Niji auritai o ilpu Apostolo 21 - Intas Etipup

Nuarin-tas alupas 21.

¹ ECRIS wat ude ra aijama, um atceija nelcau, ecris aheldaktit inpece Koos aijama um apahai, is wat lahlah an tak apnyin, ecris apan Rots aijama, um lep ahes eahki um apahai Patara:

² ecris ecetai nelcau eahki aijama eris ika yi apan Finaisi, ecris ahlaujai iran aijama, um atceijaig.

³ Ecris ecetai Saiprus aijama, um ude pan itac an mouma, um atga an jop um apan Sirya, um apah ai Tairus: eris ika eri arah an nelcau eahki.

⁴ Ecris ecet ilpu atimi alaigaheni aijama, um amen eahki an nadiat is seven: eris ika ara ehele Paulo irai Nesgan Upene yi jim apan Jerusalem aien.

⁵ Is wat ti pan itac nadiat iji ehki, ecris atga unyima aijama; eris ahced cama ara asega, im ehgara, im ilpu hal ura, um yetpan an yipin nuarin-pece ura itac: ecris atpuse aijama an nohmunjop, um alaigaheni.

⁶ Ecris wat aiheuc vaig jipe cama aijama, ecris ahlaujai an nelcau aijama; eris um lep adumoij pan irai imnin ura ara.

⁷ Ecris ahes Tairus aijama, um apan an jop, um apahai ehnaijai Tolemees,um aiheuc vai ilpu etoama, um amen ehele ra an nadiat is ethi.

⁸ Is wat lahlah an tak apnyin, ecris ahes eahki aijama ilpu atimi ahced Paulo, um yetpan Sisaria; ecris apan aijama anliin neom o Filipus, natimi asuptecnaig intas-upene, is atimi is ethi aien ira atimi is seven iji ehki, um amen ehelen.

⁹ Is for inhalav atahaig o un, eris tup amen ara, um ahidan nesege.

¹⁰ Ecris wat amen aijama eahki an nadiat is ahinag, is ahes Jutaia naprofeta is ethi, nidan Acabus.

¹¹ Is apan ehelema aien, um leh nitai ahid o Paulo, um arore nikman im neduon iran, um ika, Et ika a Nesgan Upene, Et idim ucco erupu arore natimi ohuun nitai ahid ineigki a nupu Jutaia era amen Jerusalem ara, um alupai nup urai taka pece yin.

¹² Ecris wat atahaijeg nitai iji eigki aijama, ecris ugni yin aijama im lep nup eahki, mika yi jim apan Jerusalem aien.

¹³ Ja is um ika a Paulo, Inhe ineigki eka ago aijaua, par ehteigtaig um aduoprei inliinmopok? ek mun idim apena ainyak va nika eri arore nyak, im lep vai inmas unyak Jerusalem, va nidai Iesu Natimarid.

¹⁴ Is wat eti adai intas unyima aien, ecris eti lep imyiisjis iran aijama, um ika, Tup Natimarid marom.

¹⁵ Is wat ti pan itac nadiat iji ehki, ecris auaraga aijama,um apan Jerusalem.

¹⁶ Eris lep ahced cama nahaiji ilpu atimi alaigaheni Sisaria, eris imyiapan cama ehele natimi is ethi ara, nidan Neson, nupu Saiprus, is upyi alaigaheni aien, mika ecri amen ehelen aijama.

¹⁷ ECRIS wat apan Jerusalem aijama, eris leucse cama a ilpu etoama, um imyiacitak.

¹⁸ Is wat lahlah an tak apnyin, is ahced cama a Paulo, um apan ehele Jakobus; eris asjapicnaig eahki a ilpu atimi tas alep asega.

¹⁹ Is aiheuc vai ra aien, um asuptecnaig athiathi nitai iji eigki is ago a Atua irai nup urai taka pece an nauanaheca o un.

²⁰ Eris wat atahaijeg ara, eris imyiahpas Natimarid ara, um ika ehelen, Ak etoama, na alum nupu Jutaia aiek, era ehcahinag dausant ara era imyiisjis ninvaijec ara; jam apol emda an tas alep ara asega:

²¹ eris atahaijeg ara, nikavaig, na esege imi nupu Jutaia asega aiek era amen ehele nup urai taka pece ara, mika eri ude intas alep o Moses ara, um ika eri jim aperitome irai ilpu hal ura, um jim apol an nedo u nupu Jutaia;

²² inti ago inhe akaija? erupu atahaijeg natimi asega, nikavaig, na mun ham aiek: erupu idim asjapicnaig ara:

²³ namu idim ago nedo ineig aiek ecri asaig ehelum aijama: era amen ehelema natimi et for et eteuc ira ra intas upyi asaig ura;

²⁴ leucse ra aiek, um ago itaup ra im lep euc, um auanimtan nitai ahlap vai ra, mika eri eucsei nidjinira ara: erupu ato natimi asega, nikavaig, et eti inivaijec nitai iji eigki eris atahaijeg vai euc ara; jai na ago nedo atoh aiek, um imyiaiji intas alep:

²⁵ ja ecris aged nitasvitai aijama va nup urai taka pece, era imyiisjis ninvaijec ara, mika eri jim ago nedo ineigki ara, jam aminjinai ra va nitai iji eigki er ahlap iran vai ilpu atmas, im lep inja irai itai, im niji itai er alcinwan, im ingaijid.

²⁶ Is leucse natimi iji ehki a Paulo, is wat lahlah an tak apnyin, is ago itaup ra aien, im lep yin, um apan anliin neom ahlap, par asuptecnaig mika uhpu apos nadiat iji ehki eris ago itaup ra iran, um lep ahlap vai ra asega.

²⁷ Is wat ubutpotet o inti pan itac vaig nadiat is seven iji ehki, eris ecet yin anliin neom ahlap a nupu Jutaia eris ahes Esya ara, eris auahas inliinmopoi atimi asega ara, um arop iran,

²⁸ um ahlaig ijinies, um ika, Ak nupu Isreel, atau imi cama aijaua; natimi iyehki mun eigki, et auoh intak esege imi atimi asega aien irai iji pece asega vai nupu Jutaia, im intas alep, im nimnim ineigki: et mun lep imyiapan nupu Crisi aien anliin neom ahlap, um auahas nitaup an nimnim ineigki.

²⁹ Eris upyi hup ara um ecet Trofimus nupu Efesus ehelen an naurin-pece, eris aktaktai ara, mika is imyiapan yin anliin neom ahlap a Paulo.

³⁰ Eris edemda a nup an naurin-pece asega, eris athut natimi um asjapicnaig: eris arop irai Paulo an neom ahlap ara, um aihiaig pok ijo yin: eris um atapanes irai eucse neom.

³¹ Eris ika ara eri atgei yin; ja is yetpan intas ehele natimi alupas esjilid o ilpu eucsupo, nikavaig, Era ehtauo a nupu Jerusalem asega:

³² is auroauro aien um leucse ilpu eucsupo, im ilpu atimi alupas ura, um athut pan ehele ra: eris wat ecet natimi alupas esjilid ara im ilpu eucsupo o un, eris eropropse ara, um eti aredei Paulo.

³³ Is apan ubutpotet a natimi alupas esjilid, um arop iran, um ika eri arore yin an natau hat yi ero; is ahoda atimi aien, um ika, Di neigki? et mun ago inhe aien?

³⁴ Eris asaig tah nitai tah ra, um lep asaig tah nitai tah ra, ira atimi asega: ja is wat ehka vai yin nato upene vaig va nehtauo ura, is ika aien eri imyiapan yin an nimnim o ilpu eucsupo.

³⁵ Is wat yetpan aien an naforofata, eris idim apos yin a ilpu eucsupo va natamerit o atimi.

³⁶ Eris apitac natimi is ahinag, um ahlaig ijinies, um ika, Eri atgei yin.

³⁷ Eris wat ika eri imyiapan Paulo an nimnim o ilpu eucsupo, is um ika aien ehele natimi alupas esjilid, Et upene vai nyak intasvaig ehelum, ka oʼo? Is ika aien, Na ato intas Crisi aiek, ka oʼo?

³⁸ na upu Ijipt iyehki aiek, ka oʼo, is ehtauo an naopan iyehki aien, um imyiapan an namasacen natimi is for dausant eris atgei atmas ara?

³⁹ Is um ika a Paulo, Oʼo, ek idim upu Jutaia ainyak, eris apos nyak Tarsus, an pece Silisya, ek atimi an nuarin-pece esjilid et ethi ainyak: ek ugni euc ainyak, mika an asaig aiek ki tas ehele atimi ainyak.

⁴⁰ Is wat adai intas o un aien, is atidai a Paulo an naforofata, um ahpoijaiji atimi. Is adese neigpa ira atimi asega, is tas ehele ra aien an tas Hibru, um ika,