Niji auritai o ilpu Apostolo 12 - Intas Etipup

Nuarin-tas alupas 12.

¹ AN naopan iyehki is atgeig nikman a Herot, um atmas vai nahaiji nup an nakalasia.

² Is atgei Jakobus aien etoai Joanes an nauitoga.

³ Is wat ato aien, nikavaig, eris imyiacitak, a nupu Jutaia va nedo ineigki o un, is lep ika aien yi arop irai Pitrus. (An naopan iyehki eris asjapicnaig u nareto is ti leven iran.)

⁴ Is arop iran aien, um atapanes iran anliin neom ipjin, um ika ehele ilpu eucsupo is sikstiin eri aminjinai yin; is aktaktai aien mika, et wit ti pan itac napaska, etpu atceijai yin imi atimi.

⁵ Eris aminjinai Pitrus anliin neom ipjin; ja eris ugni emda Atua vai yin a nup an nakalasia.

⁶ Is wat ika a Herot yi imyialau ijo yin, an nepeig iyehki is um umjeg a Pitrus juju an niblai neucsupo is ero, eris arore yin an natauhat is ero: erus aiji an neucse neom ahwat atimi aminjinaig neom ipjin.

⁷ Is idim han ehelen a nagelo o Natimarid, is um lah aijaig inliin neom ipjin: is atcei pan nijihgai Pitrus aien, um imyiatidai yin, um ika, Auroauro aiek um atidai. Is um ispun etjose natauhat an nikman.

⁸ Is um ika ehelen a nagelo, Aroraijirai euc aiek, um ahtit ipjin incedpun eduom: is um ago aien. Is um ika ehelen aien, Aso euc aiek an napelumai unyum, um apitac nyak.

⁹ Is um alau ijo aien, um apitac yin; is eti ato aien, nikavaig, is inivaijec nitai ineig is ago a nagelo; is aktaktai aien mika is umjeg ahnag aien.

¹⁰ Erus ahtaregdei natimi aminjinaig neucse neom uhup arau, im lep natimi aminjinaig neucse neom juju, um yetpan u intapanes aiurn pan itac an nuarin-pece; is ispun asalgei vai rau: erus apan itac arau um atga an nefalaig is ethi; is ude yin a nagelo, um atga o un.

¹¹ Is wat eteuc lele Pitrus, is ika aien, Ek idim ato ainyak, nikavaig, et mun abrai nagelo o un a Natimarid mika yi imyiatamaig nyak va nikmai Herot, im lep inmerit asega o nupu Jutaia.

¹² Is wat aktaktai aien, is apan aien an neom o Mere risi Joanes, tak idan Markus; eris asjapicnaig eahki natimi is ahinag, um alaigaheni.

¹³ Is etcetcei intapanes an neucse nathatahau a Pitrus, is apan a natahaig is ethi, nidan Rota, par atahaijeg.

¹⁴ Is wat ato nohrai Pitrus aien, um eti asalgei intapanes va nimyiacitak o un, jam athut pan anliin neom, um asuptecnaig, um ika, Et aiji a Pitrus an neucse nathatahau.

¹⁵ Eris um ika ehelen ara, Na ahnag aiek. Ja is um imyiisjis aien, um ika, Et idim inivaijec. Eris ika ara, Nagelo o un naico.

¹⁶ Is amen a Pitrus um etcetcei: eris wat asalgei intapanes ara, um ecet yin, um imyiali.

¹⁷ Ja is ahpoijaiji ra aien, mika eri jim tas ara, is asuptecnaig ehele ra aien nedo o Natimarid vai yin, nikavaig, is imyialau ijo yin aien anliin neom ipjin: is ika aien, Akumu asuptecnaig nitai iji eigki aijaua ehele Jakobus, im ilpu etoak. Is ahes eahki aien, um apan an taka uarin.

¹⁸ ¶ Is wat lahlah an tak apnyin, is etehto inliinmopoi ilpu eucsupo, um ika, Pitrus yek eda?

¹⁹ Is ahilek yin a Herot, jam eti ecet yin, is ahodaig emda ilpu atimi aminjinaig neom ipjin aien, um tas alep vai ra, mika eri atgei ra. Is ahes Jutaia aien, um apan Sisaria, um amen eahki.

²⁰ IS edemda alupas a Herot vai nupu Tairus im nupu Saiton: ja eris ebras apan ehelen ara, um ahras; ja eris upyi hup ara um ika ehele Blastus, naheca esjilid o natimarid, yi atau imi ra aien; va nitai ineigki, nikavaig, eris apan ache ara an pece o Natimarid pah leh nitai caig incara.

²¹ An nadiat ineig eris ati, is aso yin a Herot an napelumai esjilid, um ateuc a dorona o un, um efehtas ehele ra.

²² Is ates nahlaig ijinies o atimi, um ika, Nohrai atua ineigki, et eti ohra atimi.

²³ Is auroauro um auud yin a nagelo o Natimarid, va nedo o un, nikavaig, is eti imyiahpas Atua aien: is isjis nija iran aien, is um mas aien.

²⁴ JA is um edel intas o Atua um apaahni.

²⁵ Erus wat ago ehni nauritai urau a Barnabas im Saulo, erus lep ahes Jerusalem arau um adumoij pan Anteok, is ahced rau a Joanes, tak idan Markus.