Niji auritai o ilpu Apostolo 17 - Intas Etipup

Nuarin-tas alupas 17.

¹ ERUS ahced inuarin-pece Amfipolis arau im lep Apolonea, um yetpan Desalonaika, is eteuc neom alaigaheni o nupu Jutaia eahki:

² is apan a Paulo is idivaig nupyi edo o un ehele ra, um tas ehele ra an nadiat atumop is eseij an nitasvitai itaup;

³ um asuptecnaig, um ika, eris idim ika yi leh nohocred a Kristo, um lep nusjai vai inmas o un; im lep ineig, et Kristo ineigki a Iesu, ek asuptecnai yin ehelemia ainyak.

⁴ Eris imyiisjis ninivaijec nahaiji ra, um apol irai Paulo im Sailas; im lep nupu Crisi leh nalaigaheni o nupu Jutaia is ahinag, im ilpu takata esga atimi is ahinag.

⁵ Ja eris edemda a nupu Jutaia iji ehki eris eti imyiisjis ninivaijec ara, um leucse nahaiji ilpu atimi auatatimi amen an tiptag, um lep asjapicna atimi is ahinag, um auahas inliinmopoi atimi asega an nuarin-pece, um telohtelo pan u neom o Jeson, um ika eri leh pok ijo rau ehele atimi.

⁶ Ja eris eti ecet rau ara, eris um aihiaig pan Jeson ara, im nahaiji ilpu etoarau, ehele ilpu atimi alupas an nuarin-pece ura, um ika, Era mun lep ham igcaki ara sji eigki era ahidaig nobohtan ara;

⁷ is leh ra a Jeson: era lep ago nedo ineig et eche vai tas alep o Sisar ara sji eigki asega, um ika, Et eteuc Natimarid et eche, Iesu.

⁸ Eris auahas inliinmopoi atimi im lep ilpu atimi alupas an nuarin-pece ara, an natahaijegvaig nitai iji eigki ura.

⁹ Eris asan nimtan imi Jeson ara, im lep hal ra, ja par atceijai ra.

¹⁰ ¶ Eris auroauro a ilpu etoarau, um imyiapan Paulo im Sailas Beria an nepeig: erus wat yetpan eahki arau, erus apan arau anliin neom alaigaheni o nupu Jutaia.

¹¹ Is esjilid nedo ura irai edo o nupu Jutaia amen Desalonaika, eris leh intas ara um imyiacitak, um ahilek an nitasvitai itaup irai iji adiat, par ato, kit et inivaijec nitai iji eigki, ka oʼo.

¹² Eris imyiisjis ninivaijec natimi is ahinag; im lep ilpu takata esga atimi im ilpu atamaig is ahinag, eris upu Crisi ara.

¹³ Ja eris wat ato a nupu Jutaia amen Desalonaika, nikavaig, is asuptecnaig intas o Atua a Paulo Beria, eris lep apan ara eahki, um auahas inliinmopoi atimi.

¹⁴ Eris auroauro a ilpu etoan um abrai Paulo mika yi apok aien u injop: ja erus amen eahki a Sailas im Timodeus.

¹⁵ Eris imyiapan Paulo Adens a ilpu atimi ahced yin: eris wat lep adumoij pan ara, eris apos intas o un ara imi Sailas im Timodeus, mika eru auroauro arau um apan ehelen.

¹⁶ ¶ Is aitgai rau a Paulo Adens; is wat alum natmassimai is ahinag acen aien im nedo ura an nuarin-pece iyehki, is taigtaig alupas inliinmopon aien.

¹⁷ Is imyiisjis itai aien irai upu Jutaia anliin neom alaigaheni ura, im lep irai ilpu atimi leh nalaigaheni o nupu Jutaia, im lep ra sji ehki is ecet ra aien an tiptag irai iji adiat.

¹⁸ ¶ Eris lep imyiisjis itai iran nahaiji ilpu atimi arapakau irai ilpu atimi leh imi Epikurus, im ilpu Stoiko: eris ika nahaiji ra, Et ikha a natimi auyat ineigki? eris ika nahaiji ra, Et asuptecnaig ilpu atmas et eche aien: va nedo o un, nikavaig, is asuptecnai Iesu ehele ra aien, im nusjai o atimi vai inmas ura.

¹⁹ Eris arop iran ara, um imyiapan yin ehele ilpu atimi alupas, um ika, Ecra ika aijama ecri ato nesege mat ineigki, nai tas vaig aiek:

²⁰ na mun asaig aiek nahaiji itai imyiali an tikgama: ja ecra merit aijama natovaig nesgan tas iran.

²¹ Eris eti ago tah nitai a nupu Adens asega, im nup urai taka pece eris tup amen eahki ara, jam asuptecnaig um atahaijeg itai mat ache.

²² ¶ Is aiji a Paulo an nuhup o ilpu atimi alupas, um ika, Ak nupu Adens, ek almoi ainyak mika et ahinag nalaigaheni unyimia.

²³ Kis wat atga ainyak, um almoi natmassimai iji eigki eka alaigaheni vaig aijaua, kis ecetai ainyak natau eris aged intas iran, um ika, IMI ATUA INEIG ER ETI ATO YIN. Aien, eka eti ato yin aijaua, jam ago nalaigaheni vai yin, aien aigki ek asuptecnai yin ehelemia ainyak.

²⁴ Et eti amen irai eom ahlap er ago irai ikma atimi a Atua ineig, is ago nohatag aien im nobohtan, im niji itai asega amen iran, et idim Atimarid an nohatag aien im nobohtan;

²⁵ er eti aheca o un irai ikma atimi, et eti merit vaig tah nitai aien, era idim umumoh vai yin atimi asega, um adeijai ra, um leh niji itai asega;

²⁶ is ago nup urai iji pece asega aien, et tup ethi ache nohura, mika eri amen ara an nobohtan; is upyi uhup aien um anacanac an naopan ineig eri umumoh ir an ara, im inuarin iji eig eri amen iran ara;

²⁷ mika eri ahilek Natimarid ara, um raprap, kit erupu ecet yin ara, ja et eti amen itac acen vai caija asega aien:

²⁸ inta umumoh vai yin akaija, um atga, um eteuc an naopan ineig; et idivaig eris lep asaig nahaiji ilpu atimi oyag iramia, um ika, “Inta lep ilpu hal o un akaija.”

²⁹ Inta idim hal o Atua akaija, va nitai ineigki et eti upene vai caija naktaktai vaig, um ika, Et idivaig colt, im silver, im inhat a Atua, era ago atimi an namarero ura.

³⁰ Is pam eti aktaktai a Atua nedo o atimi an naopan iyehki u naupat u iji pece; ja et tas alep aien ehele atimi asega an naopan ineig irai iji pece asega, mika eri adumoij anliinmopura ara:

³¹ is idim ati nadiat ineig aien etpu asuptecnaig upene nimtan iran aien imi atimi asega, irai natimi ineig is ati yin aien; is asuptecnaig nitai ineigki aien ehele atimi asega an nimyinusjai yin o un vai inmas o un.

³² ¶ Eris wat atahaijeg ara va nusjai o atimi vai inmas ura, eris imyiafakahcil yin nahaiji ra: ja eris ika nahaiji ra, Ecrupu atahaijeg euc aijama va nitai ineigki an tak aopan.

³³ Is um ude ra a Paulo um atga o un.

³⁴ Ja eris apol iran nahaiji atimi, um imyiisjis ninivaijec: is amen ehele ra a Taionisyus natimi alupas is ethi, im lep intakata is ethi, nidan Tamaris, im lep hal ra.