Niji auritai o ilpu Apostolo 20 - Intas Etipup

Nuarin-tas alupas 20.

¹ IS wat esjaigse nehtauo iyehki, is asjapicnai ilpu atimi alaigaheni ehelen a Paulo, um aiheuc vai ra, ja par atga o un, um apan alaig Masetonea.

² Is ahced niji pece iji ehki aien, um ated emda atimi, ja par yetpan an pece Crisi;

³ is amen aien eahki an mohoc is eseij. Is wat ika aien yi atga an nelcau um apan Sirya, eris imyiiris yiu a nupu Jutaia; ja is ika aien yi adumoij um atga an pece Masetonea.

⁴ Eris ahced pan yin Esya a Sopater nupu Beria; im Aristarkus im Sekuntus, ohwat upu Desalonaika; im Ceus nupu Terbe, im Timodeus; im Tikikus im Trofimus, ohwat upu Esya.

⁵ Eris upyi uhup ara sji ehki, um apan Troas um aitgai cama.

⁶ Is wat ti pan itac nadiat iji ehki eris ecaig nareto is ti leven iran, ecris ahes Filipai aijama, um atga an nelcau an nadiat is faiv, um yetpan Troas ehele ra; ecris amen eahki aijama an nadiat is seven.

⁷ ¶ An nadiat uhup irai wiik, eris wat asjapicnaig a ilpu atimi alaigaheni par iswiswoplec nareto, is asuptecnaig intas ehele ra a Paulo, is ika aien yi wit lahlah an tak apnyin yi atga o un; is tas aien um yetpan an nijihgan nepeig.

⁸ Is ahinag incop alahala an nuarin-neom ijinies iyehki eris asjapicnaig iran ara.

⁹ Is ateuc, an mun-neom intakuras is ethi, nidan Yutikus, is umjeg acen aien: is wat tas opra a Paulo, is umjeg acen aien, um etjo an nuarin-neom ijinies, um ahtaregdei nuarin-neom is ero; eris alcacse yin, ja is mas aien.

¹⁰ Is asuol a Paulo um aropjai iran, um ahlaijeraig pam yin, um ika, Akumu atinau aijaua; et umoh aien.

¹¹ Is lep aridjai aien, um aswaplec nareto, um caig, um tas is itu iran, um yetpan an nahraren nepeig, ja par atga o un.

¹² Eris imyiapan intakuras iyehki ara is umoh aien, um imyiacitak alupas.

¹³ Ecris upyi hup aijama, um atceija nelcau, um apan Assos, ecris ika aijama ecri leh Paulo eahki, is idivaig nasaig o un; is ika aien yi atga ubos.

¹⁴ Is wat uhum pan cama aien Assos, ecris leh yin aijama, um apan Mitelini.

¹⁵ Ecris ahes eahki aijama um atga an nelcau, is wat lahlah an tak apnyin, ecris apan aijama ubutpotet Kaios; is wat lep lahlah an tak apnyin, ecris yetpan Semos aijama, um amen Trocilyum; is wat lep lahlah an tak apnyin, ecris yetpan Melitus aijama.

¹⁶ Is ika a Paulo yi ahtaregdei Efesus, is esjum aien namenvaig Esya yi itu iran: is auroauro aien par apan Jerusalem, va nadiat Pentekost, el is eti ehka vai yin.

¹⁷ ¶ Is abra atimi Melitus aien, mika eri apan Efesus ara, um imyiacaij ilpu atimi tas alep an nakalasia.

¹⁸ Eris wat apan ehelen ara, is um ika ehele ra aien, Eka ato aijaua nedo unyak ehelemia irai iji adiat, an naopan iyehki kis ham Esya ainyak, um imyihum pam an naopan ineig,

¹⁹ kis aheca o Atua ainyak, um esjilid nupoupo u inliinmopok, is lep ahinag nidi imtak, im nohocred is yetpam irak va nimyiiris nyak u nupu Jutaia:

²⁰ kis eti lep ateri tah nitai ineig ainyak is upene vai caua, ja kis ehvaig ehelemia ainyak, um esege imi caua an nasjapicnaig unyimia, im lep irai iji imnim,

²¹ um asuptecnaig ehele nupu Jutaia, im nupu Crisi, mika eri adumoij anliinmopura ara vai Atua, um imyiisjis ninivaijec vai Iesu Kristo Natimarid uja.

²² Ekpu lep apan Jerusalem ainyak an naopan ineig vai inmerit o inliinmopok, jam eti ato nitai iji eigki etpu yetpam irak eahki:

²³ nitai ineig ache, et asuptecnaig a Nesgan Upene irai iji uari-pece, um ika, et aitgaig nyak inwau im nohocred.

²⁴ Ja ek eti imtitaig tah nitai iji eigki ainyak, um eti lep aktaktai alupas numoh unyak, vai ekpu ahni nathut unyak ainyak, um imyiacitak, um atiid nauritai ineig, kis leh ehele Iesu Natimarid ainyak, par asuptecnaig intas-upene va naiheuc o Atua.

²⁵ Ek idim ato ainyak, nikavaig, aki ti lep almoi nesganimtak aijaua asega, kis cedwei jipe caua ainyak um asuptecnaig intas va nelcau o Atua.

²⁶ Va nitai ineig ek asaig ainyak an nuhup unyimia an nadiat ineigki mika, Ek adicinadicin ainyak vai inja ira atimi asega.

²⁷ Kis eti auatialidi ainyak par asuptecnaig ehelemia intas asega o Atua.

²⁸ Akumu aminjinai caua aijaua, im lep siip o un asega is ikni caua ilpu atimi aminjinai ra a Nesgan Upene, par alayi nup an nakalasia o Atua, is auarimta ra aien an ja iran.

²⁹ Ek ato nitai ineigki ainyak, nikavaig, ek wit atga unyak ainyak, erupu ham ehelemia kuri aleg has, um auahas siip o un:

³⁰ erupu lep atidai nahaiji atimi iramia, um asaig intas ahcil, mika eri aihiaig pan itac ilpu atimi alaigaheni ehele ra.

³¹ Va nitai ineigki akumu aiji aijaua, um imyiehva nedo unyak, nikavaig, kis eti atumop ainyak, um taig, um ated caua asega irai iji adiat im niji epeig, an mesese is dri.

³² Ak ilpu etoak, ek ikni caua ainyak an naopan ineig ehele Atua, im lep intas aiheuc o un; et emda aien par ahidaig emda inliinmopomia, um alupai caua namen upene ehele ilpu atimi upene asega.

³³ Et eti has irak ainyak silver, im colt, im napelumai o un tah:

³⁴ maiya, eka idim ato aijaua, nikavaig, is auritai nikmak ineigki va nitai imyiatamaig nohuk, im lep vai ra eris amen ehelek ara:

³⁵ kis asuptecnaig ehelemia ainyak niji itai asega, mika aki idim auritai aijaua um idivai nyak, um aiheuc vai ilpu atimi auatialidi, um imyiehva intas o Iesu Natimarid, is ika aien, Et esjilid nimyiacitak ura era tup ahtai itai ara, irai imyiacitak ura era leh itai ara.

³⁶ ¶ Is wat asaig ehni nitai iji eigki aien, is atpuse aien, um alaigaheni ehele ra asega.

³⁷ Eris ehteigtaig alupas ara asega, um ablaijiraig pam Paulo, um aijumnyi yin;

³⁸ is esjilid intaig ura vai intas ineigki o un is ika aien, eri ti lep almoi nesganimtan ara. Eris ahced yin ara, um apan u nelcau.