Niji auritai o ilpu Apostolo 15 - Intas Etipup

Nuarin-tas alupas 15.

¹ ERIS ahes Jutaia nahaiji atimi, um apan eahki, um esege imi ilpu etoara, um ika, El eka eti leh naperitome iramia aijaua et idivaig is asaig a Moses, uhpu eti imyiatamaig caua.

² Erus tas emda a Paulo im Barnabas, um imyiisjis itai ira ra; va nitai ineigki eris ika ara eri abraig pan Paulo im Barnabas, im lep hal ra, Jerusalem, ehele ilpu apostolo im ilpu atimi tas alep, vai intas ineig eris imyiisjis itai vaig ara.

³ Eris atau ira rau a nup an nakalasia an natga urau, erus ahced inpece Finaisi im Samerya arau, um asuptecnaig, um ika, Era mun ahidai ra a nup urai iji pece: eris um imyiacitak intas urau a ilpu etoarau.

⁴ Erus wat yetpan Jerusalem arau, eris leh rau a nup an nakalasia, im ilpu apostolo, im ilpu atimi tas alep, erus asuptecnaig niji auritai asega arau is ago vai rau a Atua.

⁵ Ja eris um atidai tah irai ilpu Farisi eris imyiisjis ninivaijec ara, um ika, Eris idim ika cri aperitome ira ra ara, um asaig ehele ra mika eri imyiaiji intas alep o Moses.

⁶ ¶ Eris asjapicnaig a ilpu apostolo im ilpu atimi tas alep par tas jipe vai intas ineigki.

⁷ Eris imyiisjis acen ara, ja is um atidai a Pitrus, um ika ehele ra, Ak ilpu etoak, eka ato aijaua, nikavaig, is ati nyak a Atua iraija itu acen, mika eri atahaijeg intas-upene a nup urai taka pece an nipjineucsek, um imyiisjis ninivaijec:

⁸ is lep tas upene ehele ra a Atua ineig et ato inliinmopoi atimi aien, um alupai ra Nesgan Upene, is idivaig is alupai caija aien;

⁹ is tup ethi ache inliinmopon aien vai caija im lep ra, is ago adicinadicin inliinmopura aien va nimyiisjis ninivaijec ura:

¹⁰ va nitai ineigki eka auri aijaua par oop Atua, um atijai nitai ahelwei ineigki irai ilpu atimi alaigaheni, eris auatialidi a ilpu retpoija naposvaig, im lep akaija?

¹¹ ja inta imyiisjis ninivaijec nitai ineigki akaija, nikavaig, uhpu imyiatamaig caija va naiheuc o Iesu Kristo Natimarid, et idivai ra.

¹² ¶ Eris eti liglig atimi iji ehki asega, jam atahaijeg Barnabas im Paulo, erus wat asuptecnaig niji auritai ehka arau im niji auritai imyiali, is ago vai rau a Atua ehele nup urai iji pece.

¹³ ¶ Erus wat tas ehni arau, is par tas a Jakobus, um ika, Ak ilpu etoak, akumu atahaijeg nyak aijaua:

¹⁴ et mun asuptecnaig nitai ineig a Saimona, nikavaig, is upyi ateghe nup urai taka pece a Atua par iknipagki atimi ira ra va nidan;

¹⁵ et lep idvaig ineig intas o ilpu profeta; eris aged, um ika,

¹⁶ “Et wit ti pan itac nitai iji eigki ekpu adumoij pam ainyak, um lep ago neom ineig o Tevit is jase; ekpu imyiatidai neom ineig ainyak eris alcapdicraig, um lep ago upene

¹⁷ mika eri ahilek nyak Ihova a ilpu atimi tup amen, im lep nup urai taka pece asega era apos nidak ara, is ika a Ihova ineig et ago nitai iji eigki asega aien.”

¹⁸ Is ato niji auritai asega o un a Atua an naopan iyehki is pam eti eteuc nobohtan.

¹⁹ Va nitai ineigki ek ika ainyak, Ti jim imyidohalav nup urai taka pece iji eigki akaija eris ahidaig pan ra ehele Atua ara:

²⁰ jam aged nitasvitai imi ra, mika eri jim caig nitai iji eigki ara er amcel vaig er ahlap iran vai ilpu atmas, im niji itai er alcinwan, im inja irai itai, um jim ago ingaijid:

²¹ eris amen ara sji ehki irai iji uari-pece asega eris asuptecnaig intas o Moses ara, um esvitai irai eom alaigaheni irai iji adiat atumop asega, itu acen um imyihum pam an naopan ineig.

²² Eris ika a ilpu apostolo, im ilpu atimi tas alep, im nup an nakalasia asega, eri ati natimi inyi ero ira ra ara, um abrai rau mika eru ahced Paulo im Barnabas, um apan Anteok; eris abraig pan Jutas ara, tak idan Barsabas, im Sailas, erus esjilid arau irai ilpu etoarau:

²³ eris aged nitasvitai ara, um alupai ra mika eri apos, um ika; Ak ilpu etoama, nup urai taka pece, eka amen Anteok aijaua, im Sirya, im Silisya, ecra aiheuc vai caua aijama, ilpu apostolo, im ilpu atimi tas alep, im lep ilpu etoamia:

²⁴ ecris atahaijeg aijama, nikavaig, eris ahes igcaki nahaiji ma, um imyidohalav caua an tas ura, um auahas inliinmopomia, um ika, Aki idim leh naperitome iramia aijaua, um imyiaiji intas alep; ja ecris eti asaig intas ineigki ehele ra aijama:

²⁵ va nitai ineig ecra mun ehrasjapicnaig aijama, um ika, ecri ati natimi inyi ero aijama, um abrai rau, mika eru ahced ohwat etoama upene eraigki, Barnabas im Paulo, um apan ehelemia,

²⁶ ohwat atimi eti imyicoho nohurau va nidai Iesu Kristo Natimarid uja:

²⁷ ecra mun abraig pan Jutas im Sailas ehelemia aijama, erupu lep tas ehelemia arau va nitai iji eigki:

²⁸ is asaig a Nesgan Upene, im lep aijama, mika eri jim atijai tah nitai ahelwei iramia, nitai iji eigki ache et upene vai caua;

²⁹ nikavaig, aki jim caig nitai iji eigki aijaua er ahlap iran vai ilpu atmas, im inja irai itai, im niji itai er alcinwan, um jim ago ingaijid: el eka aminjinai caua aijaua va nitai iji eigki, akupu ago nedo upene aijaua. Kaiheuc vai caua.

³⁰ Eris wat adceijai ra, eris apan Anteok ara, um asjapicnaig ilpu atimi alaigaheni asega, um alupai ra nitasvitai iyehki:

³¹ eris esvi ara, um imyiacitak intas upene iran.

³² Erus atimi esege arau, Jutas im Sailas, erus ated ilpu etoarau arau an tas is ahinag, um ahidaig emda inliinmopura.

³³ Erus amen eahki arau is laulau, ja eris aiheuc vai rau a ilpu etoarau, um adceijai rau, mika eru apan ehele ilpu apostolo.

³⁴ Ja is ika a Sailas yimu amen eahki.

³⁵ Erus lep amen Anteok arau, Paulo im Barnabas, im nahaiji ra is ahinag, um esege imi atimi, um asuptecnaig intas-upene o Natimarid.

³⁶ IS wat ti pan itac nadiat is eti elpat, is um ika a Paulo ehele Barnabas, Tu lep apan akaijau um ateghe ilpu etoaijau irai iji uari-pece asega, intis asuptecnaig intas o Natimarid iran akaijau, um, almoi nedo ura.

³⁷ Is um ika a Barnabas eru leh Joanes arau, tak idan Markus.

³⁸ Ja is esjum a Paulo inleh yin vaig, is epujai rau aien Pamfilya, um eti ahced rau par auritai.

³⁹ Erus imyiisjis jipe emda arau, va nitai ineigki erus ude jipe rau arau: is leh Markus a Barnabas, um atga an jop, um apan Saiprus;

⁴⁰ ja is ika a Paulo yi ahced yin a Sailas, eris ugni Atua a ilpu etoan, mika yi aiheuc vai yin, ja is par atga o un aien.

⁴¹ Is ahced inpece Sirya aien im Silisya, um ahidaig emda nup an nakalasia.