Niji auritai o ilpu Apostolo 1 - Intas Etipup

Nuarin-tas alupas 1.

¹ AK Diofilus, kis upyi hup ainyak um aged nitasvitai iyehki va niji itai asega is atupun a Iesu um ago um esege,

² um yetpan u nadiat iyehki eris imyiaridjai yin, ja is upyi hup aien, um tas alep irai Nesgan Upene ehele ilpu apostolo iji eigki is ehtai ra aien:

³ is wat ti pan itac nohocred o un, is nusjai aien, um ehcohos ehele ra, um lep ehvaig niji itai asjaaicnaig inivaijec is ahinag, eris ecet yin ara ira adiat is forte, is tas ehele ra aien va niji itai an nelcau o Atua:

⁴ is tas ehele ra aien ira asjapicnaig ura, um, ika, Akumu amen Jerusalem aijaua um jim efi atga unyimia, jam aitgaig intas iyehki is upyi asaig a Etmak, akis ahgei ehelek aijaua:

⁵ is idim baptiso ira atimi a Joanes an wai; ja uhpu baptiso iramia an Nesgan Upene, et wit ti pan itac nadiat inyi ti elpat.

⁶ Eris wat asjapicnaig ara, eris ahodai yin ara, um ika. Ak Natimarid, napu lep atceijaig inpece o nupu Isreel imi ra aiek an naopan ineig, ka oʼo?

⁷ Is um ika ehele ra aien. Et eti upene vai caua natovaig naopan iyehki, im nadiat iyehki, is ati a Etmak an nemda o un:

⁸ ja akupu leh nemda aijaua, et wit yetpam iramia a Nesgan Upene: akupu atimi asuptecnaig nyak aijaua Jerusalem, im Jutaia asega, im Samerya, im lep irai iji pece asega an nobohtan.

⁹ Is asan tas iji eigki aien; eris wat aes yin ara, eris imyiaridjai yin; is um leh yin nepeig an nuhup u nesganimtara.

¹⁰ Eris wat anani nesganimtara ara an naridjai o un an nohatag, erus um aiji ubutpotet ehele ra natimi is ero, is ahi napelumai ira rau;

¹¹ erus ika arau. Ak nupu Calili, eka auri aijaua par easji pan an nohatag? Iesu meigki eh mun imyiaridjai yin an nohatag, etpu ham aien et idivaig napan o un ineig an nohatag eka mun almoi aijaua.

¹² Eris ahes an nedoon ara, nidan Olivet, um lep apan Jerusalem, et: tup idivaig natga o atimi an nadiat atumop mahes Jerusalem.

¹³ Eris wat apan ara anliin neom is ethi, eris aridjai an nuarin-neom ijinies ara, is amen eahki a Pitrus, im Jakobus, im Joanes, im Antrius, im Filipus, im Tomas, im Bardolomius, im Madius, im Jakobus; inhal o Alfius, im Saimona natimi leh imi ilpu Silotai, im Jutas etoai Jakobus.

¹⁴ Eris emda ara asega, is tup i ethi ache inliinmopura ara, um alaigaheni, um ugni itai, im lep ilpu takata, im Mere risi Iesu, im ilpu etoan.

¹⁵ IS atidai a Pitrus an naopan iyehki an nuhup o ilpu atimi alaigaheni, (eris wat esvi ra eahki is idivaig is wun huntret im twente nidara,) um ika,

¹⁶ Ak ilpu etoak, Eris idim ika uhpu ehneijid intas ineig o Nesgan Upene eris aged, is upyi asaig a Tevit vai Jutas, natimi iyehki is atau irai ra sji ehki aien eris arop irai Iesu ara:

¹⁷ eris esvi pan yin irama, is apol pan an nuarin nauritai ineigki aien: [

¹⁸ Is auanimtan nuarin-nobohtan a natimi ineigki an nimtan nedo has o un; ja is par etjo aien, is ahpati nipjinetgan, um elel nauintin asega:

¹⁹ eris ato nitai iji eigki ara asega eris amen Jerusalem ara; va nitai ineigki, er anvi nidan nuarin-nobohtan iyehki par ika Akeltama, an tas ura, nesgan tas ineigki, nuarin-nobohtan ja.]

²⁰ Eris aged an nitasvitai Ohranitai, um ika, “Etmu ahoai lelcai nimnim o un,” etmu ti amen iran tah: “etmu esjipigmoig yin intak atimi par auritai:”

²¹ eris idim ika eri ati natimi et ethi ira ra eris ahced caija ara irai iji adiat an namen o Iesu Natimarid eheleija,

²² an nahes u nabaptiso o Joanes, um yetpan an nadiat iyehki eris leh yin eheleija um imyiaridjai yin, mika yi atau imi caija aien, um asuptecnaig inusjai o un.

²³ Eris aniv natimi is ero ara, Josef, tak idan Barsabas, eris lep anvi nidan par ika Justus, im lep Matdaias.

²⁴ Eris alaigaheni ara, um ika, Ak Natimarid, na ato inliinmopoi atimi asega aiek, namu asuptecnaig aiek natimi ineig ira rau, nai merit vai yin aiek,

²⁵ mika yi imtaam apol an nuarin nauritai ineigki o ilpu apostolo aien, is ude a Jutas va nedo has o un, mika yi apan an nuarin o un.

²⁶ Eris ikni itai asjaaicnaig ira rau ara; is etjo nitai asjaaicnaig imi Matdaias; eris esvi pan yin irai ilpu apostolo is eleven.