Niji auritai o ilpu Apostolo 18 - Intas Etipup

Nuarin-tas alupas 18.

¹ IS wat ti pan itac nitai iji eigki, is ahes Adens a Paulo, um apan Korindus;

² is ecet nupu Jutaia is ethi aien eahki, nidan Akwila, eris apos yin Pontus; is tuh pam ahes Itale aien, im ehgan Prisilla, va nedo o Klatyus, nikavaig, is tas alep aien, mika eri ahes Roma a nupu Jutaia asega, um atga ura: is apan ehele rau aien.

³ Is tup ethi ache nauritai u ehtaij, va nitai ineigki is amen ehele rau aien, um auritai: erus atimi ago eom apelumai arau.

⁴ Is tas emda aien anliin neom alaigaheni irai iji adiat atumop asega, um leh updak nupu Jutaia im nupu Crisi.

⁵ Erus wat ahes Masetonea a Sailas im Timodeus um apan ehelen, is emda alupas inliinmopoi Paulo, is asuptecnaig emda ehele nupu Jutaia aien, um ika, Et Kristo a Iesu.

⁶ Eris wat edwodwai intas o un ara, um asan tas has esjilid, is uc-jucjaig napelumai iran aien, um ika ehele ra, Etmu amen iramia inja iramia; ek adicinadicin ainyak: ekpu ahidaig pan nyak ainyak ehele nup urai taka pece.

⁷ Is ahes eahki aien, um apan anliin neom o natimi is ethi, nidan Justus, is alaigaheni vai Atua aien, is eteuc neom o un ubutpotet o neom alaigaheni.

⁸ Is asgeig irai Natimarid a Krispus, natimi alupas ati neom alaigaheni, im lep ra asega an nimnim o un; eris lep atahaijeg intas a nupu Korindus is ahinag, um imyiisjis ninivaijec, um leh nabaptiso ira ra.

⁹ Is tas a Natimarid ehele Paulo an nepeig an numjeg ahnag o un, um ika, Jim imtitaig aiek, namu tas aiek, um jim eucsup:

¹⁰ ek amen ehelum ainyak, inyi ti yat iram tah natimi, um abli euc: era amen natimi unyak et ahinag an nuarin-pece ineigki.

¹¹ Is amen aien eahki irai yiir is ethi im inmohoc is siks, um esege imi ra intas o Atua.

¹² ¶ Is wat atimi alupas Akea a Calleo, eris ehras yat irai Paulo a nupu Jutaia, um imyiapan yin u nitai ateuc ineig eh tas alep iran,

¹³ um ika, Et ika a natimi ineigki ehele atimi eri alaigaheni vai Atua ara, jam imyipalea intas alep.

¹⁴ Is ika a Paulo yi tas, ja is ika a Calleo ehele nupu Jutaia, Ak nupu Jutaia, el et ika nedo has ineigki ka nauatatimi esjilid, et upene ineig el et eropse inliinmopok ainyak vai caua:

¹⁵ ja el et imyiisjis itai ineigki vai intas im nida atimi, im intas alep unyimia, tup aijaua marom vaig; ek esjum ainyak intas alep vaig va nitai iji eigki.

¹⁶ Is ahtahlo ra aien u nitai ateuc ineig eh tas alep iran.

¹⁷ Eris arop irai Sosdenes a nupu Crisi asega, natimi alupas an neom alaigaheni, um aredei yin an nuhup u nitai ateuc ineig eh tas alep iran: ja is eti aktaktai nitai iji eigki a Calleo.

¹⁸ IS lep amen eahki a Paulo is itu iran, ja par aiheuc vai ilpu etoan, um ahes eahki, um atga an nelcau, um apan Sirya; erus ahced yin a Prisilla im Akwila; is eucsei nidjinin aien Segkria, vai intas upyi asaig o un.

¹⁹ Is yetpan Efesus aien, um ude rau eahki: is apan aien anliin neom alaigaheni, um tas emda ehele nupu Jutaia.

²⁰ Eris ugni yin ara mika yi elvamen ehele ra aien, ja is esjum aien;

²¹ ja is aiheuc vai ra aien, um ika, Ek et hidim ika ainyak ki jipan u nasjapicnaig o atimi Jerusalem an naopan ineig: ja par lep adumoij pam ehelemia, tup Atua marom. Is ahes Efesus aien, um atga an nelcau.

²² Is apahai Sisaria aien, um apan Jerusalem, um aiheuc vai nup an nakalasia, ja par apan Anteok.

²³ Is amen aien eahki an nadiat is eti elpat, ja par lep atga o un, um ahced inpece Calesya asega, im Frijya, um ahidaig emda ilpu atimi alaigaheni asega.

²⁴ Is yetpan Efesus a nupu Jutaia is ethi, nidan Apollos, eris apos yin Aleksantrea, is atimi tas upene aien, um lep esjilid an nitasvitai itaup.

²⁵ Eris esege imi natimi ineigki nedo o Natimarid; is emda inliinmopon aien, um esege emda niji itai o Natimarid, is ato aien nabaptiso o Joanes ache.

²⁶ Is atupun aien um tas emda anliin neom alaigaheni: erus wat atahaijeg yin a Akwila im Prisilla, erus leh yin arau, um asuptecnaig upene ehelen nedo o Atua.

²⁷ Is wat ika aien yi apan Akea, eris aged nitasvitai a ilpu etoan, um ugni ilpu atimi alaigaheni mika eri Idi yin ara: is wat yetpan aien, um atau emda imi ra sji ehki eris imyiisjis ninivaijec ara va naiheuc o Atua:

²⁸ is imyiisjis emda irai nupu Jutaia aien um auud yi aijiraig intas ura an nuhup o atimi, um ehvaig an nitasvitai itaup mika et idim Kristo a Iesu.