Niji auritai o ilpu Apostolo 25 - Intas Etipup

Nuarin-tas alupas 25.

¹ IS wat han a Festus an pece iyehki is atimarid iran aien, is amen Sisaria aien an nadiat is eseij, ja par ahes eahki um apan Jerusalem.

² Is tas ehelen vai Paulo a natimi esjilid an nahlap, im ilpu atimi alupas o nupu Jutaia, um ugni emda yin,

³ mika yi leh imi ra aien vai yin, um abra atimi eri imyiapan yin Jerusalem; ja uhpu atpaijinai yin an nefalaig par atgei yin.

⁴ Ja is ika a Festus, Uhpu aminjinai Paulo Sisaria, um lep ika, Ekpu lep apan ainyak eahki tupko.

⁵ Is lep ika aien, Erumu ahced nyak a ilpu atimi emda iramia, um apan, um atijai itai irai natimi iyehki, el et eteuc tah nedo has o un.

⁶ Is amen ehele ra aien an nadiat is ten um eled, ja par asuol Sisaria; is wat lahlah an tak apnyin, is ateuc aien an nitai ateuc ineig eh tas alep iran, um ika eri leh pan Paulo.

⁷ Is wat apan aien, eris aiji arahed iran a nupu Jutaia eris ahes Jerusalem ara, um atijai irai Paulo intas asuptecnaig is ahinag um has, ja is ehka vai ra nago inivaijec vaig.

⁸ Ja is asuptecnai yin aien, um ika, Kis idim eti ago tah nedo has ainyak vai intas alep o nupu Jutaia, ka va neom ahlap, ka vai Sisar.

⁹ Ja is merit a Festus mika yi upene inliinmopoi nupu Jutaia vai yin, va nitai ineigki is tas aien, um ika, Nai merit aiek napanvaig Jerusalem, mika eri ahilek nitai iji eigki eahki an nuhup unyak, ka oʼo?

¹⁰ Is um ika a Paulo, Ek aiji ainyak an nuhup u nitai ateuc o Sisar eh tas alep iran, inuarin ineig eris idim ika eri ahilek nedo unyak iran: kis eti ago tah nedo has vai nupu Jutaia ainyak, na idim ato aiek:

¹¹ el ekis ago nedo has ainyak, ka tah nedo ineig et upene inmas vaig, ek eti esjum ainyak inmasvaig: ja el et eti inivaijec nitai iji eigki era atijai irak ara, inyi ehka vaig tah tup natceijaig nyak vaig imi ra: ek arohoai Sisar ainyak.

¹² Is tas jipe a Festus im ilpu atimi alupas, ja par ika, Na mun arohoai Sisar aiek; napu idim apan ehele Sisar aiek.

¹³ Is ti pan itac nadiat is eti elpat, ja erus apan Sisaria a Acrippa natimarid im Bernaisi, par aiheuc vai Festus.

¹⁴ Erus amen eahki arau ira adiat is ahinag, ja is par asuptecnaig intas vai Paulo ehele natimarid iyehki a Festus, um ika, Et amen igcaki natimi et ethi, is ude yin a Filiks an narore yin vaig:

¹⁵ kis wat amen Jerusalem ainyak, eris tas vai yin ehelek a ilpu atimi ahlap esjilid, im ilpu atimi tas alep Jutaia, um ugni nyak, mika ki asuptecnaig nimtan imi yin ainyak.

¹⁶ Kis tas ehele ra ainyak, um ika, Et ti nedo o nupu Roma ineigki par tup atceijaig tah natimi mika eri atgei yin; nedo ura ineigki, era ati natimi ineig ara er atijai itai iran an nuhup u atimi iji eig era atijai itai iran ara, um ika ehelen yi asuptecnaig nitai iji eigki aien er atijai iran.

¹⁷ Va nitai ineigki, eris wat ham ara igcaki, is wat lahlah an tak apnyin, kis auroauro ainyak um ateuc, an nitai ateuc ineig eh tas alep iran, um ika eri leh pam ehelek natimi ineigki.

¹⁸ Eris wat atidai a ilpu atimi atijai itai iran, eris eti asuptecnaig nitai iji eigki ara kis aktaktai ainyak vaig;

¹⁹ jai hal itai imyiisjis itai vaig an nalaigaheni ura, im lep vai natimi is ethi, nidan Iesu, is mas aien, ja is ika a Paulo, et umoh aien.

²⁰ Kis wat eti ato ainyak nahilekvaig nitai iji eigki, kis ahodai yin ainyak, um ika, Nai merit aiek napanvaig Jerusalem, ka oʼo, mika eri ahilek nitai iji eigki eahki?

²¹ Ja is wat arohoai Acustus a Paido, mika eri aminjinai yin yipu atahaijeg yin aien, kis ika ainyak eri aminjinai yin um imyihum pan an naopan iyehki, ekpu imyiapan yin ainyak ehele Sisar.

²² Is um ika ehele Festus a Acrippa, Ek merit ainyak natahaijegvaig natimi ineigki. Is um ika aien, Napu idim atahaijeg yin aiek imraig.

²³ Is wat lahlah an tak apnyin, is apan a Acrippa im Bernaisi, erus yecrei upene rau arau, erus apan arau anliin neom eh tas alep iran, im lep ilpu atimi alupas esjilid o ilpu eucsupo, im ilpu atimi alupas an nuarin-pece iyehki; is abra atimi a Festus, ja eris par leh pan Paulo.

²⁴ Is ika a Festus, Ak Acrippa natimarid, im ilpu atimi alupas asega, eka mun asjapicnaig pam ehelema aijaua, eka almoi natimi ineigki aijaua, eris imyiisjis itai irak vai yin a nupu Jutaia asega Jerusalem, im lep igcaki, um efehtas, um ika, Eris idim ika yi jim umoh aien.

²⁵ Ja kis wat ato ainyak, nikavaig, is eti ago tah nedo ineig aien eri atgei yin vaig, is wat lep arohoai Acustus aien, kis ika ainyak ki imyiapan yin ehelen.

²⁶ Ja ek eti ato tah nitai ineig ainyak, ekpu aged vai yin imi natimarid unyak; va nitai ineigki ek mun imyiapam yin ainyak an nuhup unyimia, im lep esjilid an nuhup unyum, ak Acrippa natimarid; uhu wit ahilek nedo o un, kit ekpu ato tah nitai ainyak par aged:

²⁷ et idim eti upene vai nyak nimyiapanvaig tah natimi ineig eris arore yin, jam eti asuptecnaig nedo has ineig er atijai iran.