Niji auritai o ilpu Apostolo 2 - Intas Etipup

Nuarin-tas alupas 2.

¹ IS wat yetpam nadiat Pentekost, eris ehramen ara asega an nuarin is ethi, is tup ethi ache inliinmopura.

² Is auroauro um ahes an nohatag nohran tah is idivaig inmotjan nimtinjop alupas, is apaahni um ohua an neom ineig eris ateuc iran ara.

³ Is ehcohos ehele ra namai atimi eris ahaig, is idivaig incop, is ateuc ijinies ira ra asega.

⁴ Is amen alupas anliinmopura a Nesgan Upene, eris atupun ara um tas irai taka tas, is idivaig is alupai ra intas a Nesgan Upene.

⁵ Eris amen Jerusalem a ilpu atimi upene, nupu Jutaia, eris ahes irai iji pece asega ithan nohatag ara.

⁶ Is wat apaahni nitai ineigki, eris asjapicnaig natimi is ahinag; eris wat atahaijeg ra atimi asega intasvaig irai iji tas ura, is ehioehio inliinmopura ara,

⁷ Eris imyiali ara asega, um imyilyaujai, eris ika jipe ehele ra ara, Almoi, era upu Calili ara sji eigki asega era tas ara;

⁸ ja et echamecha? inta atahaijeg intas akaija asega iraipece iji eig eris apos caija iran:—

⁹ intas u nupu Pardya, im nupu Mitya, im nupu Elam, im ra eris amen Mesopotemya ara, im Jutaia, im Kapatosya, im Pontus, im Esya,

¹⁰ im Frijya, im Pamfilya, im Ijipt, im nup urai uari pece Libya ubutpotet Sairini, im ilpu atimi ahes Roma, eris upu Jutaia, um leh nalaigaheni u nupu Jutaia nahaiji ra,

¹¹ im nupu Kriti, im nupu Arebya,—inta atahaijeg ra akaija nasuptecnaigvaig niji auritai esjilid o Atua irai tas uja.

¹² Eris imyiali ara asega, um eti ato, um ika jipe ehele ra, Et echamecha?

¹³ Eris imyiafakahcil nahaiji ra, um ika, Era ahnag natimi iji eigki va waina mat

¹⁴ ¶ Ja is atidai a Pitrus im lep natimi is eleven, um efehtas, um ika ehele ra, Ak nupu Jutaia, im ilpu atimi amen Jerusalem, akumu ato nitai ineigki aijaua asega, um atahaijeg intas unyak:

¹⁵ era eti ahnag ara sji eigki, et idivaig eka aktaktai aijaua, et adiat metto ache ineigki:

¹⁶ jai nitai ineig is asaig a Joel naprofeta,

¹⁷ um ika, “Et ika a Atua, Ekpu atladwi Nesgak ainyak ira atimi asega ira adiat apitac: erupu ahidan tas a ilpu halav atamaig unyimia im ilpu halav atahaig unyimia, erupu ecetai niji itai ehvaig a ilpu takuras unyimia, erupu umjeg ahnag a ilpu fatimi unyimia:

¹⁸ ekpu atladwi Nesgak ainyak irai ilpu aheca atamaig unvak im ilpu aheca atahaig unyak ira adiat iji ehki; erupu ahidan tas ara:

¹⁹ ekpu ehvaig niji itai imyiali ainyak ijinies an nohatag, im niji itai asjaaicnaig sepagko an nobohtan, nikavaig, inja, im incop, im naupat va nadran cop:

²⁰ etpu aupat nagesega, um idivaig inja inmohoc, ja etpu yetpam nadiat alupas um esjilid o Natimarid:

²¹ ja uhpu imyiatamaig ra asega era arohoan nidai Natimarid ara.”

²² Ak nupu Isreel, akumu atahaijeg intas iji eigki aijaua, nikavaig, is ehvaig Iesu nup an Nasared ehelemia a Atua irai iji auritai esjilid, im niji auritai imyiali, im niji auritai ehka, is ago iran a Atua an nuhup unyimia, eka idim ato aijaua:

²³ ja akis leh yin aijaua, um atgei yin an nauincai atgeig irai ikma atimi auatatimi, et idivaig is atceijai yin a Atua an naktaktai u inliinmopon im nupyi ato o un:

²⁴ ja is ahiyi inwau an mas o un a Atua, um imyinusjai yin: va nitai ineigki, is idim ehka nimyiaaij yin vaig.

²⁵ Is tas vai yin a Tevit, um ika, “Kis ecet Natimarid ainyak an nuhup unyak irai iji adiat; et amen aien an matak, va ki jim ucjucjucaij ainyak:

²⁶ va nitai ineigki, is imyiacitak inliinmopok ainyak, kis lep cediaig ainyak an nipjineucsek; im lep ineig, etpu atumop nohuk ainyak um aitgaig inusjai unyak:

²⁷ napu eti ude nesgak aiek an naupat, um eti atceijaig Natimi Upene unyum mika yi muttit:

²⁸ as asuptecnaig ehelek aiek nefalaig et yetpan u nitai umoh iran; etpu imyiacitak alupas inliinmopok ainyak va nesganimtam.”

²⁹ Ak ilpu etoak, ekpu asuptecnaig upene ehelemia ainyak va etpoija Tevit, is mas aien, eris atelmoi yin, is amen nehpanitai iran eheleija um uhum pam an naopan ineig:

³⁰ is aprofeta aien, is lep ato aien, nikavaig, is idim upyi asig yi aktit ehelen a Atua, mika etpu imyiatidai Kristo aien ehele ilpu mapon, et idivaig nedo o atimi, par ateuc a dorona o un;

³¹ is upyi ato nitai ineigki aien, um tas vai inusjai o Kristo, um ika, eri eti ude nesgan an naupat, inyi ti muttit nohun.

³² Is imyinusjai Iesu ineigki a Atua, ecra atimi asuptecnaig vaig aijama asega:

³³ eris atijai yin an matai Atua, is leh Nesgan Upene aien ehele Etman et idivaig is upyi asaig aien, et mun lep atladwi nitai ineigki aien eka mun almoi aijaua um atahaijeg vaig.

³⁴ Is eti aridjai an nohatag a Tevit: ja is ika aien, “Et ika a Ihova ehele Natimarid unyak, Namu ateuc aiek an matak,

³⁵ um uhum pan an naopan iyehki ekpu ikni ilpu atimi tak atimi iram ainyak, mika eri itai atijai neduom iran.”

³⁶ Et inivaijec ineig erumu ato a nupu Isreel asega, nikavaig, Iesu neigki akis atgei yin aijaua an nauincai atgeig, is ati yin a Atua mika yi Atimarid aien im Kristo.

³⁷ ¶ Eris wat atahaijeg ara, is ohocred inliinmopura ara, eris ika ehele Pitrus im ilpu apostolo asega ara, Ak ilpu etoama, ecri ago inhe aijama?

³⁸ Is um ika ehele ra a Pitrus, Akumu adumoij anliinmopomia aijaua, um leh nabaptiso iramia asega an nidai Iesu Kristo, va uhpu eti aru nedo has unyimia; akupu leh nitai tup ahtai ineig aijaua, Nesgan Upene:

³⁹ et imi caua intas upyi asaig, im lep ilpu hal unyimia, im lep ra asega era itac acen ara, ara asega etpu ahlaig vai ra a Natimarid Atua uja.

⁴⁰ Is lep asan tas is ahinag is eche aien, um asuptecnaig itai, um ated ra, um ika, Akumu imyiatamaig caua aijaua vai ilpu atimi auatatimi an naopan ineig.

⁴¹ ¶ Ara eris leh upene intas o un ara, eris leh nabaptiso ira ra ara: eris lep asgeig pan ira ra an nadiat iyehki natimi is idivaig dri dausant.

⁴² Eris imyiisjis emda nesege o ilpu apostolo ara, im nauaraimu upene sjipe ura, im nisvisvihti nareto ura, im nalaigaheni.

⁴³ Eris imtitaig atimi asega: eris ago niji auritai imyiali is ahinag a ilpu apostolo im niji auritai ehka.

⁴⁴ Is tup ethi ache inliinmopoi atimi iji ehki asega eris imyiisjis ninivaijec ara, eris lep asipiaig niji itai asega ura ara;

⁴⁵ eris ahtai umara ara, im inpadiaig ura, um ahaig upene irai ilpu ihki atimi asega.

⁴⁶ Eris ehrasjapicnaig ara anliin neom ahlap irai iji adiat, is tup ethi ache inliinmopura, um iswiswoplec jipe nareto irai eom ura, um hag jipe, um cediaig anliinmopura inivaijec,

⁴⁷ um imyiahpas Atua, is upene inliinmopoi atimi asega vai ra. Is ikni natimi iji eigki eris imyiatamaig ra a Natimarid irai iji adiat an nakalasia.