Niji auritai o ilpu Apostolo 11 - Intas Etipup

Nuarin-tas alupas 11.

¹ ERIS atahaijeg a ilpu apostolo im ilpu etoara Jutaia, nikavaig, eris leh intas o Atua a nup urai taka pece.

² Is wat apan Jerusalem a Pitrus, eris imyiisjis itai iran a ilpu atimi aperitome,

³ um ika. As apan aiek ehele atimi eti aperitome, um hag ehele ra.

⁴ Ja is atupun a Pitrus um asuptecnaig athiathi ehele ra, um ika,

⁵ Kis amen ainyak an nuarin-pece Joppa um alaigaheni: kis ahuumtidec ainyak an nalmu itai, um ecetai tah nitai is idivaig nap alupas, is ahes an nohatag um asuol, eris leh pam nesvipas iran is for um arore; is yetpam ehelek:

⁶ kis anani nesganimtak iran ainyak, um aktaktai, um ecetai niji itai an nobohtan et for neduon, im niji itai aleg, im niji itai ata has, im inman:

⁷ kis ahgei nohran tah ainyak is ika ehelek. Atidai aiek, ak Pitrus, um, atgei, um hegaig.

⁸ Jai kis ika ainyak, Oʼo, ak Natimarid: kis idim eti cespan tah nitai ineig ainyak et has ka itaup irai iji adiat.

⁹ Jai kis lep aketo ainyak um ahgei nohran iyehki is ahes an nohatag, is ika, Jim ika aiek et has nitai ineig et mun ago adicinadicin a Atua.

¹⁰ Eris ehceseij ago nedo ineigki: ja par lep aiyihijai asega an nohatag.

¹¹ An naopan iyehki ehtijis idim yetpan natimi is eseij ehelek an neom iyehki kis amen iran ainyak, eris abrai ehtaij Sisaria mika ehtiji apan ehelek.

¹² Is ika ehelek a Nesgan Upene ki ahced ehtaij ainyak, um jim imyiisjis. Eris lep ahced nyak a ilpu etoak et siks iji eigki; ecris apan aijama anliin neom o natimi iyehki:

¹³ is asuptecnaig ehelema aien, mika is ecet nagelo anliin neom o un, is aiji aien, um ika ehelen, Namu abra atimi aiek mika eri apan Joppa ara, um imyiacaij Saimona, tak idan Pitrus;

¹⁴ etpu asuptecnaig ehelum aien intas ineig uhpu imyiatamaig euc vaig, im lep ra asega an nimnim unyum.

¹⁵ Kis wat atupun ainyak um tas, is asuol a Nesgan Upene ira ra, is idivaig iyehki iraija itu acen.

¹⁶ Kis lep imyiehva ainyak intas o Natimarid is upyi asaig aien, um ika, “Is idim baptiso ira atinni a Joanes an wai; ja akupu leh nabaptiso o Nesgan Upene iramia aijaua.”

¹⁷ Et idim ucco, is alupai ra nitai tup ahtai ineig a Atua is upyi hup aien um alupai caija, ilpu atimi asgeig irai Iesu Kristo Natimarid, kis idivai di ainyak par imyiisjis ehele Atua?

¹⁸ Eris wat atahaijeg nitai iji eigki ara, is ti intas ura, eris imyiahpas Atua ara, um ika, Et mun lep alupai nup urai taka pece nitai ineigki a Atua, mika eri adumoij anliinmopura ara, va erupu leh nitai umoh iran.

¹⁹ IS wat eteuc nohocred iyehki is atupun an natgei Stifanus, eris apan Finaisi im Saiprus im Anteok ara sji ehki eris terimterim ara, um asuptecnaig intas ehele nupu Jutaia ache.

²⁰ Eris upu Saiprus im nupu Sairini nahaiji ra, eris wat apan Anteok ara, eris tas ehele nupu Jutaia iji eig eris tas an tas Crisi ara, um asuptecnai Iesu Natimarid ehele ra.

²¹ Is amen ehele ra nikmai Natimarid: eris imyiisjis ninivaijec natimi is ahinag, um adumoij pan ehele Natimarid.

²² ¶ Eris atahaijeg va nitai iji eigki a nup an nakalasia Jerusalem: eris abrai Barnabas ara, mika yi apan Anteok aien.

²³ Is wat yetpan aien, um ecetai naiheuc o Atua va atimi, is imyiacitak aien, um ated ra asega mika eri apol ipjin irai Atua ara anliinmopura.

²⁴ Is atimi upene aien, is amen alupas ehelen a Nesgan Upene, is esjilid nimyiisjis ninivaijec o un: eris ikni irai Natimarid natimi is ahinag.

²⁵ Is lep atga o un a Barnabas um apan Tarsus, mika yi ahilek Saulo:

²⁶ is wat ecet yin aien, is imyiapan yin Anteok aien. Erus amen arau ehele nup an nakalasia irai yiir is ethi, um esege imi atimi is ahinag. Eris upyi hup um anvi nidai ilpu atimi alaigaheni par ika Ilpu atimi o Kristo Anteok.

²⁷ ¶ An naopan iyehki eris ahes Jerusalem a ilpu profeta, um apan Anteok.

²⁸ Is atidai natimi is ethi ira ra, nidan Acabus, um tas irai Nesgan Upene, um ika, etpu eteuc numlaig has irai iji pece asega: ja is mun atimarid a Klatyus Sisar, is par eteuc.

²⁹ Eris tastas jipe a ilpu atimi alaigaheni, um ika eri aiheuc vai ilpu etoara Jerusalem is ase asega ira ra:

³⁰ eris ago ara, um ikni ehele Barnabas im Saulo, mika eru ahtai imi ilpu atimi tas alep arau.