2 Timodeus 4 - Intas Etipup

Nuarin-tas alupas 4.

¹ EK efasaig ehelum ainyak an nuhup u Atua, im lep Iesu Kristo Natimarid ineig etpu asuptecnaig nimtan aien imi ilpu atimi umumoh im ilpu atimi emesmas, an nehcohos pam o un an nelcau o un;

² mika an asuptecnaig intas aiek; namu emda aiek an naopan ineig et upene, im lep an naopan ineig et eti upene; namu tas aiek ehele atimi, um acaiji ra, um ated ra, anliinmopom eropse im nesege asega unyum.

³ Etpu yetpam naopan iyek eru wit esjum ara va nesege inivaijec; ja erupu ikni ilpu atimi esege imi ra ara, yi idivaig inmerit has ura, etpu aceigceig intikgara ara;

⁴ erupu auhaig pan intikgara ara eahki vai intas inivaijec, um atgeig pan u intas ecsipece vai intakitai.

⁵ Jam aminjinai euc aiek an niji itai asega, um leucse nohocred, um ago nauritai u natimi asuptecnaig intas-upene, um ago ehni nauritai unyum.

⁶ Er atupun par ahlap irak, et mun lep ubutpotet u naopan mas unyak ainyak.

⁷ Kis mun ago nedoa upene ainyak, kis mun athut ehni ainyak, kis apol an nimyiisjis ninivaijec ainyak:

⁸ eris lep ati imi nyak korona va nedo atoh, etpu alupai nyak an nadiat iyek a Natimarid ineig etpu asuptecnaig upene nimtan imi atimi aien: jam eti imi nyak ache,jam lep imi ra asega era imyiacitak ara va nehcohos pam o un.

⁹ Namu auroauro aiek, um apam ehelek tupko:

¹⁰ is ude nyak a Timas, is aiyu inliinmopon aien va nobohtan ineigki, is lep atga o un aien um apan Desalonaika; um lep apan Calesya a Kresens, um lep apan Talmesya a Taitus.

¹¹ Et amen ache ehelek a Lukas. Leh Markus aiek, um imyiapam yin ehelek; et upene aien natau imi nyak vaig an nauritai.

¹² Kis abrai Tikikus ainyak mika yi apan Efesus aien.

¹³ Na wit ham aiek, um apos napelumai iyehki kis ude ainyak Troas ehele Karpus, im lep nitasvitai iji ehki, um jim ude iji eig er aged ira arasi kurimatau.

¹⁴ Is ago nedo has is ahinag vai nyak a Aleksanter, natimi auritai irai bras: etmu aru iran a Natimarid yi idiva nauritai o un:

¹⁵ namu aminjinai euc aiek vai yin; is atapanes emda intas unyima aien.

¹⁶ Is eti amen ehelek tah natimi an nupyi asuptecnaig unyak, eris ude nyak atimi asega: uhmu jim atijai ira ra nedo ineigki.

¹⁷ Ja is amen ehelek a Natimarid, um ago emda nyak; mika ki asuptecnaig ehni intas-upene ainyak; eri lep atahaijeg a nup urai iji pece asega: eris lep imyiatamaig nyak u nipjineucse laion.

¹⁸ Etpu imyiatamaig nyak a Natimarid va niji auritai has asega, um aminjinaig nyak pan an nelcau o un an nohatag: uhmu imyiahpas yin irai iji mesese. Emen.

¹⁹ NAMU aiheuc vai Priska aiek im lep Akwila, im ra an nimnim u Onesiforus.

²⁰ Is amen Korindus a Erastus: jai kis ude Trofimus ainyak Melitus, is emehe aien.

²¹ Namu auroauro aiek, um uhup um apam, ja etpu mesese. Et aiheuc vai euc a Yubulus, im Putens, im Lainus, im Klatya, im ilpu etoaija asega.

²² Etmu amen anliinmopom a Iesu Kristo Natimarid. Uhmu aiheuc vai caua. Emen.