig iraija is opouc nagovaig.

⁶ Ja ek aiji ainyak an naopan ineig mika eri tas alep vai nyak, va nitai ineig, nikavaig, ek eteuc ainyak an tas upyi asaig o Atua ehele ilpu retpoija:

⁷ era lep aitgaig a ilpu mapoi ilpu hal o Isreel et twelv, mika eri yetpan an tas upyi asaig ineigki, um alaigaheni irai iji adiat im niji epeig. Ak Acrippa natimarid, era atijai itai irak a nupu Jutaia vai intas upyi asaig iyehki ek lep aitgaig ainyak.

⁸ Eka auri aijaua par ika et ehka vai Atua nimyianusjai ilpu atimi emesmas vaig?

⁹ Kis idim aktaktai ainyak, eris idim ika ki ago niji itai et ahinag yi has va nidai Iesu nup an Nasared:

¹⁰ kis lep ago nedo ineigki ainyak Jerusalem, um atapanes ilpu atimi upene is ahinag iraili eom ipjin, kis leh intas alep o ilpu atimi ahlap esjilid ainyak; eris wat atgei ra, kis lep adai intas vai ra ainyak:

¹¹ kis lep ehcahinag ahli ra ainyak iraili eom alaigaheni asega, um imyiisjis itai mika eri asan tas has ara; is esjilid acen intavaitap unyak ira ra, kis atmas vai ra ainyak, um yetpan irai taka uari-pece.

¹² Kis wat ago nedo ineigki ainyak um apan alaig Tamaskus, um apos intas alep o ilpu atimi ahlap esjilid, eris abrai nyak ara;

¹³ ak natimarid, is wat adiatadiat, kis ecetai inlah an nefalaig ainyak, is ahes an nohatag, is esjilid nememina o un irai nagesega, is ememina um arahed irak, im lep ira ra eris ahced nyak ara.

¹⁴ Ecris wat eropse an nobohtan aijama asega, kis atahaijeg nohran tah ainyak, is ika ehelek an tas Hibru, Ak Saulo, ak Saulo, na auri aiek par atmas vai nyak? et ehka vai euc natgaig pan itac vaig neduom irai idjai mopul.

¹⁵ Kis ika ainyak, Aiek tah natimarid a di aigko? Is um ika aien, Ek Iesu ainyak na atmas vai nyak aiek:

¹⁶ jam atidai aiek, um aiji: ek mun ehcohos ehelum ainyak va nitai ineig, mika ki ati euc mika an aheca unyak aiek, um atimi asuptecnaig nitai iji eigki na mun ecetai aiek, im lep nitai iji eigki ekpu ehcohos pam iran ehelum ainyak;

¹⁷ ekpu imyiahras euc ainyak vai nupu Jutaia, im lep vai nup urai iji taka pece ekpu abraig pan euc ira ra ainyak,

¹⁸ va apu asalgei nesganimtara aiek, mika eri ahidai ra an naupat pam u inlah, um lep ahidai ra u nemda o Satana pam iran u Atua, va uhpu eti aru nedo has ura, mika eri ehrileh namen upene ehele ilpu atimi upene, va nasgeig irak ura.

¹⁹ Va nitai ineigki, ak Acrippa natimarid, kis eti imyipalea nitai ehvaig iyehki ainyak is ahes an nohatag:

²⁰ jam upyi hup um asuptecnaig ehele ra Tamaskus, im lep Jerusalem, im lep irai iji uari pece Jutaia, im lep ehele nup urai taka pece, mika eri adumoij anliinmopura ara, um ahidaig pan ra ehele Atua, um ago nauritai iji eigki et upene va nadumoijvaig ura ara.

²¹ Va nitai iji eigki eris imyiarop irak a nupu Jutaia anliin neom ahlap, um ika eri atgei nyak.

²² Ja is atau imi nyak a Atua, va nitai ineigki ek emda ainyak um aiji um uhum pam an naopan ineig, um asuptecnaig ehele tup atimi im d lep ehele ilpu atimi alupas, um asaig is nitai iji eigki ache, eris asaig a ilpu a profeta im lep Moses, um ika, etpu yetpam:

²³ eris idim ika etpu mas a Kristo, um lep uhup um nusjai vai inmas o un, um ehvaig inlah ehele nupu Jutaia, im lep ehele nup urai iji taka pece.

²⁴ Is wat ucce intas o un, is efehtas a Festus, um ika, Ak Paulo, na ahnag aiek; na idim ahnag aiek va nato niji itai asvi itai et ahinag unyum.

²⁵ Ja is ika aien, Ak Festus, na esjilid aiek, ek eti ahnag ainyak, jam asan tas inivaijec um arapakau:

²⁶ et ato nitai iji eigki a natimarid ineig, ek tas emda ainyak an nuhup o un: ek idim ato ainyak, nikavaig, er eti adenaig tah nitai iji eigki vai yin; eris eti ago nitai ineigki an nuarin adenaig:

²⁷ ak Acrippa natimarid, na imyiisjis ninivaijec ilpu profeta aiek, ka oʼo? ek ato ainyak mika na imyiisjis ninivaijec aiek.

²⁸ Is um ika a Acrippa ehele Paulo, Et mun ubutpotet u nahidaig nyak vaig ainyak mika ki atimi o Kristo vai intas unyum.

²⁹ Is ika a Paulo, Ek ugni Atua ainyak, mika an eti idivaig nyak tintin aiek, im lep ra sji eigki asega era atahaijeg nyak ara an nadiat ineigki, jam idim idivaig nyak asega, nitai arore iji eigki ache.

³⁰ Is wat ucce intas o un, erus atidai natimarid is ero erahki, im Bernaisi, im lep ra eris ateuc ehele ehtaij ara.

³¹ Eris wat atga ura ara, um tas jipe, um ika, Is eti ago tah nitai a natimi ineigki uhpu atgei yin vaig, ka imyiarore yin.

³² Is um ika a Acrippa ehele Festus, El is eti arohoai Sisar a natimi ineigki, el eh mun atceijai yin.