Niji auritai o ilpu Apostolo 23 - Intas Etipup

Nuarin-tas alupas 23.

¹ IS almaijidjid jipe ilpu atimi alupas asjapicnaig a Paulo, um ika, Ak ilpu etoak, kis ago nedo upene ainyak an nuhup o Atua um imyihum pam an naopan ineig.

² Is ika a Ananaias, natimi esjilid an nahlap, ehele ra eris aiji ehelen ara, eri ahpoi nipjineucsen.

³ Is um ika ehelen a Paulo, Etpu lep ahpoi euc a Atua, ak nathatahau ahi: na ateuc aiek par ahilek nedo unyak, et idivaig intas alep, ja na idim edwedwai intas alep aiek, um ika eri ahpoi nyak!

⁴ Eris um ika ara sji ehki eris aiji ehelen ara, Na idim asan tas has vai natimi esjilid an nahlap o Atua aiek.

⁵ Is um ika a Paulo, Ak ilpu etoak, ek mun eti ato ainyak, nikavaig, natimi esjilid an nahlap ineigki: eris aged, um ika, “Jim asan tas has aiek vai natimi alupas an pece unyum.”

⁶ Is wat ato a Paulo, nikavaig, eris ilpu Satusi nahaiji ra, um lep ilpu Farisi nahaiji ra, is efehtas aien an nuhup u ilpu atimi alupas, um ika, Ak ilpu etoak, ek Farisi ainyak, um lep inhal o Farisi: er ahilek nedo unyak, va nitai ineig, nikavaig, ek aitga atimi emesmas ainyak mika eri anusjai vai inmas ura.

⁷ Is wat ucce intas o un, eris ehtauo jipe a ilpu Farisi im ilpu Satusi: is lep acheiachei jipe intas o atimi asega.

⁸ Era ika a ilpu Satusi, eri eti lep anusjai natimi, um eti eteuc a ilpu agelo im nesga atimi: ja era ika a ilpu Farisi et inivaijec nitai iji eigki asega.

⁹ Is atupun nimyiisjis itai esjilid: eris atidai a ilpu atimi esege irai ilpu Farisi, um imyiisjis itai, um ika, Ecra eti ecetai tah nedo has ehele natimi ineigki aijama: ja el is, tas ehelen tah nesga atimi, ka tah nagelo, ti jim ati nedoa vai Atua akaija.

¹⁰ Is wat esjilid nehtauo ura, is imtitaig a natimi alupas esjilid o ilpu eucsupo, va eri jim atgeig yamud Paulo ara, is abrai ilpu eucsupo aien mika eri apan ara, um atoraliak yin ira ra, um imyiapan yin an nimnim o ilpu eucsupo.

¹¹ ¶ Is wat epeig, is aiji ehelen a Natimarid, um ika, Etmu emda inliinmopom aiek, ak Paulo: na mun idim asuptecnaig nyak aiek Jerusalem, et um ucco, eris idim ika napu lep asuptecnaig nyak aiek Roma.

¹² IS wat lahlah an tak apnyin, eris teduarin nahaiji nupu Jutaia, um asjis vai yin, um ika eri eti hag ara um eti umwig, jam upyi hup um atgei Paulo.

¹³ Eris forte ara sji ehki um eled, eris teduarin ara.

¹⁴ Eris apan ehele ilpu atimi ahlap esjilid ara, im ilpu atimi tas alep, um ika, Ecra asjis vai Paulo aijama, mika ecri eti hag, jam upyi hup um atgei yin:

¹⁵ va nitai ineigki akumu aged nitasvitai aijaua, im lep ilpu atimi alupas, imi natimi alupas esjilid o ilpu eucsupo mika yi imyiapan yin ehelemia aien imraig, va nika unyimia aki ahodaig upene yin va nedo o un: ecra imyiiris aijama par atgei yin, inyi idim eti apam ubutpotet aien.

¹⁶ Is wat atahaijeg a inhal o natahaig irai Paulo, nikavaig, eris atpaijinai ara, is apan aien an nimnim o ilpu eucsupo, um asaig ehele Paulo.

¹⁷ Is ahlaig vai natimi alupas o ilpu eucsupo is ethi a Paulo, um ika, Imyiapan intakuras ineigki aiek ehele natimi alupas esjilid unyimia: et merit aien nasuptecnaigvaig ehelen tah nitai.

¹⁸ Is leh yin aien, um imyiapan yin ehele natimi alupas esjilid, um ika, Is ahlaig vai nyak a Paulo, natimi eris arore yin, um ugni nyak mika ki imyiapam intakuras ineigki ainyak ehelum, et merit aien nasuptecnaigvaig ehelum tah nitai.

¹⁹ Is atau an nikman a natimi alupas esjilid, um echim imyiapan yin an taka uarin, um ahodai yin, um ika, Inhe ineigki nai merit aiek mika an asuptecnaig ehelek?

²⁰ Is um ika aien, Era mun ehras ika a nupu Jutaia eri ugni euc, mika an imyiapan Paulo aiek ehele ilpu atimi alupas imraig, va nika ura eri ahodaig upene yin va nedo o un:

²¹ ja an jim adai intas ura aiek: era atpaijinai yin natimi et forte um eled ira ra, eris asjis ara, um ika, eri eti hag um eti umwig, jam upyi hup um atgei yin: era imyiiris yin ara an naopan ineig, um aitgaig intas unyum.

²² Is abrai intakuras iyehki a natimi alupas esjilid, mika yi atga o un, um ika, Jim asaig ehelen tah natimi aiek mika na mun asuptecnaig nitai iji eigki ehelek.

²³ Is ahlaig vai ohwat atimi alupas o ilpu eucsupo aien, um ika, Arumu yecrei ilpu eucsupo inyi tu huntret aijaurau, im ilpu atimi atga a hors inyi sevente, im ilpu atimi apos mopul hat inyi tu huntret, par apan Sisaria an jupjupura;

²⁴ um ikni hal hors va uhpu atijai Paulo iran, um imyiapan upene yin ehele Filiks natimarid.

²⁵ Is lep aged nitasvitai aien et idivaig ineig, um ika,

²⁶ Ak Filiks natimarid, na esjilid aiek, ek aiheuc vai euc ainyak Clatyus Lisyas.

²⁷ Eris arop irai natimi ineigki a nupu Jutaia, um ika eri atgei yin: ja kis wat ato ainyak, nikavaig, is upu Roma aien, kis apan ainyak im lep ilpu eucsupo, um imyiahras yin.

²⁸ Kis merit ainyak natovaig nitai iji ineigki eris atijai iran, um imyiapan yin an nuhup u ilpu atimi alupas ura:

²⁹ ja kis ecetai ainyak eris atijai iran niji itai er imyiisjis itai vaig an tas alep ura, jam eti atijai iran tah nitai ineig uhpu atgei yin vaig, ka arore yin vaig.

³⁰ Eris wat asuptecnaig ehelek, mika eris atpaijinaig natimi ineigki a nupu Jutaia, kis auroauro ainyak um abraig pan yin ehelum, um lep ika ehele ilpu atimi atijai itai iran, eri asuptecnaig nedo o un ara an nuhup unyum. Kaiheuc vai euc.

³¹ Eris leh Paulo a ilpu eucsupo, is idivaig eris asaig ehele ra, um imyiapan yin Antipatris an nepeig.

³² Is wat lahlah an tak apnyin, eris ude ilpu atimi atga a hors ara par ahced yin, um lep adumoij pan an nimnim o ilpu eucsupo:

³³ eris wat yetpan Sisaria ara, eris alupai natimarid nitasvitai iyehki ara, um ati Paulo an nuhup o un.

³⁴ Is esvi a natimarid, ja par ahodaig inpece o un. Is wat ato aien, nikavaig, is upu Silisya aien,

³⁵ is ika aien, Ekpu atahaijeg euc ainyak, eru wit lep ham a ilpu atimi atijai itai iram. Is ika aien eri aminjinai yin anliin neom tas alep iran o Herot.