Niji auritai o ilpu Apostolo 22 - Intas Etipup

Nuarin-tas alupas 22.

¹ AK ilpu atimi alupas, ilpu etoak, akumu atahaijeg nyak aijaua, ki tas ehelemia ainyak an naopan ineig.

² (Eris wat atahaijeg yin ara intasvaig ehele ra an tas Hibru, is adese upene neigpa ira ra ara: is ika aien,)

³ Ek idim upu Jutaia ainyak, eris apos nyak Tarsus, an pece Silisya, jai kis par alupas ainyak an nuarin-pece ineigki, an neduei Camelyel, eris esege imi nyak mika ki imyiaiji upene intas alep o ilpu retpoija, kis emda ainyak vai Atua, um idivai caua asega an naopan ineig:

⁴ kis edemda va nedo ineigki ainyak, um atgei atimi vaig, um arore ilpu atamaig im ilpu takata, um ikni ra iraili eom ipjin.

⁵ Et idim ato a natimi esjilid an nahlap, im lep ilpu atimi tas alep asega: kis leucse itasvitai ehele ra ainyak imi ilpu etoaija,um apan alaig Tamaskus, mika ki arore ra sji ehki eris amen eahki ara, um imyiapan ra Jerusalem, mika eri atgei ra.

⁶ Kis wat atga an nefalaig ainyak, wat ubutpotet pan Tamaskus an nadiatadiat, is idim auroauro um ememina inlah alupas an nohatag um arahed irak:

⁷ kis eropse an nobohtan ainyak, um atahaijeg nohran tah, is ika ehelek, Ak Saulo, ak Saulo, na auri aiek par atmas vai nyak?

⁸ Kis ika ainyak, Aiek tah Natimarid a di aigko? Is um ika ehelek aien, Ek Iesu an Nasared ainyak, na atmas vai nyak aiek.

⁹ Eris idim almoi inlah a ilpu atimi ahced nyak, um imtitaig; jam eti atahaijeg nohran natimi ineig is tas ehelek aien.

¹⁰ Kis ika ainyak, Inki ago inhe ainyak, ak Natimarid? Is um ika ehelek a Natimarid, Atidai aiek, um apan Tamaskus; uhpu asuptecnaig ehelum eahki nitai iji eigki asega eris idim ika napu ago aiek.

¹¹ Kis eti alum itai ainyak va nememina o inlah iyehki, eris atau an nikmak a ilpu atimi ahced nyak, um imyiapan nyak Tamaskus.

¹² Is amen eahki natimi is ethi, nidan Ananaias, is apos upene intas alep aien, eris asan tas upene vai yin a nupu Jutaia asega eris amen eahki ara:

¹³ is yetpam ehelek aien, um aiji ithak, um ika ehelek, Ak etoak Saulo, etmu lep lah nesganimtam aiek. Kis alum yin ainyak tup an nuarin-nadiat iyehki.

¹⁴ Is ika aien, Is ati euc a Atua o ilpu retpoija, mika an ato aiek intas o un, um alum Natimi Upene iyehki, um atahaijeg nohran:

¹⁵ napu atimi asuptecnai yin aiek ehele atimi asega, va nitai iji eigki as almoi aiek um atahaijeg vaig:

¹⁶ na auri aiek pah tup amen? atidai aiek, um leh nabaptiso iram, um yiri euc va nedo has unyum, um arohoan nidai Natimarid.

¹⁷ Kis wat adumoij pan Jerusalem ainyak, um alaigaheni anliin neom ahlap, kis ahuumtidec ainyak;

¹⁸ um ecet yin is ika ehelek aien, Auroauro aiek, um efi ahes Jerusalem, um atga unyum: va nedo ura, nikavaig, eri eti leh intas asuptecnaig nyak unyum ara.

¹⁹ Kis ika ainyak, Ak Natimarid, era ato ara, nikavaig, kis atapanes ilpu atimi asgeig iram ainyak iraili eom ipjin, um aredei ra iraili eom alaigaheni asega ura:

²⁰ eris wat atladwi inja irai Stifanus, natimi asuptecnai euc iyehki, kis aiji ubutpotet ainyak, um adai intas ura vai inmas o un, um lep aminjina apelumai ura eris atgei yin ara.

²¹ Is um ika ehelek aien, Apan aiek: ekpu abrai euc ainyak mika an apan aiek itac acen ehele nup urai taka pece.

²² ¶ Eris atahaijeg yin ara um yetpan u intas ineigki, ja eris par ahlaig ijinies ara, um ika, Eri atgei nat naico an nobohtan: et eti upene vai yin numohvaig.

²³ Eris ahlaig ijinies ara, um aduacrei ira apelumai ura, um ehrinma an nohatag;

²⁴ is um ika a natimi alupas esjilid, eri imyiapan yin an nimnim o ilpu eucsupo, is ika aien yi aredei yin par ahilek nedo o un, um ato, nikavaig, eris ehtauo vai yin ara is ucce vanhe.

²⁵ Eris wat arore yin ara irai wau, is ika a Paulo ehele natimi alupas o ilpu eucsupo is aiji ubutpotet ehelen aien, Et itaup vai caua, ka oʼo, naredeivaig natimi ineig et upu Roma aien, eris eti asaig nedo has oun?

²⁶ Is wat atahaijeg a natimi alupas o ilpu eucsupo, is apan aien um asaig ehele natimi alupas esjilid, um ika, Aktaktai nitai ineig napu ago aiek; et upu Roma a natimi ineigki.

²⁷ Is apan a natimi alupas esjilid, um ika ehelen, Asuptecnaig ehelek j aiek, na upu Roma aiek, ka oʼo? Is um ika aien, Maiya.

²⁸ Is um ika a natimi alupas esjilid, Kis auanimtan alupas natimi alupas ineigki ainyak. Ja is ika a Paulo, Eris wat apos nyak, kis idim hisko ainyak.

²⁹ Eris auroauro um ude yin a ilpu atimi iji ehki eris ika ara eri aredei yin: is wat ato a natimi alupas esjilid mika is upu Roma aien, is imtitaig aien va narore yin vaig o un.

³⁰ Is wat lahlah an tak apnyin, is merit aien nato upene vaig nitai iji eigki eris atijai iran a nupu Jutaia, va nitai ineigki is ahiyi yin aien, um ika ehele ilpu atimi ahlap esjilid im ilpu atimi alupas asega ura, eri a asjapicnaig ara, is imyiapan Paulo ehele ra aien, um ati yin an nuhup ura.