Niji auritai o ilpu Apostolo 24 - Intas Etipup

Nuarin-tas alupas 24.

¹ IS wat ti pan itac nadiat is faiv, is asuol a Ananaias natimi esjilid an nahlap, im ilpu atimi tas alep, im lep natimi tas esjilid is ethi, nidan Tertullus, eris asuptecnaig nedo o Paulo ara ehele natimarid.

² Eris wat imyiapan Paulo, is atupun a Tertullus um atijai itai iran, um ika, Ak Filiks, na esjilid aiek,

³ va nitai ineigki, nikavaig, ecra idim amen upene aijama vai euc, er lep ago nedo upene an pece ineigki irai iji adiat, im lep irai iji uarin asega, va narapakau unyum, ecra leh nupene ineig aijama, um naaurineig alupas vai euc.

⁴ Ja nimyidohalav euc neig unyak, ek ugni euc ainyak, mika an aiheuc vai cama aiek, um atahaijeg intas ipjidipjid unyima.

⁵ Ecra ato aijama, nikavaig, et atimi auatatimi a nat eigki, um auahas inliinmopoi nupu Jutaia asega irai iji pece asega, et lep atimi esjilid aien ira ra era apol ira alaigaheni u nup an Nasared ara:

⁶ is lep ika aien yi auahas nitaup anliin neom ahlap: ja ecris arop iran aijama, um ika ecri aru nedo has o un et idivaig intas alep unyima;

⁷ ja is apam ehelema a Lisyas, natimi alupas esjilid o ilpu eucsupo, um atoraliak emda yin an nikmama,

⁸ um ika ehele ilpu atimi atijai itai iran eri ham ehelum ara: na wit ahodai yin aiek, napu ato aiek nitai iji eigki asega ecra atijai iran aijama.

⁹ Eris ehrasaig a nupu Jutaia, um ika, is idim ucco nitai iji eigki.

¹⁰ Is wat imyiarop nidjinin a natimarid vai Paulo mika yi asuptecnaig aien, is tas aien, um ika, Ek ato ainyak, nikavaig, as idim atimi tas alep aiek an pece ineigki an mesese is ahinag, va nitai ineigki ek eti imtitaig ainyak nasuptecnaigvaig nedo unyak:

¹¹ et tup upene vai euc natovaig, mika kis apan Jerusalem ainyak, um alaigaheni, ja par ti pan itac nadiat is twelv:

¹² eris idim eti ecet nyak ara anliin neom ahlap, ka iraili eom alaigaheni ura, ka an nuarin-pece iyehki, nimyiisjis itai vaig ehelen tah, ka nauahasvaig inliinmopoi atimi:

¹³ et lep ehka vai ra nago inivaijec vaig nitai iji eigki, era atijai irak ara:

¹⁴ ja ek asuptecnaig nitai ineigki ehelum ainyak, nikavaig, ek alaigaheni vai Atua o ilpu retpok ainyak, an nedo ineigki era anvi nidan ara par ika intakitai, um imyiisjis ninivaijec nitai iji eigki asega, eris aged an tas alep im lep an tas u ilpu profeta:

¹⁵ ek lep asgeig irai Atua ainyak, era lep asan tas ineigki ara, mika erupu anusjai natimi vai inmas ura, ilpu atimi upene im lep ilpu atimi auatatimi:

¹⁶ ek auritai ainyak an nedo ineigki, mika yi upene inliinmopok; ainyak vai Atua im lep va atimi irai iji adiat:

¹⁷ is wat ti pan itac inmesese is ahinag, kis ham ainyak, um apos naiheuc vai nup uran pece unyak,: im niji itai ahlap:

¹⁸ kis wat ago nedo ineigki ainyak, eris ecet nyak anliin neom ahlap nadicinadicinvaig hal upu. Jutaia eris ahes Esya ara, ja kis eti amen ehele atimi is ahinag ainyak, is eti lep eteuc nehtauo;

¹⁹ el era ato tah nitai vai nyak ara, el et upene vai ra napamvaig igcaki an nuhup unyum, um atijai irak:

²⁰ el eris ecetai tah nedo has unyak ara sji eigki an naiji unyak an nuhup u nasjapicnaig o ilpu atimi alupas ura, erumu lep asuptecnaig ara;

²¹ intas is ethi ache ineigki, nikavaig, kis aiji ainyak an nuhup ura, um efehtas, um ika, Er ahilek nedo unyak an naopan ineig va nusjai o atimi vai inmas ura.

²² ¶ Is wat atahaijeg nitai iji eigki a Filiks, is acaiji ra aien, va nupyi ato upenc nedo ineigki o un, um ika, Et wit ham a Lisyas natimi alupas esjilid o ilpu eucsupo, ekpu ahilek upene nitai iji eigki unyimia ainyak.

²³ Is ika aien ehele natimi alupas o ilpu eucsupo yi aminjinai Paulo aien, um jim arore yin, um jim acaiji ilpu etoan mika eri jim ham ehelen ara, um aheca o un.

²⁴ Is wat ti pan itac nadiat is eti elpat, is han a Filiks im Trusilla ehgan, is takata Jutaia aien, is ahlaig vai Paulo aien, um atahaijeg intas o un va nimyiisjis ninivaijec vai Kristo.

²⁵ Is tas aien va nedo atoh, im nedo upene, im nadiat almaijidjid etpu yetpam, ja is ucjucjucaij a Filiks, um ika, Atga unyum aiek an naopan ineig; ek wit tup eklim amen ainyak, ja par ahlaig vai euc.

²⁶ Is lep aktaktai aien mika etpu alupai yin mune a Paulo, mika yipu atceijai yin aien: va nitai ineigki is ehcahinag ahlaig vai yin aien, um tas ehelen.

²⁷ Is wat ti pan itac inmesese is ero, is isjipigmoig Filiks a Porsyus Festus: ja is merit a Filiks mika yi upene inliinmopoi nupu Jutaia vai yin, va nitai ineigki is ude Paulo aien an narore yin vaig.