Niji auritai o ilpu Apostolo 14 - Intas Etipup

Nuarin-tas alupas 14.

¹ ERUS wat amen Aikoneum arau, erus ehrapan arau anliin neom alaigaheni o nupu Jutaia, um tas; eris imyiisjis ninivaijec a nupu Jutaia is ahinag im nupu Crisi vai intas urau.

² Ja eris imyiho nup uran pece iyehki nahcil a nupu Jutaia iji ehki, eris imyiisjis nahcil ara, um auahas inliinmopura vai ohwat etoaija eraigki.

³ Ja erus amen arau is itu ira rau, um tas emda vai Natimarid, erus wat asuptecnaig intas aiheuc o un arau, is atau imi rau aien um alupai rau nemda o un mika eru ago niji auritai ehka arau im niji auritai imyiali.

⁴ Ja is acheiachei jipe inliinmopoi atimi is ahinag an nuarin-pece: eris apol irai nupu Jutaia nahaiji ra, ja eris lep apol irai ohwat apostolo erahki nahaiji ra.

⁵ Eris telohtelo pan ira rau a nupu Crisi im lep nupu Jutaia, im ilpu atimi alupas ura, mika eri abli rau, um asji rau irai hat,

⁶ erus ato arau, um aha pan Listra im Terbe inuari-pece i Likaonya, im lep irai iji uari-pece marahed mihtag:

⁷ um asuptecnaig intas-upene eahki.

⁸ Is amen Listra natimi is ethi is auatialidi neduon aien, is idauidau neduon aien an napos yin vaig, is idim eti atga aien um uhum pan naopan iyehki;

⁹ is atahaijeg intas o Paulo aien: is anani nimtan iran a Paulo, um ato, nikavaig, is imyiisjis ninivaijec aien va uhpu ago cehcehe yin;

¹⁰ is efehtas aien, um ika, Atidai aiek um aiji. Is efarectidai aien, um atga.

¹¹ Eris wat almoi nedo ineigki atimi is ago a Paulo, eris efehtas ara, um ika an tas Likaonya, Era mun asuol pam eheleija a ilpu atmas, um idiva atimi.

¹² Eris ika ara vai Barnabas, Jupiter naico, um ika vai Paulo, Merkureus naico; va nitai ineigki, nikavaig, is esjilid aien an tas.

¹³ Is imyiapan kurimatau im intisiaicai u neucse nathatahau a natimi alayi Jupiter, is eteuc neom, itaup o un ubutpotet u nuarin-pece ura, is ika aien im lep natimi, eri ahlap vai rau.

¹⁴ Erus wat ato ahwat apostolo Barnabas im Paulo, erus ahpati napelumai urau arau, um athut pan ehele atimi, um ahlaig ijinies,

¹⁵ um ika, Ak ilpu atimi alupas, eka auri aijaua par ago nedo ineigki? ecrau idim atimi aijumrau, um idivai caua; ecrau asuptecnaig intas-upene ehelemia aijumrau, mika aki ude nedo ahcil ineigki aijaua, um ahidaig pan caua ehele Atua umoh is ago nohatag aien, im nobohtan, im injop, im niji itai asega amen iran:

¹⁶ is tup ude nup urai iji pece asega aien itu acen, mika eri ago nedo ura ara:

¹⁷ ja is ati nohuun nato yin vaig aien, nikavaig, is ago nedo upene aien, um alupai caija incaupda et ahes an nohatag, im inlidija et ahinag inwah iran, et par imyiacitak inliinmopja va nitai caig et ahinag.

¹⁸ Is ehka vai rau intakehkevaig ehele atimi an tas ineigki, mika eri jim ahlap vai rau ara.

¹⁹ Eris ahes Anteok im Aikoneum a nupu Jutaia, um apan eahki, um auahas inliinmopoi atimi; eris asji Paulo ara irai hat, um aihiaig pan itac yin an nuarin-pece iyehki, eris aktaktai ara mika is mun mas aien.

²⁰ Eris wat aiji arahed iran a ilpu atimi alaigaheni, is um lep atidai aien, um apan an nuarin-pece iyehki: is wat lahlah an tak apnyin, is atga o un aien im Barnabas, um apan Terbe.

²¹ Erus asuptecnaig intas-upene arau an nuarin-pece iyehki, eris um alaigaheni atimi is ahinag vai rau: erus lep adumoij pan Listra arau, im Aikoneum, im Anteok,

²² um ahidaig emda inliinmopoi ilpu atimi alaigaheni, um ated ra mika eri apol an nimyiisjis ninivaijec, um ika, Eris idim ika intupu ohocred alupas akaija, ja par apan an nelcau o Atua.

²³ Erus wat ehtai ilpu atimi tas alep arau irai iji ekalasia asega, erus alaigaheni arau, um atwakam, um ikni ra ehele Natimarid ineig eris asgeig iran ara.

²⁴ Erus ahced inpece Pisitya arau, um yetpan Pamfilya.

²⁵ Erus asuptecnaig intas Perca arau, ja par apan Atalaia:

²⁶ erus ahes eahki arau um atga an nelcau, um apan Anteok, nuarin-pece iyehki eris ugni naiheuc o Atua vai rau iran, va nauritai ineig erus ago arau.

²⁷ Erus wat yetpan arau, erus asjapicnaig nup an nakalasia arau, um asuptecnaig niji auritai asega is ago vai rau a Atua, im lep ineig, nikavaig, is atipagki intapanes an nimyiisjis ninivaijec aien vai nup urai iji pece.

²⁸ Erus amen eahki arau is itu ira rau ehele ilpu atimi alaigaheni.